LECTURAS MIÉRCOLES DECIMOSEXTA SEMANA

LECTURAS MIÉRCOLES DECIMOSEXTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha     1, 1. 4-10

Jeremías, Hilquías ra’y ñe’ẽ ha rembiapokue. Ha’e va’ekue pa’ikuéra rehegua oĩva Anatot Benjamín guápe. Upérõ Tupã Ñandejára oñe’ẽ chéve ha he’i: “Rojapo mboyve nde sy ryépe, roikuaáma va’ekue, ha resẽ mboyve ichugui  roiporavo va’ekue  che mba’erã. Romoĩ maranduhara ramo tetã nguérape guarã.”

Che katu ha’e: “Anína, Tupã che Jára! Che niko mitã pyahu ha na ñe’ẽ kuaái.”

Ha Tupä Ñandejára he’i chéve: Ani ere “chéko mitã pyahu”.

Mamo rojokuaihápe rehóta ha eréta che ha’éva ndéve.

Ani rekyhyje avavégui, che aiméta ne ndive romo’ã haguã.

Che, opa mba’e Jára, ame’ẽ che ñe’ẽ.

Upérõ Tupã Ñandejára oipyso ipo, opoko che jurúre ha he’i:

“Amoĩ che Ñe’ẽ nde jurúpe, ha ame’ẽ ndéve che pokatu nde pu’aka haguã yvypóra ha tetã nguérare, rehapo’o ha reity haguã yvýre, rehundi ha remongu’i haguã, remopu’ã jevy ha reñotỹ haguã.”

Tupã Ñandejára Ñe’ẽ.

SALMO ÑEMBOHOVÁI  70, 1-4a. 5-6b. 15ab. 17

Opavave: Tupã Ñandejára, opa árape amoherakuãne.

Ñandejára, ne rendápe niko aguahẽ, ani che rejátei añemotĩ.

Che pytyvõ ha che renohẽ ko ajejopy vaihágui,

Nde, nde reko jojágui, che rendu kena, che pe’a jejopy vaígui. O.

Nde upe reñangarekóva che rehe, nde guýpe añemo’ã ha nde che renohẽ jejopy vaígui.

Nde hína upe che rehe reñangarekóva ha upe che mo’ãva.

Tupã Ñandejára, che pe’a umi hembiapo vaíva po guýgui. O.

Nde rehénte voi Tupã Ñandejára che mitã guive ajerovia.

Che sy ryépe aime ramo upe guivéma voi nde rehe ajeko.

Nde upe che renohẽ va’ekue  che sy ryepýgui,

upévare romomba’e guasúne opa árape. O.

Opa árape amoherakuãne, ore renohẽha rojejopy vaihágui

reme’ẽha oréve teko joja. Jepe ko’ã mba’e ndaijái che akãme.

Tupã, che mitã rusu guive niko nde che reko mbo’e

amombe’u umi mba’e tuichaite nde rejapo va’ekue. O.

ALELUIA

Aleluia.

Pe mba’e ra’ÿi Tupã Ñandejára ñe’ẽ hína,

pe oñotÿva Jesucristo; pe ojuhúva oikove opa ára guarä.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   13, 1-9

Upe ramo Jesús osẽ hógagui ha oho yguasu Galiléa rembe’ýpe. Upépe oguapy oñe’ẽ haguã. Ha hetágui umi oñemboatýva Jesús jerére, ojupi ha’e ha oguapy peteĩ kanóape, ha opavave opyta pe y rembe’ýpe.

Upe guive ha’e oñe’ẽ ichupekuéra heta mba’ére, ha oiporu ñe’ẽ mbojoja omoesakã haguã ichupe kuéra pe he’iséva. He’i ichupekuéra: “Oĩ va’ekue  peteĩ osẽva oñemitỹ haguã. Ha omosarambívo pe oñotỹséva ra’ỹi, oĩ ho’áva umi tape ojeguataha rupi ha ou guyrakuéra ha ho’upa. Oĩ avei ho’áva itatýpe, yvy ipokãháme.

Umíva voi heñói, ipererĩgui pe yvy. Kuarahy ojopévo katu ohapypa, ha ndahapo pypukúigui ipirupa. Oĩ avei ho’áva ñuatĩndýpe, ha umi ñana okakuaávo ojaho’ipa ha ojuka. Oĩ katu avei ho’áva yvy iporãháme ha upépe hi’a heta. Oĩ hi’áva 100, oĩ hi’áva 60 ha oĩ hi’áva 30.”

Jesús upéi he’i ichupekuéra: “Ohendúvake to japysaka porã.”

Ñandejára Jesucristo Ñe’ẽ