LUNES 19 DE AGOSTO

LECTURAS DEL LUNES 19 DE AGOSTO 

PRIMERA LECTURA

Ko’ágä   ñahendúta Tupã Ñandejára ñe’ẽ Jueces arandukápe oĩ háicha 

                                                                                                                                             2, 11-19

Israelita kuéra ojapo ivaíva Tupã Ñandejára renondépe ha omomba’e guasu hikuái tupã gua’u kuéra. Omboyke hikuái Tupã Ñandejárape, túva kuéra Jára, Egíptogui oguenohẽ va’ekue ichupe kuéra. Omomba’e hikuái ambue tupã. Umi tetã Israel jerére oĩva tupã nguéra omomba’e ha oitupaitũ ichupe kuéra. Upéichape Tupãme ombopochy. Omboyke Tupã Ñandejárape ha omomba’e Baal ha Aserápe. 

Ha Tupã Ñandejára ipochy hendy Israel ndive ha oheja ichupe kuéra ho’a mondaha pópe ha umíva omondapa ichupe kuéra. Oity avei ichupe kuéra umi hese kuéra ija’e’ỹva pópe ijere rupi oikóva ha ndaipu’akavéi hese kuéra. Mamo ohohápe oñorairõ haguã, Tupã Ñandejára po oity hi’ári kuéra mba’e vai. Upéicha voi he’i va’ekue  ichupe kuéra ojapotaha. Jepe vaípe ojehecha hikuái, Tupã Ñandejáara omopu’ã ijapytépe kuéra mburuvicha oguenohẽva ichupe kuéra umi ojopy vaíva po guýgui. Nohendúinte avei hikuái huvicha kuérape. Oiko katu hikuái ambue tupã omomba’e ha umívape oitupaitũ Voi opia hikuái túva kuéra rapégui. Umíva niko iñe’ẽrendu va’ekue  Tupã Ñandejárape; ko’ãva katu nahániri. 

Tupã Ñandejára omopu’ã vove peteĩ mburuvicha ha’e oĩva upéva ndive. Ha oguenohẽ Israel ñemoñarépe umi hese kuéra ija’e’ỹva ha ojopy vaíva po guýgui upe mburuvicha oikove aja. Ojejopy vaígui ipyahẽ hikuái ha Tupã Ñandejára oiporiahuvereko ichupe kuéra. Omano vove upe mburuvicha katu oho jevýma hembiapo vaípe ha upe ojapóva ivaive umi mba’e túva kuéra ojapo va’ekuégui. Omomba’e guasu ha otupaitũ hikuái ambue Tupã. Ndohejái hembiapo vai ndohecha kuaaséi ojavyha.

Tupã Ñandejára Ñe’ẽ.

SALMO ÑEMBOHOVÁI          105, 34-37. 39-40. 43ab. 44

R. Tupä Ñandejára aníkena nde resarái chehegui.

Nohundíri hikuái tetã nguéra, 

Tupä Ñandejára he’i haguéicha ojejapo haguã. 

Ojehe’a hikuái ambue tetãgua

rehe ha ojapo ha’e kuéra ojapóva. R.

Omomba’e guasu hikuái ita’ãnga kuéra,

ha upéva oity ichupe kuéra ñuhãme. 

Ojuka ha oikuave’ẽ añáme 

ta’ýra ha tajýra kuéra. R.

Kuña reko vaícha oñemongy’a 

ha itujupa hembiapo vaikuépe. 

Tupä Ñandejára ipochy hetãgua ndive, 

ha ojeguaru umi imba’e teévagui. R.

Tupä Ñandejára oguenohẽ mante ichupe kuéra jejopy vaígui, 

ha’e kuéra katu iñakã rehénte oikose, 

ha oñemohatãve hembiapo vaípe. 

Tupã ohechávo ohasa asyha hikuái ha ohendúvo ipyahẽha. R.

ALELUIA.       Mt 5, 3

Aleluia. 

Ovy’a va’erä umi hi’ánga heko mboriahúva,

imba’e kuérarä Tupä Ñandejára sambyhy yvágape. 

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                             

19, 16-22

Upe ramo peteĩ karia’y oguahẽ Jesús rendápe ha oporandu ichupe: Mbo’ehára, mba’e iporãvapa ajapo va’erã ahupity haguã jeikove opave’ỹva?

Jesús he’i ichupe: Mba’éicha rupi piko reporandu chéve mba’épa hína pe iporãva? Tupã Ñandejára rehe añónte niko ikatu ja’e upéva. Ha reikovese ramo, ejapo Tupã Ñandejára rembiapoukapy he’íva. 

Pe karia’y he’i ichupe: Mava itévapa? 

Ha Jesús he’i ichupe: Ani reporojuka, ani reporomoakã ratĩ, ani remonda, ani eñe’ẽ rei nde rapicháre, emomba’e nde ru ha nde sýpe, ha ehayhu nde rapichápe rejehayhu háicha nde. 

Pe karia’y he’i ichupe: Opa umíva niko ajapopáma. Mba’éiko ajapove va’erã? 

Jesús he’i ichupe: Nde reko porãse ramo Tupã Ñandejára oipota háicha, tereho eñemumba opa rerekóvare ha eme’ẽ mboriahúpe. Péicharõ rerekóta mba’eta yvágape. Upéi, eju che moirũ. 

Pe karia’y ohendúvo upéva, tuicha ñembyasýpe oho, heta mba’e oguerekógui. 

Ñandejára Jesucristo Ñe’ẽ.