LECTURAS MIÉRCOLES TANIMBU ÁRA

LECTURAS MIÉRCOLES TANIMBU ÁRA

MAITEI OÚVAPE – Saludo
Ñañepyrũvo Cuaresma ko tanimbu árape jahecha kuaa jarekoha heta mba’e ñande rekovépe ñaikotevẽva Ñandejára omopotĩ. Upévare jerovia pópe ñañemoĩ henondépe tañandeporiahu vereko ha tañanepohãno.

ORACIÓN COLECTA

Tupã Ñandejára, ko kuarésma marangatu rupive ore pytyvõkena roguata kuaa haguã tekove pyahu rapére ha orepu’aka haguã, orejejoko rupi, opaite mba’e vai rehe.

Nde Ra’y Jesucristo rupive, Tupã Ñandejaraite, oikovéva ha ipu’akapáva nendive Espíritu Sánto ñemopeteĩme, yma, ko’ãga ha opa araite.

ÑAHENDU ÑANDEJÁRAPE – Motivación a lecturas.

Profeta Joel ñanemokyre’y jajevy haguã Ñandejára gotyo. Ñande Ru ipy’aporãva
nañanenupãmo’ãi ñane rembiapovaikuére.

San Pablo he’i ko’agaite voi ñañemboja va’erãha Ñandejára rendápe, ani jaheja
uperirerã. Ko’ãgahína ha’e ou ñane rendápe ñandesalva haguã.

Jesús ñanembo’e natekotevẽiha jaguerosapukái ha ñamombe’u umi mba’eporã
jajapóva. Ñandejárante toikuaa. Ha’e omyengoviáne ñandéve.

LECTURA PETEÎHA:
Ko’ága ñahendúta Tupã Ñandejára ñe’ẽ Joel arandukápe oĩ háicha 2, 12-18

Ñandejára he’i kóicha: “Peju jevy che ndive pende py’a ite guive. Peajuna, pesapukái, pejahe’o!”
Pejevy Tupã pende Járape. Pemondoro pende py’a, ani pende ao! Ñandejára niko ipy’a kyrỹi ha oporoporiahuvereko, ndaipochykuaái.

Ha’e niko mborayhu meme, opa ára oĩ oporombyasy haguãicha. Ikatu mba’éko na pene nupãi ha pende rovasa, ome’ẽ peẽme trígo ha vino peikuave’ẽ haguã ichupe. Pembopu turu yvyty Siónpe! Pemyerakuã karu’ỹ, peporohenói aty guasurã.

Pembyaty opavavépe ha pejapo aty guasu, pembyaty tuja, mitã ha mitã kambu. Omenda ramóva jepe tosẽ ikotýgui.
Tojahe’o pa’ikuéra Ñandejára rembiguái korapy ha altar pa’ũme, ha te’i:

“Eiporiahuvereko kena ore Jára ne retã guápe, ani reheja avave oñembohory ore rehe. Ani reheja tetãnguéra ore rereko ipo guýpe, ha umi tupã gua’u rehe ojeroviáva he’i oréve: “Mamo piko oĩ Tupã pende Jára?”
Upérõ Ñandejára ohechauka imborayhu ha oiporiahuvereko hetã guápe.

Tupã Ñandejára Ñe’ẽ.

SALMO ÑEMBOHOVÁI 50, 3-6a. 12-14. 17

Opavave: Che poriahuverekomíkena Ñandejára.

Ñandejára, che poriahuvereko,
nde niko nemba’e porã.
Che poriahuvereko ha eipe’a che árigui che rembiapo vaikue.
Che johéi porã teko vaígui,
che mopotĩ che angaipágui. O.

Ahecha kuaa niko ajavyha,
ha mba’e vaígui ndaikatúi apoi.
Nde rehe añónte ajapo ivaíva
ha ajapo ivaíva nde resa renondépe. O.
Ñandejára, embopyahu che rekove ha ta imara’ỹ,
che py’a to ñembopyahu ha ta imbarete.
Ani che mosẽ ne renondégui,
térã reipe’a che hegui nde pytu marangatu. O.
Embopyahu jevy chéve vy’a añandúva
ajejopy vaihágui che renohẽvo,
ha nde pu’aka marangatu ta che mombarete.
Tupã, che juru eipe’a ha ndéve rogueropurahéine. O.

SEGUNDA LECTURA:
Ñahendúta Tupã Ñandejára Ñe’ẽ San Pablo ohai va’ekue Corintos guápe 2 Cor 5, 20 – 6, 2

Che pehenguẽkuéra: Ore hína, aipórõ, Cristo rembijokuái, he’ise, Ñandejára voi ojerureha upéva ore rupi.
Aipórõ, Cristo rérape rojerure peẽme peiko porã jevy haguã Ñandejára ndive.
Cristo ndojapói va’ekue mba’eve ivaíva, opáichavo ñande rayhupápe Ñandejára

oguereko va’ekue ichupe iñangaipáva ramo, jahupity haguã teko marangatu Ñande-
jára ome’ẽva Cristo rupi.

Néi, ore romba’apóva Ñandejárape guarã, rojerure peẽme ani haguã pembohasa rei
upe py’a porã Ñandejára ohechauka va’ekue. Ha’e he’i Ikuatiañe’ẽ Ñe’ẽme: “Ou porãrõ guare ndéve rohendu va’ekue, ha ho’a vaírõ guare ndéve roipytyvõ va’ekue.”
Ko’ágã hína pe ñepytyvõha ára, ikatu haguã oñesẽ jejopy vaígui.

Tupã Ñandejára Ñe’ẽ.

RESPONSORIO Cf. Sal 94. 8a. 7d
Ani pemohatã pene korasõ, pehendu uvei Tupã Ñandejára ñe’ẽ.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha. 6, 1-6. 16-18

Upe ramo Jesús he’i idisípulo kuérape: Pejapo ramo oimeraẽ mba’e pemomba’e guasu haguã Ñandejárape, ani pejapótei opavave rovake pejechauka haguã.

Péicha pejapórõ, pende Ru yvagapegua nomyengovia mo’ãi peẽme mba’eve. Pévare, peipytyvõrõ oikotevẽvape, ani pemyerakuã opa rupi ojapoháicha umi hova

mokõiva, tupaópe térã okápe. Ha’e kuéra niko péicha ojapo oñeñe’ẽ porã haguãnte hesekuéra. Añete ha’e peẽme, chupekuéra niko oñemyengoviapáma voi pe oñemyengovia vaerã. Peipytyvõ ramo oikotevẽvape, ani peheja oikuaa pende rapicha pehayhuvévante jepe. Kirirĩhámente pejapo. Ha péicha, pende Ru ohecháva upe kirirĩháme pejapóva, omyengoviáta peẽme pene rembiapokue.

Peñembo’e jave, ani peñembo’e umi hova mokõivaicha. Umíva niko oñembo’y joa oñembo’e haguã, taha’e tupaópe térã umi okáre, ojehechauka haguãnte

opavavépe. Añete ha’e peẽme, chupe kuéra niko oñemyengoviapáma pe oñemyengovia vaerã. Peñembo’éta vove katu, peike pende kotýpe, pemboty pene rokẽ, ha pene año peñembo’e pende Rúpe. Ha pende Ru ohecháva mba’épa pejapo pene añoháme, omyengoviáta peẽme pene rembiapokue.

Pejapo jave ajúno, ani peñembohovasy gua’u umi hova mokõivaicha. Umíva niko péicha ojapo ohechauka haguãnte o’ajunaha hína. Añete ha’e peẽme, chupe kuéra niko oñemyengoviapáma voi pe oñemyengovia va’erã.

Pe’ajuna jave katu, pejovahéi ha peñakãkarãi, ani haguã avave ohecha kuaa pe’ajunaha hína. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omyengoviáta ndéve ne rembiapokue.

Ñandejára Jesucristo Ñe’ẽ.