JUEVES DE LA OCTAVA DE PASCUA

JUEVES DE LA OCTAVA DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 3, 11-26

Pe ijapapáva okuéra va’ekue ndopoíri Pedro ha Juángui. Opavave ohecha ramo joa, ha pya’e oupa joa Tupaópe upe “Salomón Roka” héravape, ha’ekuéra oĩháme. Pedro, ohechávo kóva, he’i ichupe kuéra: “Mba’e rehe piko pehecha ramo kóva, peẽ Israelgua?

Mba’e rehe piko pema’ẽ ore rehe, ha’e ramo guáicha ore umi romonguera va’ekue ko kuimba’épe, térã romboguata ichupe ore pokatu térã ore marangatu rupi? Tupã Ñandejára Abraham, Isaac ha Jacob Jára, Tupã ñande rukuéra ypykue Jára, ombojeroviave va’ekue opavavégui hembiguái Jesúspe, peẽ pemoĩ va’ekue mburuvicha kuéra pópe ha pemboyke va’ekue, Pilato he’i rire opoitaha ichugui.

Pejerure rangue ojepoi haguã imarangatu ha heko jojávagui, pejerure ojepoi haguã mba’e vai apohagui. Ha péicha pejuka va’ekue jeikove me’ẽhárape. Tupã Ñandejára katu omoingove jevy ichupe, ha ore hína kóva rechahare. Ko kuimba’e peẽ pehecha ha peikuaáva, imbarete jevy ojerovia rupi Jesús réra rehe. Ko ijerovia Jesús rehe omoĩva omonguera ite ichupe, peẽ voi pehecha háicha.

Aikuaa, che pehẽnguekuéra, Peë ha pende ruvichakuéra pejuka ramo guare Jesúspe, pejapo hague peikuaa porã’ỹ rehe. Opáichavo, Tupã Ñandejára ojapo péicha, oiko haguã upe he’i va’ekue opa imaranduhára rupi, pe Mesías omano va’erãha.

Upéva rehe pejevy Tupã Ñandejára gotyo ha peñembyasy, ha’e oheja rei haguã peẽme pene angaipa, ha Ñandejára ombou haguã peẽme ára piro’y omboúvo peẽme upe Jesús, iñepyrũha guive voi ha’e oiporavo va’ekue Mesías ramo peẽme guarã. Jesucrísto tekotevẽ gueteri opyta yvágape oñemoĩmba peve hekópe opa mba’e, he’i haguéicha umi maranduhára marangatu yma guare rupi.

Moisés he’i va’ekue ñande ru kuéra ypykuépe: ‘Tupã pende Jára omopu’ãta pende apytégui peteĩ maranduhára cheichagua. Pene ñe’ẽrendúke ichupe opa he’ívape, Cháke opa umi ohendu’ỹva upe maranduhárape oñemosẽta hetãgui’.

Ha opa maranduhára, Samuel guive, oñe’ẽ va’ekue avei ko’ã ára rehe. Peẽme guarã hína umi ñe’ẽ Tupã Ñandejára ome’ẽ va’ekue maranduhárakuéra rupi, ha peẽme guarã avei upe ñe’ẽ me’ẽ Tupã Ñandejára ojapo va’ekue pende rukuéra ypykue ndive. Tupã Ñandejára niko he’i va’ekue Abrahámpe: ‘Opa tetã yvy arigua ojehovasáta ne ñemoñarekuéra rupi’. Tupã omoingove ramo guare ita’ýrape, omondo ichupe peẽme raẽ, pende rovasa haguã, opoikávo peẽme pene rembiapo vaikuégui”.

Tupä Ñandejára Ñe’ẽ.

SALMO ÑEMBOHOVÁI 8, 2a. 4-9

Opavave: Tupã ore Jára, herakuã porã ite nde réra

Amaña ramo yvága rehe upe ne rembiapokue rehe,
jasy ha mbyja kuéra rehe hendápe remoĩ va’ekue,
ha’e che jupe: Máva piko yvypóra,
ne mandu’a haguã hese? O.

Michĩ remomichĩve ekove yvágape guágui,
ha yvate ichupe rehupi ha rembotuicha.
Mburuvicha ramo remoĩ ichupe ne rembiapokue ári,
opa mba’e ipo guýpe remoĩ. O.

Ovecha ha guéikuéra,
ha opa mymba saite,
guyra kuéra yvága rehe ovevéva,
pira ha opa umi mba’e ýpe oikóva. O.

SECUENCIA

Como el Domingo de Pascua, Misa del día:

Ñandejára Jesucrísto rayhupárakuéra ñamoĩ Tupã Ñandejára ra’y pópe
ñane remikuave’ë momba’eguasu rehegua ojora va’ekue ñane angaipa
Cristo imara’ÿva, omoĩ porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe pe mburuvicha guasu omano va’ekue
ha ko’ágä oikove jevy.

Ere oréve María Magdalena mba’épa rehecha tape rehe
Ahecha Ñandejára Jesucrísto tyvy ha Ñandejára oikove jevýva rova ojajaipáva.

Ahecha angelkuérape, ohecha va’ekue pe mba’e hechapyrã
ahecha Ñandejára Jesucrísto oñeñuvã hague ha ijaokuéra
oikove jevy Cristo che jeroviaha, ha omotenondéta hemimbo’ekuérape Galiléape.

Jaikuaa Ñandejára Jesucrísto oikove jevyha añete hápe
nde, Mburuvicha guasu nde pu’akapáva, ore poriahuverekomi kena.

ALELUIA Sal 117, 24

Aleluia.
Kóva ko árape
Ñandejára oñemongu’e,
javy’a joáke hesehápe
Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 24, 35-48

Upe ramo mokõi discípulo ou jevy rire Emaúsgui omombe’u mba’épa ojehu ichupe kuéra tape rehe, ha mba’éichapa oikuaa hikuái Jesúspe omboja’óvo mbujape.

Oñe’ẽ gueteri hikuái ko’ã mba’e rehe, oñemoĩ ramo Jesús mbytépekuéra. Omomaitei ichupekuéra ha he’i: Py’a guapy peẽme guarã. Ha’ekuéra tuicha oñemondýi, oimo’ã ohecha hikuái póra. Jesús katu he’i ichupekuéra: Mba’e rehe piko peñemondýi?

Mba’e rehe piko pende py’a mokõi, perovia ha ndaperoviái? Pema’ẽ che po ha che pýre. Che ha’e. Pepoko che rehe ha pehecha. Póra niko ndaho’ói ha naikanguéi, pehecha háicha arekoha che.

He’ívo péicha, ohechauka ichupe kuéra ipo ha ipy. Ha ndogueroviaséi hikuái, ovy’a ha ohecha ramo itereígui. Ha Jesús he’i ichupekuéra: Perekópa ko’ápe ja’u va’erã?

Ome’ẽ ichupe hikuái peteĩ pira mbichy pehẽngue, ha ha’e ho’u henondépekuéra. Upéi katu he’i: Pe ojehu va’ekue chéve niko, pe ha’e va’ekue peẽme aimérõ gueteri pene ndive: oiko va’erãha che rehe pe oĩva Moisés rembiapoukapýpe, umi maranduhára kuatiápe ha Salmokuérape.

Aipo ramo oikuaauka ichupekuéra pe Ñandejára Ñe’ẽ, ha he’i: Oĩ kuatiápe pe Mesías omano va’erãha, ha oikove jevy mbohapy ára haguépe, ha hérape oje’e va’erãha opa tetãme, ojevy haguã hikuái Tupã Ñandejára gotyo, ha’e oheja rei haguã ichupekuéra iñangaipa. Peñepyrũ Jerusaléngui, Peë pemombe’u va’erã ko’ã mba’e.

Ñandejára Jesucrísto Ñe’ẽ.