LUNES SEMANA XVI TO

Ko’ágä   ñahendúta Tupã Ñandejára ñe’ẽMiqueas arandukápe oĩ háicha               6, 1-4. 6-8

Pehendúke pe he’íva Tupä Ñandejára:

Epu’ã ha ere upe ereséva yvyty renondépe, ha umíva to hendu ne ñe’ẽ!

Pehendúke yvyty ha peẽ yvy pyenda.

Tupä Ñandejára ombohovakéta hetã guápe, hembiapo kuére Israel ndive ojoavy.

Péicha he’i Tupä Ñandejára: “Ere mína chéve, che retãgua, mba’e piko che ajapo nde rehe?

Mba’épe piko che rombopochy?

Egíptogui roguenohẽ va’ekue, tembiguái rekógui; amondo Moisés, Aarón ha Miriam, ha’e kuéra ne sãmbyhy haguã.

Mba’éichapa ikatúne añemboja Tupä Ñandejára rendápe?

Mba’éichapa ikatúne amomba’e guasu Tupã Ñandejára yvate oĩvape?

Ikatúne piko araha ichupe tóro hi’áño peteĩva, aikuave’ẽ haguã ichupe mymbahapy ramo?

Ovy’a iténepa Tupã Ñandejára ichupe aikuave’ẽ ramo 1.000 ovecha mácho térã 10.000 lítro ñandyry?

Térã aikuave’ërõ che ra’y ypykue che rembiapo vaikuére?

Nde, yvypóra, Tupã Ñandejára he’íma ndéve mba’épa pe iporãva, ha mba’épa ha’e nde hegui oha’arõ: Ejapo hekojojáva, eporoporiahuvereko, ha ejapo Tupã Ñandejára oipotáva, rejejapo’ỹre.

Tupã Ñandejára Ñe’ẽ.

SALMO ÑEMBOHOVÁI      49, 1.5-6. 8-9. 16b-17. 21. 23

R. Tupã Ñandejára upe oporo mbojovakéva.

“Pemboatypa umi che momba’évape,

umi imba’e kuave’ẽ rupi iñe’ẽ ome’ẽ va’ekue  chéve.”

Tupã Ñandejára upe oporo mbojovakéva.

Yvága omombe’u ha’e heko jojaha. R.

Mba’eve ndarekói ha’eva’erã mymbahapýre pejapóva chéve.

Umíva niko opa árape che renondépe pemoguahẽ.

Ndajeruréi peẽme pene rymba tóro,

térã kavara mácho pende korágui. R.

“Mba’éicha rupi che rembiapoukapy nde jurúgui ahendu?

Mba’éicha rupi ne mandu’a che ñe’ẽ me’ẽre?

Rohekombo’e ramo niko mba’eve nde reikuaaséi,

ha che ñe’ẽre nderejepy’apýi. R.

Opa ko’ã mba’e niko rejapo. Ha piko reipota akirirĩ?

Nde piko reimo’ã che ndeichaguaha mba’e?

Nde rovakete anohẽta ndéve ne rembiapo vaikue,

ha aikuaaukáta ndéve mávapa che. R.

ALELUIA Cf. Sal 94, 8a.7d

Aleluia.

Ani pemohatä pene korasö,

pehendu uvei Tupä Ñandejára ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       12, 38-42

Upe ramo guare fariséo kuéra ha umi Moisés rembiapoukapy mbo’eha he’i Jesúspe:

Mbo’ehára, rohechase niko rejapórõ mba’e hechapyrãva.

Jesús katu he’i ichupe kuéra: Tekove ahẽ Tupã Ñandejárare ojerovia’ỹva ñemoñarénte ojerure ohecha haguã mba’e hechapyrãva. Ndo jehechauka mo’ãi peẽme mba’eveichagua mba’e hechapyrãva. Tupã Ñandejára ohechaukáta peẽme maranduhára Jonás rehe ojapo haguéicha. Ha Jonás oĩ haguéicha mbohapy ára ha pyhare pe pira guasu ryépe, péicha avei che, yvypóraicha aju va’ekue, apyta va’erã mbohapy ára ha pyhare yvy guýpe.

Ágã Tupã Ñandejára ombojovakévo opavavépe, umi Ninivegua pene moĩ vaíta Tupã Ñandejára renondépe pene rembiapo vai haguére. Ha’e kuéra niko oheja va’ekue  iñangaipa Jonás oñemoñe’ẽ ramo ichupe kuéra. Ha che ha’e peẽme, peteĩ mba’e guasuvéva Jonásgui oĩhína ko’ápe ko’ágä.

Pe mburuvicha guasu kuñáva tetã Sebá pegua, opu’ã va’erã avei mbojovakeha árape, ha pene moĩ vaíta Tupã Ñandejára renondépe pene rembiapo vai haguére. Ha’e niko mombyryvégui oú va’ekue  ohendu haguã Salomón ñe’ẽ arandu. Ha che ha’e peẽme, peteĩ mba’e guasuvéva Salomóngui oĩhína ko’ápe ko’ágä .

Ñandejára Jesucristo Ñe’ẽ