LECTURAS: ÑANDEJÁRA HESUKRÍSTO ÑEMONGARAI

LECTURAS: ÑANDEJÁRA HESUKRÍSTO ÑEMONGARAI

LECTURA PETEÏHA

Ko’ágã ñahendúta Tupã Ñandejára ñe’ẽ Isaías arandukápe oĩ háicha 55, 1-11

“Opa pende yuhéiva peju pey’u. Pende viru’ỹva peju, reínte to ñeme’ẽ peëme trígo. Toñeme’ẽ avei kamby ha kaguy, pehepy me’ẽ’ỹ rehe.

Ma’erã piko peme’ẽta viru ndaha’éi ramo tembi’u rehe, ha pene rembiapokue repy, na pene mohyvatã mo’ãiva rehe?
Pejapo ha’éva ha pekaru porãta, pe’úta umi mba’e hevéva.

Peju che rendápe ha pejapysaka, pe che rendu ha peikovéta. Ajapóta pene ndive ñe’ẽ me’ẽ opa árape guarãva, ambyajévo péicha umi mborayhu ñe’ẽ ame’ẽ va’ekue Davídpe.

Che amoĩ ichupe mba’e rechaha ha mba’e renduha ramo tetãnguéra peguarã. Huvicha ha heko mbo’eha ramo.

Nde remboatýta tetãgua reikuaa’ỹvape ha pya’e oúta ne rendápe, che, Tupã nde Jára, Israelgua marangatúva, rombojerovia hague rehe.

Peheka Tupã Ñandejárape ikatu aja pejuhu ichupe, pehenói ichupe hi’aguĩ jave. Iñañáva to heja hápe vai, mba’e vai apoha anive oguereko iñakãme ivaíva. Pejere Taupä Ñandejára gotyo, ha’e pende poriahuverekóta, pejere Tupä Ñandejára gotyo, ha’e niko ipojera oheja rei haguã ñandéve ñane angaipa.

Che remiandu nda ha’éi pene remiandúicha ha pende rape ndaha’éi che rapéicha, he’i Tupã Ñandejára.

Yvága oĩ háicha yvate yvýgui, péicha che rape ijyvateve pende rapégui ha che remiandu pene remiandúgui. Ama ha y rypy’a oguejy háicha yvágagui ha ndojevýi, omohe’õ mboyve yvy, heñói haguã mba’e ra’ỹ oñemitỹvape ha oĩ haguã tembi’u okarúvape guarã.

Péichata pe ñe’ẽ osẽva che jurúgui, ndojevy mo’ãi che rendápe, ojapo’ỹ rehe che rembipota, ha oikopa pe che ha’e va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI Is. 12, 2-4bcd. 5-6
Opavave: Y penohẽta vy’a pópe ykua ñane pysyrövagui.

Ha’e hína Tupã Ñandejára, jejopy vaígui che pe’áva, hese ajerovia ha ndakyhyjéi.
Che Jára che mo’ã ha che mombarete, opa mba’e vaígui che pe’a O.

Pemboaguyje Tupã Ñandejárape, héra pehenói. Peikuaauka tetãnguérape imba’e mombe’upyrã, perosapukái héra jojaha’ỹ. O.

Pepurahéi Tupã Ñandejárape, ojapo hague rehe mba’e ndaijojaháiva, ha opa rupiete
pemoerakuã. Pesapukái vy’águi Siongua: Tuicha itégui pende apytépe Israelgua Imarangatúva!” O.

LECTURA MOKÖIHA:
Ñahendúta Tupã Ñandejára Ñe’ẽ San Juan aranduka peteĩ hápe oi háicha 5, 1-9

Opa ogueroviáva Jesús ha’eha pe Cristo, umíva Tupã Ñandejára ra’y hína, ha pe ohayhúva peteï túvape ohayhu avei upe túva ra’ykuérape. Jahayhu ramo Tupã Ñandejára pe ha jajapo ha’e oipotáva, jaikuaa jahayhuha avei Tupã Ñandejára ra’ykuérape.

Jahayhu Tupä Ñandejára pe he’ise jajapo hembiapoukapy, ha hembiapoukapy ndaha’éi mba’e pohýi, opa Tupä Ñandejára ra’ýva niko ipu’aka yvypóra reko rehe, ha upe ñande jaroviáva rupi, ñande pu’aka yvypóra reko rehe. Upe ogueroviáva Jesús Tupä Ñandejára Ra’yha, ipu’aka yvypóra reko rehe.

Jesucrísto jeju ko yvy ári ojechauka va’ekue y ha tuguýpe. Ndaha’éi ýpente, y ha tuguýpe uvei. Pe Espíritu voi oikuaauka kóva ha Espíritu hína añete. Oĩ mbohapy oikuaaukáva ko mba’e: Espíritu, y ha tuguy ha mbohapyve oĩ oñoñe’ẽme.

Jarovia umi mba’e yvypóra he’íva, upe Tupä Ñandejára he’íva katu heroviapyve, ha’e oikuaaukágui Ta’ýra reheguáva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 1, 29

Aleluia
Upe ára ambuépe, Juan ohecha Jesús oñembojaha ohóvo hendápe, ha he’i: “Péina ápe, Tupã Ñandejára ovecha ra’y oheja reíva iñangaipa opavavépe ko yvy ári.
Aleluia

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 1, 7-11
Opavave: Romomba’e guasu ndéve, Ñandejára.

Upe ramo Juan Bautista he’i oñemo ñe’ẽvo: “Che rire oúta peteï ipokatuvéva che hegui, chéve ndaijáiva ajayvývo henondépe ajorávo ichupe ipy rehegua sãnte jepe. Che pomongarai va’ekue ýpe. Ha’e katu pene mongaraíta Espíritu Sántope”.

Umi árape Jesús osẽ táva Nazaret, Galileágui. Ha Juan omongarai ichupe ysyry Jordánpe. Osẽvo pe ýgui, Jesús ohecha yvága ojepe’a ha Espíritu Santo oguejýva hi’ári pykasúicha. Ha oñehendu peteï oñe’ẽva yvágagui, ha he’íva: “Nde hína che ra’y ahayhúva, che aiporavo va’ekue”.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.