LECTURAS DOMINGO DÉCIMO NOVENO

LECTURAS DOMINGO DÉCIMO NOVENO

LECTURA PETEÎHA:

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 18, 5-9

Upérõ umi Egiptogua ojukapa imarangatúva ra’ykuérape; ha umívagui, peteĩ añoite opyta oikove. Ha ichupekuéra reinupãvo, rejuka ita’ýrakuéra ypykue, ha y ipochývape reity iñorairõhárakuéra omanomba haguã hikuái.

Upe pyharépe oiko haguã ko’ã mba’e, mba’eve ojehu mboyve, ore rukuéra ypykuépe reikuaauka upe oikótava, ikatu haguã oñeñandu mbarete ojeroviávo ne ñe’ẽ rehe. Ne retãguakuéra upe ramo oha’arõ va’ekue avei umi imarangatúva osẽtaha jejopy vaígui, ha nde rehe ija’e’ỹva oñehundipataha.

Pe ñenupã reme’ẽ va’ekue umi ore rayhu’ỹvape, ore myenyhẽ torýgui, ne rendápe ore renóivo. Upéva rehe, umi imarangatúva, heko jojáva ñemoñare, omymbajuka va’ekue ñemiháme, ha peteĩ ñe’ẽtépe omoĩ hikuái hendápe ne rembiapoukapy.

Imarangatúva peteĩchata opavave, iporãva rerekópe ha ivaíva jehasápe. Ha upe ramo ma voi oñepyrũ opurahéi túva ypy kuérakue purahéi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 32, 1. 12. 18-20. 22
Opavave: Ovy’a upe tetã ha’e oiporavo va’ekue imba’e teerã.

Mayma imarangatúva tomomba’e Ñandejárape.
Omomba’e guasu va’erã voínte ichupe, opa imarangatúva.
Ovy’a upe tetã oguerekóva Tupãme ijára ramo,
upe tetã ha’e oiporavo va’ekue imba’e teerã. O.

Tupã katu oñangareko umi ichupe omomba’évape
ha imborayhu rehe ojeroviávape.
Umívape ha’e ndohejái omano.
Omoingove katu ichupekuéra ñembyahýi guasu ou jave. O.

Tupã rehe ore rojerovia.
Ha’e upe ore pytyvõ ha oñangarekóva ore rehe.
Ñandejára, ne mborayhu ta ore añuãmba.
Upéva roha’arõ nde hegui. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ ojehai va’ekue Hebreoskuérape 11, 1-2. 8-19

Che pehẽnguekuéra: Jajerovia ramo, jaikuaa porã jahupityha katuete pe ñaha’arõva, he’ise, jarovia añete ramo umi mba’e jahecha’ỹva. Ñande ru ypykuérakuépe Tupã ombojerovia va’ekue ojerovia hague rehe.

Ojerovia rupi, Abraham, ohenóivo ichupe Ñandejára, iñe’ẽ rendu ha osẽ oho haguã pe yvy ichupe ome’ẽtavape. Ha osẽ va’ekue pe oikohágui oikuaa’ỹ rehe mamópa oho. Ha ojerovia rupi, oiko mombyrygua ramo pe yvy Tupã oikuave’ẽ va’ekuépe ichupe.

Oiko umi óga vakapípe, Isaac ha Jacob oiko haguéicha, ohupity va’ekue avei upe Tupã he’i va’ekue ome’ẽtaha. Ojerovia rupi, Abraham oha’arõ va’ekue pe táva guasu opa ára guarãva, Ñandejára omopu’ã va’ekue.

Ojerovia rupi avei, ndaikatúi ramo jepe Sara imemby ha Abraham ituja etereíma, oñeme’ẽ ichupe mbarete ita’ýra haguã, oguerovia rupi Tupã ojapotaha katuete he’i haguéicha. Aipo ramo Abraham, hi’ára guahẽ aguĩma ramo jepe, ou hetaiterei ita’ýra, mbyja oĩ háicha yvate ha yguasu rembe’ýpe yvyku’i, ikatu’ỹvaicha ojeipapa.

Opa ko’ã yvypóra omano ohupity’ỹre umi mba’e Tupã he’i va’ekue ome’ẽtaha. Ha ojerovia rupi, ohecha hikuái mombyry guive ha omomaitei, ojehecha kuaávo ha’ekuéra mombyryguaha ohasáva ko yvy ári. Ha umi péicha he’íva, oikuaauka porã oikoha gueteri oheka hikóni hetãrã.

Imandu’a rire hikuái pe yvy oheja va’ekue, ikatúnte va’erã mo’ã oho jevy hikuái upépe. Ha ha’ekuéra katu oipota va’ekue peteĩ tetã iporãvéva, he’ise, tetã yvága pegua. Upéva rehe Ñandejára notĩri oiko haguã Itupãnguéra ramo. Oguereko niko ichupekuéra guarã peteĩ táva guasu ombosako’íva.

Ojerovia rupi, Abraham, Tupã oipy’a ra’ãvo ichupe, ohupi Isaácpe oikuave’ẽ haguã pe ta’ýra peteĩmi. Tupã ome’ẽ rire ramo jepe ichupe iñe’ẽ, he’i ramo “Isaac rupi ne ñemoñaréta”.

Abraham niko ohechakuaa Tupã ipu’akaha omoingove jevy haguã omano va’ekuépe. Ha upéva rehe Abraham oguereko jevy ita’ýrape, ha upéva opyta mba’e rechaukaha ramo.

Tupã Ñandejára Ñe’ẽ.

O bien más breve:
Ko’ágã ñahendúta Tupã Ñandejára ñe’ẽ ojehai va’ekue Hebreoskuérape 11, 1-2. 8-12

Che pehẽnguekuéra: Jajerovia ramo, jaikuaa porã jahupityha katuete pe ñaha’arõva, he’ise, jarovia añete ramo umi mba’e jahecha’ỹva. Ñande ru ypykuérakuépe Tupã ombojerovia va’ekue ojerovia hague rehe.

Ojerovia rupi, Abraham, ohenóivo ichupe Tupã, iñe’ẽ rendu ha osẽ oho haguã pe yvy ichupe ome’ẽtavape. Ha osẽ va’ekue pe oikohágui oikuaa’ỹ rehe mamópa oho. Ha ojerovia rupi, oiko mombyrygua ramo pe yvy Ñandejára oikuave’ẽ va’ekuépe ichupe.

Oiko umi óga vakapípe, Isaac ha Jacob oiko haguéicha, ohupity va’ekue avei upe Tupã he’i va’ekue ome’ẽtaha. Ojerovia rupi, Abraham oha’arõ va’ekue pe táva guasu opa ára guarãva, Tupã omopu’ã va’ekue.

Ojerovia rupi avei, ndaikatúi ramo jepe Sara imemby ha Abraham ituja etereíma, oñeme’ẽ ichupe mbarete ita’ýra haguã, oguerovia rupi Tupã ojapotaha katuete he’i haguéicha. Aipo ramo Abraham, hi’ára guahẽ aguĩma ramo jepe, ou heta iterei ita’ýra, mbyja oĩháicha yvate ha yguasu rembe’ýpe yvyku’i, ikatu’ỹvaicha ojepapa.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 24, 42a. 44
Aleluia.
Pejesarekóke aipo ramo
Peimo’ã’ỹve jave niko che, yvypóraicha, ajúta.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 12, 32-48
Opavave: Romomba’e guasu ndéve, Ñandejára.

Upéro Jesús he’i idisípulokuérape: Peẽ che disípulokuéra mimi ani pekyhyjétei mba’evégui. Ñandejára, pende Ru, ome’ẽse peẽme iréino. Peme’ẽmba perekomíva, ha hepykue pehupytyka oikotevẽvape. Pejapo pende mba’erã vosa osoro’ỹ arãva, ha peñongatu yvágape
upe pene rakate’ỹveha. Yvágapeko ndoikéi mondaha ha upépe ndaipóri tigua’ã.

Upe pene rakate’ỹha oĩháme, upépe pemoĩne pende korasõ. Peñembosako’íke ha ani peheja pene lampĩu ogue pendehegui. Peime vaerã
umi tembiguáicha oha’arõva ijárape ou jey mendahágui. Lampĩu ipópe oha’arõ hikuái upe okẽme, oipe’a hag̃ua ijárape ombotavove. Ou porã va’erã niko umi tembiguáipe, ojevývo ijára ha ndojuhúi chupekuéra oke hína.

Che ha’e peẽme, pe óga jára voi omboguapýne chupekuéra mesápe ha ha’e voi omoĩne peteĩ- teĩme hembi’urã. Ou porã vaerã chupekuéra, hóga jára oúrõ ojuhu ipáype porã, tou jepe ra’e pyhare pyte térã ko’ẽ mbotávo.

Peikuaa ramo mba’e órapepa oúta peẽme mondaha, niko peha’arõta ha ndapeheja mo’ãi oike. Ha péicha peime vaerã opa ára. Peimo’ã’ỹve jave niko aju jeýne che.

Pedro osẽ oporandu Jesúspe:— Mbo’ehára, ko’ã mba’e eréva hína piko, oréve ere térã opavavépe g̃uarã
hína.

Ha he’i Jesús: Mávatepa hína pe ijeroviaháva ha imba’e recha kuaáva. Ku ipópe óga jára ohejapáva opa mba’e, ha hapichakuéra remikotevẽ jepe ohecha kuaáva. Ou porã vaerã chupe, hóga jára ou ramo ojuhu ojapopa hague umi mba’e oheja va’ekue chupe.

jeroviaháva pópe niko pe óga jára ohejapáne opaite mba’e. Ja’éntena pe tembiguái he’iha ipy’apýpe “Che patron niko mombyry oho, ha
oime va’erã hi’aréta hína”. Ha oñepyrũ oñemboharái hapicháre hamba’e, ha osẽ okaru ha omokõ. Péicha háguinte hóga jára ou jeýne, ku oimo’ã’ỹve jave.

Orrepunta va’erã chupe ág̃a, ha omondo umi tekove jeroviaha’ỹ apytépe. Pe oikuaáva ipatron rembipota, ha upéi ndojapói chupe oje’éva, heta oipo’o va’erã ág̃a. Umi oikuaa’ỹre ojapóva ojapo’ỹ va’erã katu, oipo’o’ivéne. Ñandejára niko imba’e porã pene ndive. Upéicha ave, ha’e oha’arõ peẽ pejapo ha’e oipotáva. Ha oime rire ha’e ipojera pene ndive, hetave oha’arõta pende hegui.

Ñandejára Jesucrísto Ñe’ẽ.

O bien más breve:
Marandu porã Ñandejára Jesucrísto rekove ha hemimbo’e San Lucas omombe’u háicha 12, 35-40

Upéro Jesús he’i idisípulokuérape: Peñembosako’íke ha ani peheja pene lampĩu ogue pendehegui. Peime va’erã umi tembiguáicha oha’arõva ijárape ou jey mendahágui. Lampĩu ipópe oha’arõ hikuái upe okẽme, oipe’a hag̃ua ijárape ombotavove. Ou porã va’erã niko umi
tembiguáipe, ojevývo ijára ha ndojuhúi chupekuéra oke hína.

Che ha’e peẽme, pe óga jára voi omboguapýne chupekuéra mesápe ha ha’e voi omoĩne peteĩ-teĩme hembi’urã. Ou porã va’erã chupekuéra, hóga jára oúrõ ojuhu ipáype porã, tou jepe ra’e pyhare pyte térã ko’ẽ mbotávo.

Peikuaa ramo mba’e órapepa oúta peẽme mondaha, niko peha’arõta ha ndapeheja mo’ãi oike. Ha péicha peime va’erã opa ára. Peimo’ã’ỹve jave niko aju jeýne che.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.