LECTURAS MIÉRCOLES DE LA OCTAVA DE PASCUA

LECTURAS MIÉRCOLES DE LA OCTAVA DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 3, 1-10

Peteï jevy Pedro ha Juan oho Tupaópe ka’aru mbyte rupi ñembo’ehápe. Upépe oĩ peteĩ kuimba’e ijapapáva ha oguata’ỹva oiko ypy guive, ojererahava opa ára ha oñemoĩva upe okẽ “Iporãva” héravape, ojerure haguã Tupã mba’e umi oikévape.

Upe ijapáva ohechávo Pedro ha Juánpe oikéva Tupaópe, ojerure ichupe kuéra Tupãmba’e. Ha’e kuéra oma’ẽ hatã hese, ha Pedro he’i ichupe: Ema’ẽ ore rehe.

Pe kuimba’e oma’ẽ, oimo’ãgui ome’ẽtaha ichupe jopoimi. Pedro katu he’i ichupe: Óro ha pláta ndarekói, pe arekóva katu ame’ẽta ndéve: Jesucrísto Nazaretgua rérape epu’ã ha eguata.

Upéva he’ívo Pedro ipojái ipo akatúare ha omopu’ã ichupe. Upe vove oñemombarete ipy ha ipyñuã. Pe ijapapáva opo opu’ã ha oñepyrũ oguata. Upéi oike hendivekuéra Tupaópe, opopo ha omomba’e guasúvo Tupãme. Opa ohecháva ichupe oguata ha omomba’e guasu Tupãme, oñemondýi ha okyhyje upe ojehu va’ekue rehe, oikuaa niko hikuái pe kuimba’épe ha oikuaa ha’eha upe oguapýva ojerure jepi Tupã mba’e Tupaópe, upe okẽ ‘Iporãva’ héravape.

Tupä Ñandejára Ñe’ẽ.

SALMO ÑEMBOHOVÁI 104, 1-4. 6-9

Opavave: Tupã Ñandejára rehe ojeroviáva to vy’a.

Pemomba’e guasu Tupã Ñandejárape, héra pemomba’e.
Opa tetã rupi pemoherakuã umi mba’e hechapyrãva ojapo va’ekue.
Ichupe peropurahéi ha pemoherakuã imombe’upyrãva ha’e ojapo va’ekue. O.

Héra marangatu pembotuicha.
Tupã Ñandejára rehe ojeroviáva to vy’a.
Peguahẽ Tupã Ñandejára rendápe ñepytyvõ rekávo.
Opa ára peñemboja hendápe. O.

Peẽ hembiguái kuéra Abraham ñemoñaréva,
Peẽ hembiporavo Jacob ra’ykuérava,
Tupã niko Ñandejára hína, ha’e oisãmbyhy ko yvy tuichakue. O.

Ha’e imandu’a mante iñe’ẽ ome’ẽ va’ekue rehe.
Iñe’ẽ ome’ẽ va’ekue rehe opa árape guarã.
Ha’ete voi ome’ẽ va’ekue iñe’ẽ Abrahámpe,
héra tee rehe ome’ẽ va’ekue iñe’ẽ Isaácpe. O.

SECUENCIA

Como el Domingo de Pascua, Misa del día:

Ñandejára Jesucrísto rayhupárakuéra
ñamoï Tupã Ñandejára ra’y pópe
ñane remikuave’ë momba’eguasu rehegua
ojora va’ekue ñane angaipa Cristo imara’ÿva,
omoï porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe
pe mburuvicha guasu omano va’ekue ha Ko’ágã oikove jevy.

Ere oréve María Magdalena mba’épa rehecha tape rehe
Ahecha Ñandejára Jesucrísto tyvy ha Ñandejára oikove jevýva rova ojajaipáva.

Ahecha ángelkuérape, ohecha va’ekue pe mba’e hechapyrã
ahecha Ñandejára Jesucrísto oñeñuvã hague ha ijaokuéra oikove jevy Cristo che jeroviaha,
ha omotenondéta hemimbo’ekuérape Galiléape.

Jaikuaa Ñandejára Jesucrísto oikove jevyha añete hápe
nde, Mburuvicha guasu nde pu’akapáva, ore poriahuverekomikena.

ALELUIA Sal 117, 24

Aleluia.
Kóva ko árape Tupã Ñandejára oñemongu’e, javy’a joáke hesehápe
Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 24, 13-35

Upe árape voi, mokõi Jesús remimbo’e oho peteï táva hérava Emaúspe, opytáva 11 kilómetro rupi Jerusaléngui. Oñe’ẽ ohóvo hikuái umi mba’e ojehu va’ekue rehe.

Oñomongeta jave hikuái ohóvo, Jesús ete voi oñemboja ha oñepyrũ oguata hendivekuéra. Ha ohecha ramo jepe ichupe, ndohechakuaái mávapa ha’e. Jesús oporandu ichupekuéra: Mba’e piko peje pehóvo?

Opyta hikuái, hovasy ñembyasýgui. Ha peteïva, pe Cleofás hérava, he’i: Nde añoite piko umi oĩ va’ekue Jerusalénpe apytégui, pe oikuaa’ỹva mba’épa ojehu ra’e upépe, ko’ãva ko’ã ára ohasa va’ekuépe?

Ha’e oporandu ichupekuéra: Ha mba’e piko ojehu?

He’i ichupe hikuái: Ha pe Jesús Nazaretguaregua, peteï maranduhára va’ekue, ipu’akapáva ojapóvape ha he’ívape Tupä Ñandejára renondépe ha opavave renondépe. Ha umi pa’i ruvicha ha ñande ruvicha kuéra ome’ẽ ojejuka haguã, ha oñemosãingo ichupe kurusu rehe. Ore roha’arõ ite va’ekue ha’e oipysyrõtaha tetã Israélpe. Ha ojapóma mbohapy ára umi mba’e ojehu hague.

Umi kuña oĩva ore ndive jepe ore mondýi kuri, oho niko hikuái ko’ẽ mboyve pe ityvýpe, ha ndojuhúi rupi hetekue, oho jevy hikuái ha omombe’u, Tupã Ñandejára remimbou ojechauka hague ichupekuéra, ha he’i Jesús oikove jevyha. Oime ore apytégui ore irũ oho va’ekue upe rire pe tyvýpe ha ojuhu umi kuña he’i hagueichaite. Jesúspe katu ndohechái.

Aipo ramo Jesús he’i ichupekuéra: Ndaikatúi ete voi ra’e peikuaa mba’eve ha hasy eterei peëme perovia haguã opa mba’e he’i va’ekue maranduhára kuéra! Ndohasái va’erã nga’u piko ra’e pe Mesías ko’ã mba’e, Tupä Ñandejára ndive omimbipa haguã yvágape?

Upéi oñemoĩ omoesakã ichupekuéra opa umi oñe’ẽhápe hese Ñandejára Ñe’ẽ. Oñepyrũ Moisés kuatia kuéragui ha ohasa ohóvo opa maranduhára kuatiakuérape.

Oguahẽvo pe táva ohohápe, Jesús ojapo ohóta ramo gua’u tenonderãvo. Ha’e kuéra katu ojoko ichupe opyta haguã, he’ívo:
Epyta ore ndive, ka’aru etéma niko. Pyharétama hína.

Jesús aipo ramo opyta hendivekuéra. Oguapýma ramo hikuái mesápe, Jesús ohupi ipópe mbujapépe, ome’ẽ ijaguyje Tupãme, ha omboja’o ha ome’ẽ peteï teĩme. Upe javete ojehesa pe’a hikuái ha oikuaa Jesúspe. Ha’e katu okañy hesa renondégui kuéra. Ha he’i hikuái ojupe: Ajépa niko ñande py’a hendy va’ekue hína ñande pyti’ápe jajúvo tape rehe, ku omoesakã ramo hína ñandéve Ñandejára Ñe’ẽ?

Oha’arõve’ỹre, ojeity hikuái tape rehe ha ojevy hikuái Jerusalénpe. Upépe ojuhu hikuái ijaty hína umi 11 apóstol ha iñirũnguéra, he’íva ichupekuéra: Añetehápe oikove jevy Ñandejára, ha ojechauka Simónpe.

Aipo ramo ha’ekuéra mokõi omombe’u mba’épa ojehu ichupekuéra tape rehe, ha mba’éichapa oikuaa hikuái Jesúspe omboja’óvo mbujape.

Ñandejára Jesucrísto Ñe’ẽ.