MARTES SEMANA XXXII TO

Ñahendúta Tupã Ñandejára Ñe’ẽ San Pablo ohai va’ekue Titope           2, 1-7a. 11-14

Che pehẽngue  ahayhu etéva:

Opa mba’e rembo’éva, ta upe teko mbo’e hekopeguáva he’i háichake. Umi itujámava ta iñakã guapy, to jejapo mba’érõ, ta iñakã porã, ta hesãi ijeroviápe ha imborayhúpe, ha ta imbarete ogueropu’aka haguã jehasa asy. Upéicha avei kuñakarái kuéra, ta heko kuñakarai guasu ha ani ijurumy’ỹi térã ika’u.

To hechauka tembiapo iporãva, ha to mbo’e kuñakarai pyahu kuérape ohayhu haguã iména ha imemby kuérape, ta iñakã guapy, ta heko potĩ, to ñangareko kuaa hógare, ta imba’e porã ha ta iñe’ë rendu iménape, ani haguã avave oguereko he’i va’erã Ñandejára ñe’ẽre.

Eñemoñe’ẽ avei mitã rusu kuérape iñakã guapy haguã opa mba’épe, rehechaukávo nde voi tembiapo porã, mbo’epy hesãi porãva rupi, teko marangatúpe, teko mbo’e hekópe guápe, ikatu’ỹ va’erã avave ombohovái. Upéicharõ, umi nde rehe oñemoĩva, opytáta oikuaa’ỹre mba’épa ojapóta, ndojuhu mo’ãigui he’i va’erã nde rehe.

Tupã Ñandejára niko ohechauka va’ekue  imba’e porãha, oikuave’ẽvo yvypórape oñepysyrõ haguã. Pe Tupã Ñandejára  py’a porã, ñane mbo’e jajeheja haguã teko jerovia’ỹ ha mba’e pota yvy ári guágui, ha jaiko haguã ñande rekove ko’ágä  guápe, akã guapýpe, hekópe ha Tupã Ñandejára rayhúpe, torypápe ñaha’arõ aja ou jevy ñane Tupã guasu Jesucristo ñane pysyrõhára. Ha’e omano va’ekue  ñande rayhupápe, ñane renohẽ haguã teko añágui ha ñane mopotĩmba ite haguã, ojapóvo ñande hegui peteĩ tetã imba’e teéva, mba’e porãnte oipotáva.

Tupã Ñandejára Ñe’ẽ.

SALMO ÑEMBOHOVÁI         36, 3-4, 18. 23. 27. 29

R. Tupä Ñandejára oñangareko heko potĩvare.

Tupä Ñandejára rehe ejerovia ha ko yvy ári reikóvo

rehupitýne py’a guapy.

Tupä Ñandejára nde py’a to mbovy’a, ohupityukáne ndéve

opa mba’e nde py’a ite guive reipotáva. R.

Tupä Ñandejára oñangareko heko potĩvare,

ichupe ome’ẽ yvy imba’e teerã.

Tupä Ñandejára oisãmbyhy yvypóra rekove,

ha’e omboguata ichupe hapére. R.

Eheja ivaíva ha ejapo iporãva ha nde repyta mo’ãi yvy’ỹre.

Heko potĩvape opytapáne ko yvy,

ha upépe ha’ekuéra oikóne opa árape. R.

ALELUIA Jn 14,  23

Aleluia.

Ñandejára Jesucristo he’i:

“Pe che rayhúva nomboyke mo’äi che ñe’ë,

ha che Túva ohayhúta ichupe ha rohóta hendápe”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    17, 7-10

Upe ramo Jesús he’i hemimbo’ekuérape:

“Pe oguerekóva hembiguái oguahẽva oyvyjokahágui ha oñangarekohágui hymba kuérare, he’i nga’úpa ichupe: ‘Ehasa ha eguapy ekaru?’ Nahániri, he’i katu ichupe: Ejapo chéve che karurã, ha eñemoĩ eñangareko che rehe che akaru ha amboy’u aja. Upéi nde ikatúne rekaru ha remboy’u.’

Ha upéi ave, ndojeaguyje me’ẽi upe tembiguáipe ojapo haguére umi he’i va’ekue  ichupe. Péicha avei peẽ, ágä pejapopávo umi Tupã Ñandejára he’i va’ekue  peẽme, peje va’erã: ‘Ore tembiguái ipituáva, rojapónte rojapo va’erã.’”

Ñandejára Jesucristo Ñe’ẽ.