LUNES SÉPTIMO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 19, 1-8

Apolos oĩ aja Coríntope, Pablo ohasa yvyty pa’ũ rupi ha oguahẽ Éfesope. Upépe ojuhu heta Jesús reroviahápe. Oporandu ichupekuéra: Oñeme’ẽ piko peẽme Espíritu Santo perovia ramo guare? Ha’e kuéra he’i: Norohendúiva oĩha aipo Espíritu Santo.

Pablo oporandu ichupe kuéra: Mba’éichagua ñemongarai rupi piko peñemongarai ra’e? Ha’e kuéra he’i: Juan ñemongarai rupi. Pablo he’i ichupekuéra: Juan añete omongaraíva umi ojevývape Tupã Ñandejára gotyo, opáichavo he’íva ichupekuéra oguerovia haguã upe ou va’erãme ha’e rire, he’ise Jesúspe.

Ohendúvo kóva oñemongaraika hikuái Ñandejára Jesús rérape, ha Pablo omoĩvo ipo hesekuéra, ou avei hi’árikuéra Espíritu Santo, ha oñe’ẽ ñe’ẽ ojekuaa’ỹvape ha ohenduka pe Tupã Ñandejára he’íva ha’ekuéra rupi. Ha’e kuéra va’ekue 12 kuimba’e rupi. Mbohapy mése aja Pablo oho judíokuéra tupaópe ha upépe omoerakuã upe ñe’ẽ kyhyje’ỹre ha oñeha’ã ogueroviauka opavavépe Tupã Ñandejára remisãmbyhy rehegua

Tupã Ñandejára Ñe’ẽ.

SALMO ÑEMBOHOVÁI 67, 2-5ac. 6-7ab

Opavave: Pepurahéi Tupã Ñandejárape, héra peropurahéi.

O bien:

Aleluia.

Tupã Ñandejára ojetyvyro ha hese ija’e’ỹva isarambipa.
Okañymba umi ichupe ohayhu’ỹva.
Tatatĩcha yvytúre opa reíva, ha ñandýicha hykupáva
tata raku oñandúrõ, heko vaíva opáne Tupã renondépe. O.

Heko potĩva katu ovy’a,
torypápe osapukái ha ovy’a joa Tupã Ñandejára renondépe.
Pepurahéi Tupã Ñandejárape, héra peropurahéi.
Ñandejára hína héra, perosapukái ichupe vy’apópe. O.

Opa ite ityre’ỹva túva ha’e,
ha imenave’ỹva ñangarekohára, itupao marangatu guive.
Ha’eñóvape ha’e ombohóga,
oñeñapytĩvagui ha’e opoi ovy’a haguã. O.

ALELUIA Col. 3, 1

Aleluia.
Peẽ peikove jevy rupi Ñandejára Jesucristo rehe ae,peheka umi mba’e porã yvága pegua,
Cristo oguapyhápe Tupã Ñandejára akatúape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha 16, 29-33

Up ramo Ñandejára ohasa mboyvemi Tupã Ñandejára ykére, hemimbo’e kuéra he’i ichupe:Ko’ágã ae reñe’ẽ ñe’ẽ ñembojoja’ỹre, ha roikuaa porã upe eréva. Ko’ágã rohecha kuaa reikuaaha opa mba’e ha natekotevẽiha avave oporandu ndéve mba’eve. Upévare roguerovia rejuha Tupã Ñandejáragui.

Jesús he’i ichupekuéra: “Añetehápe piko peroviáma ko’ágã? Oguahẽ hína pe ára ha ko’ágãite voi, peẽ pene sarambítavo opa rupi, ha che reja che año. Naime mo’ãi che año, che Ru oĩtagui che ndive. Ha’e peẽme ko’ã mba’e py’aguapy pejuhu haguã pejoajúvo che rehe. Heta pehasa asýta ko yvy ári, péicharõ jepe, pende py’a guasu kena. Che poguýpema niko oĩ ko yvy.

Ñandejára Jesucristo Ñe’ẽ.