LECTURAS MARTES DÉCIMO NOVENO

LECTURAS MARTES DÉCIMO NOVENO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 2, 8 – 3, 4

Tupã Ñandejára he’i chéve: Ha nde, kuimba’e, ehendu ko ha’étava ndéve; ani nde jejapo avei umi tekove jejapóicha. Eipe’a nde juru ha he’u ko ame’ẽtava ndéve”. Upépe ahecha peteĩ po ojepysóva che gotyo peteĩ kuatia apakuapy reheve. Oipyso che renondépe ha ahecha ojehaiha mokõive ijapére jahe’o ha ñembyasy meme.

Ha’e he’i chéve: “Kuimba’e, he’u pe rerekóva ne renondépe; he’u pe kuatia apakuapy ha tereho eñe’ẽ Israelgua kuérape.” Che aipe’a che juru ha ha’e ho’uka chéve pe kuatia apakuapy.

Upéi he’i chéve: “Kuimba’e, emongaru nde rye ha emoenyhẽ nde py’a ko kuatia apakuapy ame’ẽva ndévepe”. Che ha’u ha añandu che jurúpe eíraicha he’ẽ asy. He’i chéve: “Kuimba’e, tereho umi Israelgua rendápe ha eikuaauka ichupekuéra che Ñe’ẽ.

Tupã Ñandejára Ñe’ẽ.

SALMO ÑEMBOHOVÁI 118, 14. 24. 72. 103. 11. 131

Opavave: Tupã Ñandejára he’ẽte niko che jurúpe upe ne Ñe’ẽ

Ne rembipota ajapo ramo avy’ave
opa mba’e areko ramo guágui.
Ne rembiapoukapy upe che mbovy’áva,
ha ohechauka chéve mba’éichapa aiko va’erã. O.

Che ahecha ramo ne rembiapoukapy
óro ha plátagui ahecha ramove.
He’ẽte niko che jurúpe upe ne ñe’ẽ,
eiretégui he’ẽve. O.

Ne rembiapoukapy opytáta che mba’erã opa árape guarã,
umíva ombohorýgui upe che py’a.
Aipe’a che juru, ha puku che pytu araha,
upéicha umi ne rembiapoukapy che ra’ã. O.

ALELUIA Mt 11, 29ab

Aleluia.
Ñandejára Jesucristo he’i: “Pe moï pende apére che mba’e pohyikue ha che pombo’éta, che aha’arökuaa ha ndajejapói”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 18, 1-5. 10. 12-14

Upe ramo Ñandejára remimbo’ekuéra oñemboja hendápe ha oporandu ichupe: Máva piko pe mba’e guasuvétava Tupã Ñandejára oporosãmbyhývo yvágape?

Upépe Jesús ohenói peteĩ mitãme ha omoĩ ijapytépe kuéra, ha he’i: Añetehápe ha’e peẽme, ndapeiko jevýi ramo mitãicha, ndapeike mo’ãi Tupã Ñandejára sãmbyhy yvágape. Pe oñemomirĩva ko mitãicha, upéva pe mba’e guasuvétava Tupã Ñandejára sãmbyhýpe yvágape. Ha oimeraẽva, che rérape oguerohorýva peteĩ mitã koichagua, chéve che rerohory.

Aníke pe apo’i pe mitãicha che rehe ojeroviávape. Ha’e peẽme, Tupã Ñandejára remimboukuéra hese oñangarekóva oĩ yvágape tapiaiteha che Túva renondépe.

Mba’épa peẽ peimo’ã ojapotaha peteĩ kuimba’e oguerekóva 100 ovecha, ha okañy ramo ichugui peteĩ?

Ohejáne ñúme umi 99, oho haguã oheka pe okañy va’ekue. Ha ojuhúvo, ovy’a iteve va’erã ko peteĩ ovecha reheve, umi 99 okañy’ỹ va’ekue reheve guágui. Péicha avei, pende Túva oĩva yvágape ndoipotái oñehundi peteĩnte jepe ko’ãvagui, mitãicha che rehe ojeroviáva.

Ñandejára Jesucristo Ñe’ẽ