LUNES 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Tobías arandukápe oĩ háicha    1, 3; 2, 1b-8

Che, Tobit, aiko va’ekue tape porã rehe ha che rekojoja va’ekue Opa ite ára. Ame’ẽ heta tupãmba’e che pehẽnguekuérape ha umi che tavaguápe oñemosẽ va’ekue che javeve roñemondopa ramoguare asiriokuéra retãme.

Romboarete Pentekostés, ojeheróva avei arete 7 Semána rehegua, ojejapo che rérape karu guasu ha aguapy upe mesápe akaru haguã. Oñemoĩ porãiterei upe mesa ha ojegueru chéve opaichagua tembi’u.

Upéma ramo ha’e che ra’y Tobíaspe: “Che ra’y, tereho eheka ambue Israelgua imboriahúvape, umi ojegueru va’ekue tembiguái ramo Nínivepe, ha ojeroviáva Tupã Ñandejárare ipy’a ite guive, ha ere ichupe tou tokaru ñane ndive. Che roha’arõta che ra’y reju peve.”

Tobías oho ojapo che ha’e haguéicha ichupe. Upéi ou, ha che renói: Taita.

Aporandu ichupe: Mba’éiko ojehu ndéve che ra’y?.

He’i chéve ha’e: Oĩ peteĩ ñane retãgua ojejuvy ramóva oñeñemuha rokápe, ha hetekue ojepyso hína pe yvýpe.

Ha’u’ỹre mba’eve pya’e aha upépe, agueraha che rapicha re’õngue ha aheja peteĩ kotýpe, pytũ vove añotỹ haguã. Upéi aju jevy che rógape. Ajahu ha upéi aguapy akaru tuicha ñembyasy reheve.

Ha upépe che mandu’a he’i va’ekuére maranduhára Amós oñe’ẽvo Betel rehe kóicha: Hekoviáta ichupe kuéra vy’a guasu, tasẽre ha purahéi ñembyasýre”.

Ha upépe añepyrũ che rasẽ. Oguahẽvo pyhare aha, ajo’o peteĩ yvykua ha añotỹ upe che rapicha retekue. Che róga ykeregua kuéra opukapa che rehe ha he’i: “Akokueheve ojehekáma voi ichupe ojejuka haguã, ojapo haguére ko’ã mba’e. Upérõ okañýnte. Upéichave ramo jepe ndokyhyjéi! Péina pépe, oñotỹ jevýma omano va’ekue.”

Upe pyharépe ajahu porã, asẽ ha añeno ake haguã korapy jere yvate ykére pe okápe. Che akã ndajaho’íri mbyry’áigui.

Tupã Ñandejára Ñe’ẽ.

SALMO ÑEMBOHOVÁI   111, 1-6

Opavave: To vy’a upe omomba’éva Tupä Ñandejárape.

Ovy’a upe omomba’éva Tupã Ñandejárape, ha ipy’a rory ojapóvo hembiapoukapy.

Iñemoñare imbareténe ko yvy ári, heko potĩva ra’ykuéra ojehovasáne. O.

Hógape oïta mba’ereta ha mba’erepýva, imba’e porãngue oikóta opa áraite.

Umi heko jojávape ohesape pytümbyhápe:

Péva Imba’e porã, oporiahuvereko ha Heko jojáva. O.

Ovy’a upe ipy’aite guive oiporukáva hapichápe, ha opa oguerekóva ogueroguata hekópe.

Heko jojáva ndojecha vai chéne, opa ára oikóne hese mandu’a. O.

ALELUIA Cf. Ap 1, 5ab

Aleluia.

Ñandejára Jesucristo nde niko hechapyre hekopeguáva; 

pe oikove jevy ypýva omanóva apytégui, nde ruguy rehe ae.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha                                                          12, 1-12

Upérõ Jesús oñe’ẽ umi Moisés rembiapoukapy mbo’eha ha pa’i ruvichakuérape  ñe’ẽ mbojoja rupi. He’i ichupekuéra: “Peteĩ karai oñotỹuka va’ekue peteĩ parralty ijyvýpe. Omongorapy ha upéi ojapouka oñeñami haguãme  umi parral a.

Omopu’ã avei peteĩ óga yvate, upégui oũ haguã omaña oñangarekóva ijyvýre. Upéi katu, oiporuka hepýre mba’apohára kuérape, ha oho mombyry.

Ha oguahẽvo ára parral a ojepo’o haguã, omondo peteĩ hembiguái umi mba’apohára rendápe ogueraha haguã ichupe upe imba’erãva. Ha’ekuéra katu ojeity hi’ári ha oinupã heta rire, omondo po nandi.

Upe marõ pe parralty jára omondo ambue hembiguáipe, kóvape katu oñakã joka ha oja’o heta hikuái. Pe karai katu omondo jevy ambuépe, kóvape katu ojuka hikuái.

Upéi omondo hetavépe, ha umívagui oĩ oñenupãva ha oĩ ojejukáva. Opyta gueteri ichupe peteĩ ita’ýra tee, ha’e ohayhu etéva. Ipahápe omondo ichupe, he’ívo ipy’apýpe: ‘Che ra’ýpe niko ojapóta mba’e ramo.’ Umi mba’apohára katu he’i ojupe: ‘Pévape opytapáta hína opa mba’e. Jajuka ha topyta ñandéve ko yvy.’ Ha ojeity hi’ári hikuái, ojuka ichupe ha oguenohẽ pe parraltýgui.

Mba’épa hi’ã peẽme ojapotaha pe yvy jára? Ohóta ojuka umi mba’apohárape ha ome’ẽta iparralty ambuépe. Peẽ niko peikuaa Tupã Ñandejára ñe’ẽ he’iha: Upe ita omboykéva umi óga mopu’ãhára upéva ári ko’ágä   oñemopu’ã. Tupã Ñandejára upéicha ojapo ha ore jurujái rohechávo.”

Ha omoakãsãse hikuái Jesúspe oikuaágui oiporu hague ñe’ẽ mbojoja hesekuéra. Okyhyjénte opavavégui, oguerekógui ichupe hikuái maranduhára ramo.

Ñandejára Jesucristo Ñe’ẽ