LECTURAS SÁBADO DECIMOTERCERA SEMANA

LECTURAS SÁBADO DECIMOTERCERA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽAmos arandukápe oĩ háicha 9, 11-15

Péicha he’i Tupã Ñandejára: “Amopu’ã jevýta David róga ho’apa va’ekue , ambotýta ipa’ũ nguéra ha ambopyahu jevýta yma guaréicha, oñemomba’e haguã Edom rembyrére ha opa umi tetã che mba’ekuére.”

Tupã Ñandejára he’i péicha ha ojapóta upe he’íva. “Oúta hína ára, upe trígo omono’õva rapykuéri, oútama upe yvy ombojeréva, ha parral águi ojejapopa mboyve vino, oñepyrũ jevýta ma upe ñemitỹ. Yvytykuéragui osyrýta vino pyahu, ha ysyrýicha ichuguikuéra oguejýta.

Upérõ aru jevýta tetã mombyrýgui che retã Israel guápe. Itávakuéra ojeitypa va’ekue omopu’ã jevýta , upépe oiko haguã. Iparralty oñotÿta ha ho’úta hykuere, ikokuépe oñemitỹta ha ho’úta hi’a. Amohenda jevýta ichupekuéra ijyvy teépe ha ndojehapo’ói chéne araka’eve upe yvýgui che ame’ẽ va’ekue ichupekuéra.” Tupã Ñandejára he’i péicha!

Tupã Ñandejára Ñe’ẽ.

SALMO ÑEMBOHOVÁI 84, 9. 11-14

Opavave: Tupã Ñandejára ome’ẽta ñandéve py’a guapy

Ajapysakáta Tupã Ñandejára he’ívare,
Ha’e he’i ome’ẽtaha py’aguapy hetãme ha umi hese
ojeroviávape anive haguã ojavy hikuái. O.

Mborayhu ha añete oñuguãitĩne, py’aguapy ha teko joja oñoañuáne;
añete heñóine upe yvýgui, ha teko joja yvágagui oma’ẽne. O.

Tupã Ñandejára, ha’ete voi ome’ẽta ñandéve iporãva, ha ko ñande yvy ome’ẽta hi’a.
Teko joja ohóne henonderã, ombosako’ívo ichupe haperã. O.

ALELUIA Jn 10, 27

Aleluia.
Tupä Ñandejára he’i:
“Che ovechakuéra ohendu che ñe’ẽ,
Che aikuaa ichupekuéra ha ha’ekuéra oho che rapykuéri.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 9, 14-17

Upe ramo Juan Bautista remimbo’e kuéra oñemboja Jesús rendápe, ha oporandu ichupe: Fariséokuéra ha ore ave, niko rohasa jepi ára ro’u’ỹre mba’eve. Mba’ére piko ne remimbo’ekuéra nda upéichai?

Jesús he’i ichupekuéra: Peẽ piko peimo’ã peteĩ omenda ramóva irũ nguéra oñembyasytaha ha’e oĩ aja hendivekuéra imendahápe? Nahániri. Ãgante oguahẽne ára ipore’ỹvo ha’e, ha upépe katu ohasáne ho’u’ỹre mba’eve.

Avave niko nombovyvýi ao pehẽngue pyahu ao tujáre. Pe ipyahúva oñyñýine ha omondoro jevýne pe itujáva, ha upekuévo omondoro tuichave. Vino pyahu niko noñembohyrúi vino ryru tujápe. Péicha ojejapórõ umi vino ryru osoróne ha oñehundíta pe vino ha umi hyru. Upévare, vino oñembohyru va’erã vino ryru pyahúpe, ha péicha mokõivéva oiko aréta oñemboai’ỹre.

Ñandejára Jesucristo Ñe’ẽ