MARTES TRIGÉSIMO TERCERO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Jueces arandukápe oĩ háicha 6, 18-31

Eleazárpe, itenondéva tembiapoukapy mbo’épe, itujámava ha imba’e porãva, oñembojuru pe’ase mbaretépe ho’u haguã kure ro’o. Ha’e katu, omanose uvei hekópe porã oikove rangue ñemotĩme, ha ha’ete oho ojejuka haguãme ondyvu rire pe so’o. Ojapo ojapo háicha umi oikuaa porãva mba’épa ndojapói va’erã, omano va’erã jepe.

Umi omoakã va’ekue hína pe jekaru Tupã Ñandejára rembiapoukapy ndohejáiva, ha yma guivéva oikuaáva Eleazárpe, omoha’eño ha he’i ichupe, ogueruka haguã so’o ikatúva ho’u ha to’u ho’u ramo guáicha pe so’o mymbajukápe guare, mburuvicha guasu he’i haguéicha.

Upéicharõ ndojejuka mo’ãi, ha ha’ekuéra, aréma ojokuaágui, ipy’a porãta hikuái hendive. Eleazar katu ojapo peteĩ mba’e ho’áva iñakã rague morotĩre. Imitã guive ohechauka va’ekue omboaje ha Tupã Ñandejárape ha ojapo hague hembiapoukapy marangatu, ha he’i ichupekuéra: “Pe che juka mandi voi.

Che tujáma ha naiporãi aporombotavy. Ndaipotái umi mitãrusu oimo’ã, che, Eleazar, 90 áñoma ambotýva, ajere hague tupã mombyry guápe, ha che rova mokõi rupi aikovemive haguã rehehápe, ha’e kuéra ho’a jejavýpe che rembiapo vaikuére, ha aity che ári terakuã vai ha ñemotĩ. Upéi ave, nañe nupãukái ramo jepe ko’ágä yvypóra po rupi, aikove aja térã amano rire ndajei mo’ãi voínte pe Ipu’akapáva pógui.

Aipórõ, ndakyhyjéi ame’ẽ haguã che rekove ha nañe motĩri che tujakue, ha aheja mitã rusukuérape peteĩ mba’e hechapyrãva, ahechaukávo che py’a guasuha amano haguã Tupã Ñandejára rembiapoukapýre.”

He’ívo péicha, ha’e ijehegui oho ojejuka haguãme. Umi ogueraháva ichupe, ohendúvo umi he’íva, ha’ekuéra oguerekóva itarováva ñe’ẽ ramo, ipy’a porã haguégui oñepyrũ oñemboharái hese, Eleazar katu, omano nguévo pe ñenupãnguére, he’i pyahẽ pa’ũme: “Tupã Ñandejára oikuaa porã opa mba’e ojavy’ỹre. Ha’e oikuaa ikatu va’erã mo’ã hague namanói, ha ndahasái ko’ã mba’e rasy eta, ha oikuaa avei che py’apýpe avy’a etereiha ahasa asy ramo jepe, amboajégui ichupe.” Ha péicha, Eleazar omano rire oheja mitã rusu kuérape ha tetãgua maymávape ave, py’a guasu ha teko potĩ rechaukaha.

Tupã Ñandejára Ñe’ẽ.

SALMO ÑEMBOHOVÁI 3, 2-8b

Opavave: Epu’ã Tupã che Jára.

Che Jára, heta oĩ ndaija’éiva che rehe.
Heta oĩ opu’ãva che rehe.
Heta oĩ he’íva che rehe:
“Tupã Ñandejára nonohẽ mo’ãi ichupe jejopy vaígui.” O.

Che Jára, che renondépe reñemoĩ ani ojehu chéve mba’eve.
Nde upe reme’ẽva chéve opa mba’e, che moakã rapu’ãva.
Tupä Ñandejárape asapukái ha’e che pytyvõ haguã.
Ha’e, che rendu ha oñe’ẽ chéve ijyvyty marangatu guive. O.

Añeno, ake ha upéi apáy, ipópe Tupã che rerekógui.
Heta ramo jepe che mongoráva, ndakyhyjéi ichuguikuéra.
Epu’ã Tupã che Jára! Che pe’a jejopy vaígui!
Umi che rayhu’ỹvape rehova petéta, iñañáva rãi reitypáta. O.

ALELUIA 1Jn 4, 10b

Aleluia.
Tupã Ñandejára ñande rayhu raẽve ha ombou Ta’ýra
oikuave’ẽ haguã hekove ñane angaipáre.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 19, 1-10

Upe ramo Jesús oike Jericópe, ha ohasa ohóvo upe táva rupi. Upépe oikóva peteĩ kuimba’e imba’e retáva hérava Zaqueo, umi omono’õva viru Roma ruvichápe guarã. Ha’e oikuaase Jesúspe, ha ndaikatúi ohecha ichupe, hetágui umi Jesús ndivegua, ha Zaqueo ikarape. Upévare oho tenondévo. Ha ohecha haguã ichupe, ojupi peteĩ yvyra rakãre, pe Jesús ohasataha ypy rupi.

Ohasávo Jesús upe rupi, oma’ẽ yvatévo ha he’i ichupe: Zaqueo, pya’e eguejy. Ko árape apyta va’erã nde rógape. Zaqueo pya’ete oguejy, ha torypaitépe omoguahẽ Jesúspe. Ohechávo upéva, opavave oñepyrũ oñe’ẽ Jesús rehe, he’i hikuái ohoha opyta peteĩ iñangaipáva rógape. Zaqueo opu’ã upépe ha he’i Ñandejárape: Ma’ẽ, che Jára, ame’ẽta imboriahúvape mbyte rupi opa arekóvagui, ha oimérõ amonda hague, amoengoviáta ichupe irundy jevy hetave.

Jesús he’i ichupe: Ko árape, ko óga oikóvapegua oguahẽ ñepysyrõ. Zaqueo niko Abraham ñemoñare avei. Tupã Ñandejára ra’y, ou va’ekue yvypóraicha, ou ohekávo ha oipysyrõvo opa oñehundi va’ekue.

Ñandejára Jesucristo Ñe’ẽ.