VIERNES NOVENA SEMANA

VIERNES NOVENA SEMANA

Ñahendúta Tupã Ñandejára Ñe’ẽ San Pablo ohai va’ekue Timotéope        

         3, 10-17

Che ra’y ahayhu etéva:

Nde katu Timoteo reikuaa porã umi mba’e che ambo’éva, mba’éichapa aiko, mba’épa pe ajaposéva ha mba’érehepa ajerovia. Rehendu mba’éichapa aropu’aka heta mba’e, mba’éichapa ahayhu che rapicha kuérape ha heta mba’e vai ahasa.

Reikuaa porã mba’éichapa Antioquía, Iconio ha Lístrape heta ajerereko asy ha heta ahasa asy. Vaípe niko umi rupi ajecha va’ekue. Ha opa umívagui Ñandejára che pe’a. Ha péichako, opa umi ojeroviáva Tupãre Cristo Jesús rupi, heta ojeguereko asýta. Ha umi ijapúva ha oikóvape oporombotavy, umívape oho vaivéta hína. Oporombotavy javeve, ha’e kuéra voi oñembotavy.

Nde katu aníke araka’eve rejei umi mba’e reikuaáva ha reroviávagui. Nde niko reikuaa porã mávapa ne mbo’e va’ekue. Ne mandu’áke ne mitã guive reikuaaha Tupä Ñandejára Ñe’ẽ. Reikuaa ikatuha ne moarandu ha ikatuha ne pysyrõ rejerovia ramo Cristo Jesús rehe.

Ñandejára Ñe’ẽ niko henyhẽ Tupã pu’akágui, ha iporã ñambo’e ha ñañe moñe’ẽ haguã ñande rapichápe, japoheko mbo’e ha japoromo arandu haguã hekopete. Upéicharõ, pe Tupã Ñandejárape omomba’e guasúva noikotevẽ mo’ãi mba’eve ojapo haguã opa mba’e iporãva.

Tupã Ñandejára Ñe’ẽ

SALMO ÑEMBOHOVÁI 

118, 157. 160-161. 165-166. 168

R. Tupä Ñandejárape ohauyhúva oguereko py’aguapy

Heta umi che rapykuéri oikóva ha ojopy vaíva che ndive,

ne rembiapoukapy katu che namboykéi.

Ne ñe’ẽ niko añete memete,

ne rembiapoukapy opa árape guarã. R.

Poguasu kuéra rei ete oko’i che rehe,

che katu ne ñe’ẽnte amomba’e che py’a ite guive.

Umi ne rembiapoukapy ohayhúva py’a guapýpe oiko,

ndaipóri mba’eve osẽ vaíva ichupekuéra. R.

Che Jára, arovia nde che nohẽtaha

jejopy vaígui ne rembiapoukapy ajapo aja aikóvo.

Ne rembiapoukapy ha ne rembipota

che ajapo, che reko nde reikuaa porã. R.

ALELUIA Jn 14, 23

Aleluia.

Ñandejára Jesucristo he’i:

“P e che rayhúva nomboyke mo’äi che ñe’ë,

che Ru ohayhúta ichupe ha rohóta hendápe”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       12, 35-37

Upe ramo Jesús oporombo’e hína Tupaópe ha oporandu: “Mba’ére piko Moisés rembiapoukapy mbo’eha he’i pe Mesías, David ñemoñareha? David voi niko, Espíritu Santo rupi he’i va’ekue:

 “Tupä he’i che Járape  ‘Eguapy che akatúa gotyo, ta moĩ ne pyenda ramo

umi nde rayhu’ỹva.’”

David voi niko he’i ichupe “Che Jára”? Mba’éicha piko aipórõ pe Mesías David ñemoñaréta?

Heta umi ijatýva upépe, ha oguerohory joa Jesús Ñe’ẽ.

Ñandejára Jesucristo Ñe’ẽ.