LECTURAS MIÉRCOLES DECIMOQUINTA SEMANA

LECTURAS MIÉRCOLES DECIMOQUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 10, 5-7. 13-16

Tupã Ñandejára he’i: “Cháke Asiria! Upéva hína yvyra aporonupã rasy haguã, che tukumbo, che pochy ramo!

Amondo ondyry haguã tetãgua ahẽre ha tetã che mbopochývare, omonda ha oipe’a haguã imba’eta, opyrũmba haguã hese tuju tapépe guáicha. Asiria ruvicha guasu katu noimo’ãi upéichaha, ha ndapévai hína pe ha’e ohekáva.

Ha’e oporohundisénte voi ha oipota imba’erã opa tetã. He’i haguére: “Che pyapy mbaretépe ajapo, che arandu ha che akã porã rupi.
Tetãnguéra rembe’y che arova, imba’eta rehe añemomba’e, kuimba’e py’a guasúicha mburuvicha guasukuéra amongúi.

Tetãnguéra mba’etápe apo’ẽ guyra raitýpe oñepo’ẽ háicha, ha oñemonda háicha hupi’a, amonda yvy tuichakue. Ha ndaipóri avave ojepepo mbopu, ojejuru pe’a, térã ochiãva.”

Ojererovunga’u piko háicha iporuhára renondépe, ojejaponga’u piko serrúcho yvyra kytĩ hára rovake? Yvyra ojejekoha piko hína pe omboguatáva iporuhápe, ko yvyránteva ha’e?

Upévare Tupã Ñandejára ipu’akapáva hesãivape ombohasýta, ha hetére omoendýta akãnundu.

Tupã Ñandejára Ñe’ẽ.

SALMO ÑEMBOHOVÁI 93, 5-10. 14-15

Opavave: Tupã Ñandejára nda hesarái mo’ãi hetãguágui

Ore Jára, ha’e kuéra oñemboharái opa ne momba’évare,
ha ojopy pohýi umi ne retãgua ndive.
Kuña iména manóva, okaragua ijapytépe oikóva,
ha tyre’ỹnguéra jepe ojuka hikuái. O.

He’i hikuái: “Tupã Ñandejára niko ndohechái mba’eve,
Israel Tupã ndoikuaái ko jajapóva.”
Pehendu peẽ výro atýra!
Mba’éicha piko nda pejecha kuaái? O.

Upe ome’ẽ va’ekue peẽme pende apysarã,
piko nohendu mo’ãi?
Upe ome’ẽ va’ekue peẽme
pende resarã, piko ndohecha mo’ãi? O.

Tupã Ñandejára nda hesarái mo’ãi hetãguágui,
ndohejamo’ãi ha’eño umi imba’évape.
Teko joja ojehecha jeýne ñembojovakehápe,
ha umi imarangatúva ojapóne hekojojáva. O.

ALELUIA Cf. Mt 11, 25

Aleluia.
Che Ru nde niko hovasapyre, Tupã yvy ha yvága Jára, rehechauka haguére mba’e guasu ete Sambyhy rehegua
umi michïvévape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 11, 25-27

Upe ramo Jesús he’i: Romomba’e guasu che Ru, yvága ha yvy Jára, reñomi haguére ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape.

Upéicha che Ru, péichante voi reipota va’ekue ojehu. Che Ru niko omoĩ che poguýpe opa mba’e. Avave ndoikuaái Tupã Ra’ýpe, Túva añónte. Ha avave ndoikuaái Túvape, Tupã Ra’y añónte, ha umi ojekuaaukávape Tupã Ra’y.

Ñandejára Jesucristo Ñe’ẽ