LUNES DÉCIMA SEMANA

Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha    17, 1-6

Maranduhára Elías, Tisbé pegua, he’i Ajábpe: “Tupã Israel Jára che jokuáiva rérape ame’ẽ ndéve che ñe’ẽ, ko’ãva ko’ã áñope ndoky mo’ãi ha ndo’a mo’ãiha ysapy, che ha’e peve!”

Upévare Tupä Ñandejára he’i Elíaspe: “Tereho kuarahy resẽ gotyo ha ekañy ysyry Querit rembe’ýpe, oĩva y Jordángui kuarahy resẽ gotyo. Upépe ikatúta rey’u ysyrýpe ha ha’éma yryvukuérape ogueraha haguã ndéve ne rembi’urã.”

Elías ojapo Tupã Ñandejára he’íva ichupe ha oho oiko ysyry Querit rembe’ýpe, Jordángui kuarahy resẽ gotyo. Ha yryvukuéra ogueraha jepi ichupe mbujape ha so’o pyhareve ha ka’aru. Ha hoy’u ysyrýgui.

Tupã Ñandejára Ñe’ẽ.

SALMO ÑEMBOHOVÁI    120, 1-8

Opavave: Tupã Ñandejára ombou ñandéve opáichagua mba’e porã.

Umi yvytýre ajesaupi ha che py’a pýpe ha’e:

Máva piko che pytyvõta?

Tupã Ñandejára che pytyvõta, ha’e niko yvága ha yvy apohare. O.

Ha’e ndoheja mo’ãi ne pysyrýi.

Upe nde rehe oñangarekóva ndokéiva araka’eve.

Ndokéiva térã ndokevýiva upe Israel rehe oñangarekóva. O.

Tupã Ñandejára oñangarekóta nde rehe,

ha’e upe nde ypýpe oĩva ne pytyvõ haguã.

Árape kuarahy ndojapói chéne

nde rehe mba’eve térã jasy pyharekue. O.

Tupã Ñandejára ndoheja mo’ãi ojehu ndéve mba’eve ivaíva, ha’e oñangarekóta nde rehe.

Ha’e oñangarekóta nde rehe resẽvo reho haguã ha reguahẽvo,

ko’ágä  guive opa ára peve. O.

ALELUIA Mt 5, 12

Aleluia.

Pende rory ha pevy’áke, peẽme ojehepyme’ẽta haguére yvágape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha  4, 25-5, 12

Upe ramo Ñandejárape ohenduséva ha oikoséva iñe’ẽme ou va’ekue opa hendáguio, oĩ oúva Galiléagui, Jerusaléngui, Judéagui ha Transjordaníagui avei.

Ohechávo Jesús hetaha umi ijatýva, ojupi peteĩ yvytymíme ha upépe oguapy. Hemimbo’e kuéra oñemboaty ijerekuévo, ha Jesús oñepyrũ ombo’e ichupe kuéra he’ívo: “Ovy’a va’erã umi ohecha kuaáva imboriahuha ipy’apýpe, ichupe kuéra guarã hína ñesãmbyhy yvágagui oúva.

Ovy’a va’erã umi ohasa asýva, Tupã Ñandejára voi omoangapyhýta ichupekuéra.

Ovy’a va’erã umi ojejapo’ỹva, Tupã Ñandejára ome’ẽta ichupekuéra yvy imba’e teerã.

Ovy’a va’erã umi Tupã Ñandejára rembipotánte oipotáva ojehu, ha’e ome’ẽta ichupekuéra opa oikotevẽva.

Ovy’a va’erã umi oiporiahuverekóva hapichápe, Tupã Ñandejára oiporiahuverekóta ichupekuéra.

Ovy’a va’erã umi ipy’a potĩva, ha’e kuéra ohecháta Tupã Ñandejárape.

Ovy’a va’erã umi oporomoingo porãva, Tupã Ñandejára oguerekóta ichupekuéra ita’ýra ha itajýra ramo.

Ovy’a va’erã umi ohasa asýva Tupã Ñandejára rembipota ojapógui, ichupekuéra guarã hína ñesãmbyhy yvágagui oúva.

Pevy’a va’erã pejeja’o ha pehasa asy ramo, ha oje’e ramo pende rehe opa mba’e vai, che ndive peikógui. Pevy’a ha pende py’a rorýke, tuicha jopói oñeme’ẽtagui peẽme yvágape. Peẽicha avei, maranduhára kuéra ohasa asy va’ekue peẽ mboyve.”

Ñandejára Jesucristo Ñe’ẽ.