MARTES XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽÉxodo arandukápe oĩ háicha 33, 7-11; 34, 5b-9, 28

Moisés ogueraha omohenda Tekoha mombyry ojeikohágui, ha ombohéra Jotopa Róga. Oporanduséva peteĩ mba’e Tupä Ñandejárape, osë hógagui oho haguã Jotopa Rógape. Moisés oho ramo Jotopa Rógape, opavave oñembo’y hóga rokẽme ha oma’ẽ hese oike peve.

Moisés oike rire, oguejy arai ñembo’y ha oñemoĩ hokẽme, Tupã Ñandejára oñe’ẽ aja Moisés ndive. Ohechávo arai ñembo’y opytaha Jotopa Róga rokẽme, maymáva oñesũ hóga rokẽme omomba’e guasúvo Tupã Ñandejárape.

Tupã Ñandejára oñe’ẽvo Moisés ndive oĩ henondépe ha oñe’ẽ hendive ñañe’ẽ háicha ñane irũ tee ndive. Upéi Moisés ou jeýva tekohápe ha ipytyvõhára Josué, Nun ra’y, opytáva Jotopa Róga rye pýpe.

Upérõ Tupä Ñandejára oguejy peteĩ araípe, opyta upépe Moisés ndive ha omoñe’ẽ héra tee.

Tupã Ñandejára ohasávo henonde rupi osapukái: Háa Tupã Ñandejára, háa Tupã Ñandejára, oporombyasýva ha oporoporiahuverekóva, ipochy kuaa’ỹva, oporohayhu etéva ha nopyrũiva iñe’ẽnguére, opyta hatãva iñe’ẽ ome’ẽ va’ekuépe ha imborayhúpe, oñemboesaráiva ñaña, teko ñemoĩ ha angaipágui, ndohejái ramo jepe oinupã’ỹre iñangaipávape; oinupã uvei túvakuéra ñaña nguére ta’ýra kuéra, ñemoñare irundyha peve.

Upérõ oñesũ Moisés, omboja isyva yvýre, ha he’i: Háa che Jára, añetehápe che ne irü ramo, eju ore ndive. Añete niko ha’e kuéra oikose iñakãrente voi, upéicha ramo jepe, eheja reína oréve ore ñañangue ha ore angaipa, ha ore rereko ne mba’e teéva ramo.

Moisés opyta upépe Tupã Ñandejára ndive 40 ára ha 40 pyhare pukukue okaru’ỹ rehe ha hoy’u’ỹre. Ha ohai ita pehẽngue ári upe ñe’ẽ ñome’ẽ, oĩháme umi 10 tembiapoukapy.

Tupã Ñandejára Ñe’ẽ.

SALMO ÑEMBOHOVÁI 102, 6-13

Opavave: Tupã Ñandejára imba’e porã ha oporoporiahuvereko.

Tupã Ñandejára heko joja opa ojapóvape
ha ohecha kuaa umi ojejopy vaívape.
Moiséspe ha’e ohechauka hembipota,
ha Israélpe mba’e hechapyrãva. O.

Tupã Ñandejára imba’e porã ha oporoporiahuvereko,
ndaipochy reíri ha oporohayhu.
Ha’e ndoporomongavajúi mante
ha ndaipochy aréi. O.

Nomoengoviái ñandéve ñane angaipa,
ha ndo japói ñande rehe ojapo haguãicha.
Yvága oĩ mombyry háicha yvýgui,
upéicha ite tuicha imborayhu umi hese ojeroviávare. O.

Kuarahy resẽ mombyry háicha kuarahy reikégui,
upéicha omomombyry ñande hegui ñane angaipa.
Túva omokunu’ũ háicha ta’ýra kuérape,
upéicha avei Tupã Ñandejára ichupe omomba’éva ndive. O.

ALELUIA

Aleluia.
Pe mba’e ra’ÿi oñeñotÿva hína Tupã Ñandejára Ñe’ẽ, pe oñeñotÿva katu Cristo voi; upe ojuhúva oikovéta opa ára guarä.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 13, 36-43

Upe ramo Jesús oheja opavavépe ha oho oike hógape. Hemimbo’ekuéra oñemboja hendápe ha he’i ichupe: “Emombe’úna oréve mba’épa he’ise pe ñe’ẽ mbojoja ñana trigotýpe opu’ãva rehegua.”

Upépe Jesús he’i ichupekuéra: “Pe oñotỹva mba’e ra’ỹi iporãva niko hína Che, yvypóraicha aju va’ekue yvy ári, ha pe kokue katu ko yvy tuichakue. Pe mba’e ra’ỹi iporãva niko umi ohejáva Tupã Ñandejára oisãmbyhy ichupekuéra, ha umi ñana katu umi Aña mba’éva. Ha pe ñana ñotỹhare, upe Aña. Pe ñemono’õha ára katu niko ára paha oútava, ha umi koga’a omono’õva katu Tupã Ñandejára remimboukuéra.

Umi ñana oñemboaty ha ojeity háicha tatápe ojehapy haguã, péicha avei ojehúta ára pahápe. Che, yvypóraicha aju va’ekue, amondóta che remimboukuérape. Ha’ekuéra omboaty ha oipe’áta, umi ohejáva chéve aisãmbyhy ichupekuéra apytégui, opa umi oitýva hapichápe angaipápe ha opa hembiapo vaívape.

Che remimbou kuéra oitýta ichupekuéra tatakua hendývape, ha upépe ojahe’o ha omopururũta umi hãi. Upe árape, umi imarangatúva omimbi va’erã kuarahy rendýicha pe che Túva oisãmbyhyhápe. Ohendúvake to japysaka porã.”

Ñandejára Jesucristo Ñe’ẽ