LECTURAS VIERNES 7º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 6, 5-17

Reñemongeta kuaa ramo reporomboatýta nde jehe ha reñe’ẽ porã ramo rejererohorýta.
Taheta ne momaiteíva, nde reko mbo’éva katu ta peteĩnte.
Rejuhúrõ ne irũ teerã, eñeha’ã eikuaa porã raẽ ha ani pya’e eterei rejepokuaa hese.

Oĩ niko ne moirũva ou porã ramo ichupe, ha hese reikotevẽ ramo mamove nderejuhúi.
Oĩ irũ tee nde rehe oñemoĩva, ha ne motĩ haguã omombe’u, mba’érepa pejoavy.
Oĩ ne moirũva karuhápe, ha ho’a vaívo ndéve nderehechavéi ichupe. Ndéve ou porã aja oĩta nendive, ha ho’a vaívo ndéve nde rejáta.

Ojehu vai ramo ndéve, mba’eve ndoikuaase mo’ãvéi ha okañýta nde hegui.
Ejei nde rehe ija’e’ỹvagui ha eiko pyrũ kuaápe nde rayhúva ndive. Peteĩ irũ tee jeroviaha, upéva hína mo’ãha jaiko haguã kyhyje’ỹre.
Ojuhúva péichagua, ojuhu pláta yvyguy.

Peteĩ irũ tee jeroviaha, mba’e jajogua’ỹva hína, ndaikatúi jaikuaa pehepykue.
Peteĩ irũ tee jeroviaha, po’a reruha hína, Tupä Ñandejárape omboajéva ojuhúta katu ete.
Tupä Ñandejárape omboajéva, oiko kuaa iñirũ tee ndive.
Hembiapokue niko iporã iñirũ rembiapo kuéicha.

Tupã Ñandejára Ñe’ẽ.

SALMO ÑEMBOHOVÁI 118, 12. 16. 18. 27. 34-35

Opavave: Che resape’a ikatu haguã ahecha iporã iteha umi ne rembiapoukapy.

Nde niko tuicha mba’e hína ore Jára,
ehechauka chéve ne rembipota.
Ne rembiapoukapy che mbovy’a,
ne ñe’ẽgui nda che resarái chéne. O.

Che resape’a ikatu haguã ahecha
iporã iteha umi ne rembiapoukapy.
Che moarandu ne rembiapoukapýpe
amomba’e haguã umi mba’e hechapyrãva rejapo va’ekue. O.

Che mbo’e umi ne rembiapoukapy,
che py’a ite guive ajapo haguã upe he’i háicha.
Che mboguata ne rembiapoukapy rapére,
upéva chéve che mbovy’a. O.

ALELUIA Cf. Jn 17, 17ba

Aleluia.
Ne ñe’ë Tupä Ñandejára hína añete,
ore momarangatu pe añetépe.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 10, 1-12

Upe ramo Jesús oho Judea gotyo upe yvy Jordángui kuarahy resẽ gotyo guápe. Upépe ijaty jevy hese heta eterei ha oñepyrũ jevy ombo’e ichupekuéra jepi guáicha. Oĩ fariséokuérava, oñembojáva Jesús rehe omoñuhã haguã ichupe, ha oporandu ichupe, peteĩ ménapa ikatu opoi hembirekógui.

Ha’e he’i ichupekuéra: Mba’épa he’i raka’e peẽme Moisés?

Ha’ekuéra he’i: Moisés rembiapoukapýpe he’i peteĩ kuimba’e ikatuha opoi hembirekógui ome’ẽ guive ichupe kuatia jueja rehegua?

Upérõ Jesús he’i ichupe kuéra: Pende py’a hatã guinte Moisés oheja va’ekue peẽme pepoi pene rembirekógui. Iñepyrũmbýpe katu Tupã Ñandejára ojapo va’ekue kuimba’e ha kuñáme. “Upévare pe kuimba’e oheja va’erã itúva ha isýpe, ojoaju haguã hembireko ndive, ha oiko mokõivégui peteĩ.”

Péicharõ, upe guive ha’ekuéra ndaha’e véima mokõi yvypóra, peteĩntema. Upévare yvypóra ndoipe’ái va’erã ojuehegui umi Tupã Ñandejára ombojoaju va’ekue.

Oĩmarõ hikuái hógape, hemimbo’e kuéra oporandu jevy ichupe kóvare.

Jesús he’i ichupe kuéra: Oimeraëva opoírõ hembirekógui ha omenda ambuére, omoakãratĩ hembirekópe. Peteĩ kuña opoírõ iménagui ha upéi omenda jevy, ha’e ave oporomoakãratĩ hína.

Ñandejára Jesucristo Ñe’ẽ