LECTURAS MARTES DE LA OCTAVA DE PASCUA

LECTURAS MARTES DE LA OCTAVA DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 2, 36-41

Pentescostés árape Pedro he’i Judíoskuérape: Toikuaa porãke opa Israelgua, ko Jesúspe voi, peẽ pemosãingo va’ekue kurusu rehe, Tupã Ñandejára omoingo hague opa mba’e Jára ha Mesías ramo”.

Umi ijaty va’ekue ohendúvo ko’ã mba’e, oñembyasy eterei ha oporandu joa Pedro ha apóstolkuérape: Ore pehẽngue, mba’éiko rojapóta?

Pedro he’i ichupekuéra: Pejevy Tupã Ñandejára gotyo ha peñe mongaraiuka peteĩ teĩ Jesucrísto rérape, Tupã Ñandejára oheja rei haguã peẽme pene angaipa, ha péicha ome’ẽta peẽme Espíritu Santo. Ko ñe’ẽme’ẽ niko peẽme ha pene ñemoñarépe, ha avei opa umi mombyry oĩvape guarã. He’ise opa umi Tupä Ñandejára ohenoisévape guarã.

Ko’ãichagua ñe’ẽ rupi, Pedro oñemoñe’ẽ ha oheko mbo’e ichupekuéra, he’ívo: Pejeheja ko’ã tekove ahẽgui!
Ha umi oguerovia va’ekue iñe’ẽ, oñemongaraiuka. Ha upe árape oike umi ogueroviáva apytépe, 3.000 tapicha rupi.

Tupã Ñandejára Ñe’ẽ.

SALMO ÑEMBOHOVÁI 33, 4-5. 18-20. 22

Opavave: Yvy niko henyhẽ chovi imborayhúgui.

Upe Tupã Ñandejára he’íva niko añete,
ha opa mba’e ojapo teko jeroviápe.
Ha’e ohecha ramo teko joja ha opa mba’e hendápe ojejapóva.
Yvy niko henyhẽ chovi imborayhúgui. O.

Tupã Ñandejára katu oñangareko umi ichupe omomba’évape
ha imborayhu rehe ojeroviávape.
Umívape ha’e ndo hejái omano.
ñembyahýi guasu ou jave. O.

Tupã Ñandejára rehe ore rojerovia.
Ha’e upe ore pytyvõ ha oñangarekóva ore rehe.
Tupã Ñandejára, ne mborayhu ta ore añuãmba.
Upéva roha’arõ nde hegui. O.

SECUENCIA
Como el Domingo de Pascua, Misa del día:

Ñandejára Jesucrísto rayhupárakuéra
ñamoĩ Tupã Ñandejára ra’y pópe
ñane remikuave’ë momba’e guasu rehegua
ojora va’ekue ñane angaipa
Cristo imara’ÿva, omoĩ porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe pe mburuvicha guasu omano va’ekue
ha Ko’ágã oikove jevy.

Ere oréve María Magdalena
mba’épa rehecha tape rehe
Ahecha Ñandejára Jesucrísto tyvy ha Ñandejára oikove jevýva rova ojajaipáva.

Ahecha ángelkuérape, ohecha va’ekue pe mba’e hechapyrã
ahecha Ñandejára Jesucrísto oñeñuvã hague ha ijaokuéra
oikove jevy Cristo che jeroviaha, ha omotenondéta hemimbo’e kuérape Galiléape.

Jaikuaa Ñandejára Jesucrísto oikove jevyha añete hápe
nde, Mburuvicha guasu nde pu’akapáva, ore poriahuverekomi kena.

ALELUIA Sal 117, 24

Aleluia.
Kóva ko árape
Ñandejára oñemongu’e, javy’a joáke hesehápe
Aleluia.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha 20, 11-18

Upe árape María opyta okápe, pe itakua juru ypýpe ojahe’o hína. Upéi ojayvy ha omaña pe itakua ryepýpe, ha ohecha mokõi Tupä Ñandejára remimbou ijao morotĩmbáva oguapýva hína upe Jesús retekue oĩ haguépe. Peteĩ oguapy pe iñakã rendaguépe ha pe ambue katu ipy gotyo. Umi Tupã Ñandejára remimbou oporandu ichupe: Mba’e rehe piko ne rasẽ?

Ha’e he’i ichupekuéra: Ogueraha niko hikuái che Járape, ha ndaikuaái mamópa oheja.

Upéva he’ipávo, ojere ha ohecha Jesúspe oĩva hína upépe. María katu ndoikuaái Jesúsha upéva ha Jesús oporandu ichupe:
Mba’e rehe piko ne rasẽ? Mávape piko reheka?

María oimo’ãgui pe kokue rehe oñangarekóva pe oñe’ẽva ichupe, he’i: Nde, che karai, eraha rire ere chéve mamópa reheja ra’e, ha aháta ipiári.

Upépe Jesús ohenói ichupe héra rupi: María.

Ojere María ha hebréo ñe’ẽme he’i ichupe: Rabuni, he’iséva “Mbo’ehára”.

Jesús he’i ichupe: Ani che joko, ne’ĩra gueteri niko ajupi jevy che Ru rendápe. Te reho emombe’u che ryvykuérape aha jevytaha che Ru ha pende Ru rendápe, che ha pene Tupä rendápe.

Upépe María Magdalena oho ha omombe’u Jesús remimbo’e kuérape ha’e ohecha hague Ñandejára Jesucrístope. Omombe’u avei ichupe kuéra umi mba’e Jesús he’i va’ekue ichupe.

Ñandejára Jesucrísto Ñe’ẽ.