SÁBADO NOVENA SEMANA

SÁBADO NOVENA SEMANA

Ñahendúta Tupã Ñandejára Ñe’ẽ San Pablo ohai va’ekue Timotéope  

                        4, 1-8

Che Ra’y:

Tupã ha Cristo Jesús rérape, oútava Mburuvicha guasúicha ombojovake haguã oikove ha omanóvape, ajerure jevy jevy ndéve remosarambi haguã pe marandu porã. Emoherakuãke ijahápe ndéve ha ija’ỹháme avei. Eñe’ẽ opavavépe ku oguerovia añete haguãicha pe eréva, eñemoñe’ẽ ha mbegue mbeguépe eheko mbo’e ichupekuéra. Oguahẽta hína ára, ha avave nohenduse mo’ã véima mba’eve iporãva ichupe kuéra oñembo’éva.

Upéva rangue, oikóta iñakãre ha ombyatýta ijerére umi mbo’ehára ohendukáva ichupe kuéra umi ha’e kuéra ohendusévante. Ojeréta añeteguágui ha ogueroviáta výro rei. Nde katu, ne akã guapy ha eropu’aka va’erã jehasa asy oúva ndéve. Akóinteke emoherakuã pe marandu porã, ha ejapopa porã ne rembiapo Tupã Ñandejára rembiguái ramo reguerekóva.

Che katu aiméma ame’ẽ haguãicha che rekove Tupã Ñandejárape ikuave’ẽmby ramo. Hi’aguĩma ára amano haguã. Heko itépe niko añorairõ, ipaha ite peve añani, ha ndajeíri che jeroviágui. Ha ko’ágä  aha’arõ hína pe jeguaka Ñandejára Jesucristo, Mbojovakehára heko jojáva, omoĩtava che akãre pe árape, che reko potĩ haguére. Ha ndaha’e mo’ãi chéve añónte ome’ẽtava. Ome’ẽta avei opa umi ipy’a ite guive oha’arõvape ha’e ou jevy.

Tupã Ñandejára Ñe’ẽ.

SALMO ÑEMBOHOVÁI      70, 8-9. 14-15b. 16-17. 22)

R. Amoherakuãne ndénteha upe ome’eva tekove añeteha

Tupã Ñandeajára, che juru ne momba’e guasuha

ára pukukue ndéve romomba’e ha ha’e ndéve nde tuichaha.

Che tujávo ani che reja rei,

che kangývo ani nde resarái che hegui. R.

Opa árape amoherakuãne, nde ore renohẽha rojejopy vaihágui

ha reme’ẽha oréve teko joja.

Jepe ko’ã mba’e ndaijái che akãme. R.

Amoherakuãne nde añonteha upe nde rekojojáva.

Tupã Ñandejára, che mitãrusu guive niko

nde che reko mbo’e ha Ko’ágä  peve

amombe’u umi mba’e tuicha itende rejapo va’ekue. R.

Arpapu rorýpe romomba’e guasúne,

nde hína Tupã Ñandejára ijeroviapy.

Mbaraka púpe rogueropurahéine, nde hína Israélpe upe nde reko marangatúva. R.

ALELUIA Mt 5, 3

Aleluia.

Ovy’a ite umi heko mboriahúva,

imba’e kuérarä Tupä Ñandejára Sambyhy.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       12, 38- 44

Upe ramo Jesús oporombo’évo he’i jepi: “Peñe ñangarekóke umi Moisés rembiapoukapy mbo’eha kuéragui. Ha’e kuéra niko oikose ao puku reheve, ha oipota umi okaháre oñemomaitei ichupe kuéra karai guasúicha. Oĩ porãvetahápe oguapy karu guasuhápe, ha judío kuéra tupaópe. Ha oñembo’e puku gua’u oipe’apa haguã oguerekóva guive kuña imenave’ỹvagui. Ichupe kuéra oñenupã rasyvéta.”

Peteĩ jevy Jesús oguapy hína Tupaópe upe mba’e me’ẽha ryru rovái, ha ohecha mba’éichapa oñemoĩ pype viru. Mba’eta rerekua kuéra omoĩ heta heta. Oguahë sapy’a peteĩ kuña mboriahu imenave’ỹva, ha omoĩ mokõi viru pehẽnguemi.

Upérõ Jesús ohenói hemimbo’ekuérape ha he’i:

Ha’e peẽme ko kuña mboriahu imenave’ỹva ome’ẽ hetave hague opavavégui, opavave niko ome’ẽ upe hembývagui ichupe kuéra, ha’e katu, imboriahu pa’ũme, ome’ẽmba oguereko va’ekue okaru haguã.

Ñandejára Jesucristo Ñe’ẽ.