LECTURAS MARTES DECIMOSEXTA SEMANA

LECTURAS MARTES DECIMOSEXTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Miqueas arandukápe oĩ háicha 7, 14-15. 18-20

Eñangarekóke ore Jára ne retãgua ha ovechakuéra ne mba’e teévare, ka’aguýpe opytáva ha’eño, yvy ne porãmba jepévape!
Eraha ichupe kuéra yma guaréicha, okarúvo Basán ha Galaádpe. Ehechauka ichupe kuéra mba’e hechapyrãva, Egíptogui ichupe kuéra renohẽ ramo guaréicha.

Tupã Ñandejára, ndeichagua ndaipóri, reheja rei tembiapo vaikue, ha reñemboesarái ne retã rembyre opu’ã hague nde rehe.
Nde hasýpe nde pochýva ha reporo poriahuvereko. Ore poriahuvereko jevy kena ha eñotỹ ore añangue, ore rembiapo vaikue emombo yguasu ruguápe.

Ne mandu’a kena ore Jára ne Ñe’ẽ ha ne mborayhúre, yma ite guive reme’ẽ va’ekue ore ru kuéra ypykue Abraham ha Jacóbpe!

Tupã Ñandejára Ñe’ẽ.

SALMO ÑEMBOHOVÁI 84, 2-8

Opavave: Ore Jára, ore poriahuvereko kena ha ore renohẽ jejopy vaígui.

Ore Jára, nde py’a porãva’ekue ne retã ndive,
Jacob ñemoñarépe tetã mombyrýgui regueru jevy.
Nde resarái va’ekue ne retã reko vaígui,
iñangaipa reheja rei ichupekuéra. O.

Ore Jára, ore renohẽva jejopy vaígui,
ore mopu’ã jeýna ha anive nde pochy ore ndive.
Nde pochy piko ndopa mo’ãi voi?
Opa ára piko nde pochýta ore ndive? O.

Nde reheja mo’ãi piko roikove,
ore ne retãgua rovy’a haguã?
Ore Jára, ore poriahuvereko kena
ha ore renohẽ jejopy vaígui. O.

ALELUIA Jn 14, 23

Aleluia.
Ñandejára Jesucristo he’i: “Pe che rayhúva nomboyke mo’ãi che ñe’ẽ,
che Ru ohayhúta ichupe ha moköive rohóta henda peve”.
Aleluia.

EVANGELIO

Señalando con la mano a sus discípulos, dijo: “Éstos son mi madre y mis hermanos”

Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese? 12, 46-50

Upe ramo Jesús oñe’ẽ jave gueteri hína, oguahẽ ha’e oĩháme isy ha ityvýra kuéra, oñe’ẽséva hendive. Ha opytágui hikuái pe óga rokápe, peteĩ umi upépe oĩva he’i Jesúspe: Nde sy ha nde ha ryvykuéra oime okápe, ha oñe’ẽse nendive.

Jesús katu he’i: Mávaiko che sy ha máva che ryvy?
Ha omañávo, hemimbo’ekuérare he’i: Ko’ãva hína che sy. Ko’ãva hína che ryvy. Ha oimeraẽ ojapóva che Ru yvága pegua rembipota, upéva hína che ryvy, che reindy ha che sy.

Ñandejára Jesucristo Ñe’ẽ.