SOLEMNIDAD DE LA SANTÍSIMA TRINIDAD

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 4, 32-34. 39-40

Peheka umi ára yma guarépe, umi ára peẽ peikove ypy mboyve guarépe, peguahẽ meve upe árape Tupã ojapo ramo guare yvypóra yvy ári.

Peipyguara opa rupi ko yvy jerekuévo. Araka’e piko ojehu peteĩ mba’e peichagua?

Oĩ piko ohendúva peteĩ mba’e peichagua? Oĩ piko peteĩ tetã oikovéva Tupã oñe’ẽ rire ichupe tata apytégui peẽmeicha? Oĩ piko Tupã ohóva oiporavo peteĩ tetã, tetãnguéra apytégui?

Oĩ piko Tupã oporopy’a ra’ãva, ohechaukávo mba’e rechapyrã, oñorairõva oiporúvo pyapy mbarete ha oporo mongyhyjéva, Tupã Ñandejára ojapo haguéicha pene resa renondetépe Egíptope?

Pene mandu’áke ko mba’e rehe ha ani pende resarái araka’eve: Tupã Ñandejára
hína Tupã yvágape ha yvy ári. Ndaipóri ambue Tupã.

Pejapo hembiapoukapy ame’ẽva peẽme ko árape ha opa mba’e osẽ porãta peẽme
ha pene ñemoñarépe. Peikóta pe yvýpe Tupã Ñandejára peẽme ome’ẽva opa árape guarã.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 33, 4-6. 9. 18-20. 22

Opavave: Ovy’a upe tetã Ñandejára oiporavo va’ekue imba’e teerã.
O bien: Aleluia.

Upe Ñandejára he’íva niko añete, ha opa mba’e ojapo teko jeroviápe.
Ha’e ohecha ramo teko joja ha opa mba’e hendápe ojejapóva.
Yvy niko henyhẽ chovi imborayhúgui. O.

Ñandejára ñe’ẽ rupi yvága ojejapo, ha ipytu rupi opa mba’e yvága rehe oĩva.
Ha’e oñe’ẽ ha opa mba’e ojejapo, he’ínte ha opa mba’e oiko. O.

Tupã Ñandejára katu oñangareko umi ichupe omomba’évape
ha imborayhu rehe ojeroviávape. Umívape ha’e ndohejái omano.

Omoingove katu ichupekuéra ñembyahýi guasu ou jave. O.

Ñandejára rehe ore rojerovia. Ha’e upe ore pytyvõ ha oñangarekóva ore rehe.
Ñandejára, ne mborayhu ta ore añuãmba. Upéva roha’arõ nde hegui. O.

LECTURA MOKÔIHA:
Ñahendúta Tupã Ñandejára Ñe’ẽ San Pablo ohai va’ekue Roma guápe 8,14-17

Opa oñesãmbyhykáva Tupã Espíritu rehe, umíva Tupã ra’y. Peẽme niko noñeme’ẽi peteĩ Espíritu peiko haguã tembiguái ramo, pe’a jevy haguã kyhyjépe.

Upéva rangue katu pe Espíritu ojapo pende hegui Tupã ra’y. Kóva ko Espíritu rehe ja’e Tupãme: “Ha che Ru!” Ha upe Espíritu upéva voi ojoaju ñande Espíritu rehe ohechauka haguã, Tupã ra’ymaha ñande. Ha ñande ha’égui ita’ýra, jahupytýta avei Cristo ndive pe Tupã oguerekóvagui ichupe guarã, ha jahasa asy ramo Cristo ohasa asy haguéicha, ñaiméne avei hendive heko mimbipápe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Apoc 1,8
Aleluia.
“Che hína pe alfa ha pe oméga”, he’i Ñandejára, Tupã ipu’akapáva, pe oikovéva, oikove va’ekue ha oikove va’erãva.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Mateo omombe’u háicha

28, 16-20

Opavave: Romomba’e guasu ndéve, Ñandejára.

Upérõ umi 11 Jesús disípulo oho Galiléape, pe sérro Jesús he’i haguépe chupekuéra oho hag̃uáme. Ha ohechávo chupe, oñesũmba hikuái henondépe. Oĩ jepe ijapytépekuéra ndogueroviapáiva ha’eha Jesús pe ohecháva.

Jesús katu oñemboja hendápe kuéra ha he’i: — Opa mba’e yvága ha yvýpe oĩva niko Ñandejára omoĩmba che pópe. Tapeho aipo ramo opa tetã rupi, pembo’e opavavépe ha pejapo chuguikuéra che disípulo.

Pemongarai umíva Túva, Ta’ýra ha Espíritu Santo rérape, ha pembo’e chupekuéra opa umi mba’e che pombo’e vaekue peẽme. Peikuaáke aimetaha
pene ndive ára paha peve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.