LECTURAS MARTES 22º DURANTE EL AÑO

LECTURAS MARTES 22º DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Tesalónica guápe 5, 1-6. 9-11

Che pehẽnguekuéra: Araka’épa oikóta ko’ã mba’eregua, ore pehẽngue, natekotevẽi romoĩ peẽme kuatiáre. Peẽ peikuaa voi, ára ou jevytaha Ñandejára Jesucristo oguahẽtaha oñeha’arõ’ÿve jave, mondaha oguahẽ ramo guáicha pyhare.

Ágã ku yvypóra he’ívo: “Opa mba’e péina oĩ py’aguapýpe, ha ndaipóri jakyhyje haguã”, upépe oúta hi’ári kuéra oimo’ã’ỹhágui ñehundi guasu, ou háicha memby pota rasy kuña hye guasúvape; ha avave ndaikatu mo’ãi okañy. Peẽ katu, ore pehẽnguekuéra, napeiméi pytũmbýpe pene mondýi haguã pe ára ou jevyha Ñandejára Jesucristo peteĩ monda háicha.

Peẽ, ára ha mba’e rendy rehegua, ñande ndaha’éi pyhare ha pytü rehegua. Upévare, ndajakéi va’erã umi ambuéicha, japáy ha ñane akã porã katu va’erã.

Tupã Ñandejára na ñane moĩri ñañe nupã haguã, ñanẽ pysyrõ haguã katu, Ñandejára Jesucristo rupi. Jesucristo omano ñande rehehápe, ikatu haguã, japáy térã jake ramo, jaiko haguã hendive. Upévare peñomoakã raku ha peñomombaretéke, pejapo háicha voi hína.

Tupã Ñandejára Ñe’ẽ.

SALMO ÑEMBOHOVÁI 26, 1. 4. 13-14

Opavave: Aikuaa Tupã Ñandejára imba’e porãtaha che ndive

Tupã Ñandejára upe che rekove ohesapéva,
ha upe che pytyvõva. Mávagui piko akyhyjéta?
Tupã Ñandejára oñangareko che rehe,
máva piko che mongyhyjéta? O.

Peteĩ mba’énte Tupã Ñandejárape ajerure,
peteĩ mba’énte aipota. Tupaópe aikose aikove aja pukukue,
hese ajepy’a mongeta haguã, ha’e che mbopy’a rory haguã,
ichupe amomba’e guasu haguã. O.

Aikuaa Tupã Ñandejára imba’e porãtaha che ndive
aikove aja pukukue. Pejerovia Tupã Ñandejára rehe.
Pende py’a guasúke ha ani pene ate’ỹ.
Añetehápe ha’e peẽme, pejerovia Tupã Ñandejára rehe. O.

ALELUIA Lc 7, 16

Aleluia.
Peteĩ maranduhára tuicháva osẽ ñande apytépe
ha Tupã Ñandejára ou ohecha umi hese ojeroviávape.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 4, 31-37

Upe ramo Jesús oho Cafarnaúmpe, táva Galiléa peguápe, ha pytu’uha árape ombo’éva opavavépe. Ha opavave ohecha ramo mba’éichapa ha’e ombo’e ichupekuéra. Ohechauka ku noikotevẽi ramo guáicha avavére he’i haguã mba’eve.

Pe judíokuéra tupaópe, oĩ peteĩ karia’y oguerekóva mba’epochy. Ha upéva hatã osapukái: Mba’ére piko reñemoĩ ore rehe, Jesús Nazaretgua? Reju piko ore rundívo? Che roikuaa.

Nde hína pe imarangatúva, Tupã Ñandejára omboúva.
Jesús oja’o pe espíritu añáme ha he’i ichupe: Ekirirĩ ha esẽ pe kuimba’égui!

Upépe pe mba’epochy oity yvýpe upe kuimba’épe, ha osẽ ichugui ojapo’ỹre hese mba’eve ivaíva. Opavave oñemondýi, ha he’i joa ojupe: Mba’éichagua ñe’ẽ piko ãva? Oikuaa porãhápe ha pokatúpe ko kuimba’e he’i umi mba’epochýpe osẽ haguã, ha ha’ekuéra osẽ! Ha oĩ Jesús rehe mandu’a opa rupi upe jerekuévo.

Ñandejára Jesucristo Ñe’ẽ