LECTURAS VIERNES VIGÉSIMO TERCERO SEMANA

LECTURAS VIERNES VIGÉSIMO TERCERO SEMANA

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 9, 16-19. 22b-27

Che pehẽnguekuéra: Che ndarekói mba’érepa ajejapo haguã, aiko haguére amoherakuã ko marandu porã, ahechágui upevaha che rembiaporã ikatu’ỹva aheja. Ha ta jererekóke namoherakuãi ramo!

Upévare, che jeheguínte ajapo ramo, ajerure va’erã mo’ã che rembiapo repykue. Ha ajapo ramo ajapo va’erãgui katu, upéva, ajapógui hína Tupã rembiapoukapy. Aipo ramo, che rembiapo rekovia hína pe vy’a ahasáva, amoherakuã haguére pe marandu porã ojehepyme’ẽ’ỹre chéve, he’ise, ajerure’ỹre pe oñeme’ẽ va’erã chéve amoherakuã haguére pe marandu.

Ndaha’éi ramo jepe avave rembiguái, aiko opavave rembiguái ramo, ikatu haguã agueru heta hetave yvypóra Crístope. Aime ramo guare umi heko jeroviaha ikangýva ndive, che kangy va’ekue avei peteẽ ha’e kuérava ramo guáicha, agueru haguã avei che ndive. He’ise, aiko hague opavave oiko háicha, ikatu haguã aipysyrõ mbovymíme jepe. Opa mba’e ajapóva, ajapo pe marandu porãre, areko haguã avei pype che mba’éva.

Peẽ peikuaa, peteĩ oñeñaniháme, maymáva oñaniha, ha peteĩmente ojehepyme’ẽ. Néi, peñani avei peẽ pehupity haguãicha upe jehepyme’ẽ. Umi oñembosako’íva oñua’ã haguã mávapa ikatupyryve, ojeheja opa mba’e ombyai va’erã ichupekuéragui. Ha upéva ojapo ohupity haguã iñakã mbojeguaharã ipiru va’erãva. Ñande katu, jahupity haguã peteĩ ipiru’ỹva.

Che ramo, nañaníri pytũmbýpe ha nañorairõi ainupã ramo guáicha yvytu. Upéva rangue, ainupã che rete ha ajopy ojapo haguã che aipotáva, apyta’ỹ haguã che voi mba’eve reípe, aiko rire ambo’e ambuekuérape.

Tupã Ñandejára Ñe’ẽ.

SALMO ÑEMBOHOVÁI 83, 3-6. 12

Opavave: Ovy’aite va’erãpa umi nde rógape oikóva

Che py’aite guive che ãho
nde tupao róga guýre.
Che py’a ite guive hi’ãnte
chéve apurahéi Tupã Ñandejára oikovévape. O.

Guyra’i jepe ojuhu hogarã,
ha mbyju’i ojaitypo haguã,
nde altar ypy rupi oja haguãme hupi’a,
Tupã Ñandejára, opa mba’e jára, Tupã, che ruvicha guasu. O.

Ovy’aite va’erãpa umi nde rógape
oikóva ha opa ára nde reropurahéiva!
Ovy’a ite va’erãpa umi nde pype ojuhúva pytyvõ
oñepyrũvo oguata nde rape rupi. O.

Imbaretevéne ohóvo hikuái, Ñandejára niko kuarahýicha
ñande resape ha oñangareko ñande rehe.
Ha’e ñande rayhu, ñane mbojerovia
ha ohovasa mayma heko porãvape. O.

ALELUIA Cf. Jn 17, 17ba

Aleluia.
Ne ñe’ẽ Tupã Ñandejára anetegua; ore momarangatumi upe añeteguápe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 6, 37-42

Upe ramo Jesús omombe’úvo ichupekuéra ko ñe’ẽ mbojoja: “Peteĩ ohecha’ỹva nga’u piko ikatu omboguata ambue ohecha’ỹvape? Ndo’a mo’ãi nga’úpa mokõivéva peteĩ yvykuápe?

Ndaipóri temimbo’e mba’e guasuvéva imbo’eháragui. Ojehekombo’e porã marõ ae ohupitýne imbo’ehárape. Mba’éicha piko rehecha pe yvyra ku’i nde ryvy resápe oíva, ha nderehechái pe yvyra poguasu nde resápe voi rerekóva? Ha nderehecháirõ pe yvyra poguasu oĩva nde resápe voi, mba’éicha piko nde py’a ere haguã nde ryvýpe: ‘Che ryvy, taipe’a ndéve pe yvyra ku’i nde resápe oĩva’. Nde, tekove rova mokõi! Eipe’a raẽ pe yvyra poguasu nde resápe oĩva rehecha porã haguã, ha upéi reipe’a haguã pe yvyra ku’i nde ryvy reságui.”

Ñandejára Jesucristo Ñe’ẽ