JUEVES 8 DE AGOSTO
7 agosto, 2019PRIMERA LECTURA:
Ko’ágä ñahendúta Tupã Ñandejára ñe’ẽ Números arandukápe oĩ háicha
13, 1-2. 25 – 14, 1. 26-33a.
Tupä Ñandejára he’i Moiséspe: Eiporavo peteĩ teĩ Israel ñemoñare apytégui peteĩ moakãhára ha emondo umi 12 to ma’ẽ ñemi Canaán retãre, che ame’ẽtava hína Israel guápe.
Oiko rire pe tetã rupi 40 ára pukukue, umi oho va’ekue oma’ẽ ñemívo ou jevy. Israel ñemoñare oñepyrũ osapukái ha hasẽ pyhare pukukue. Tupä Ñandejára he’i Moisés ha Aarónpe:
Araka’e peve piko umi Israel ñemoñare ahẽ ojahéita che rehe? Hetáma ahendu oñe’ẽ vai ramo hikuái che rehe. Ko’ágã peje ichupe kuéra péicha: “Ame’ẽ che ñe’ẽ che jehe voi, ta peikuaa porã mandi, peikuaa háicha che aikoveha, ajapotaha pende rehe upe pejerure va’ekue. Che, pende Jára, ha’éma che ñe’ẽ. Pemanóta ha pene re’õngue iñasãita ko yvy ojeiko’ỹha rupi. Pejahéi haguére che rehe, avave umi ombotýmavagui 20 áño ha ojepapa va’ekue, ndoike mo’ãi upe yvýpe. Ame’ẽ va’ekue che ñe’ẽ pohejataha peiko pe yvýpe. Avave ndoike mo’ãi ndaha’éi ramo Caleb ha Josué. Peje va’ekue pende ra’y kuéra ojererahataha upépe tembiguái ramo. Che katu araháta ichupe kuéra pe yvýpe peẽ ndapeipotái va’ekuépe, ha upépe ha’e kuéra ovy’áta. Peẽ pemanóta ko’ápe ko yvy ojeiko’ỹháme. Pende ra’y kuéra oikóta ovaháre ko yvy ojeiko’ỹháme 40 áño pukukue ohasa asývo peẽ pende rovatavy haguére.
Tupã Ñandejára Ñe’ẽ.
SALMO ÑEMBOHOVÁI 105, 6-7a. 13-14. 21-23
R. Tupä Ñandejára ne mandu’ami kena ore rehe.
Ore niko ore rembiapo vai ore ru ypykuéicha,
tuicha rojavy ha ore ky’a ne renondépe.
Egíptope oiko ramo guare ore ru kuéra ypykue,
ndohecha kuaái va’ekue umi mba’e hechapyrãva rejapóva. R.
Pya’ete hesarái umi Tupã Ñandejára rembiapokuégui,
ha ndojapói mba’eve ramo hembipota.
Yvy ojeiko’ỹháme tembi’úre itaryrýi hikuái,
avave oĩ’ỹháme oipy’a ra’ã Tupã Ñandejárape. R.
Hesarái Tupã Ñandejáragui, oipysyrö va’ekue ichupe kuéra,
tuicha ite mba’e ojapo va’ekue Egíptope,
mba’e hechapyrãva ojapo va’ekue Campe
ha mba’e ojehecha’ỹva Mar Rójope. R.
Ñandejára ohundi mo’ã ichupe kuéra,
hembiporavo Moisés katu
oñemoĩ haperãme py’a poräme
ha upéicha ojoko, Tupã Ñandejára pochy. R.
ALELUIA Lc 7, 16b
Aleluia.
Peteï Maranduhára tuicháva osë ñande apytépe
ha Tupä Ñandejára ou ohecha hetäguápe.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?
15, 21-28
Upe ramo Jesús osẽ Genesarétgui ha oho táva Tiro ha Sidón gotyo. Ha peteĩ kuña Canaangua, upe rupi oikóva, oñemboja Jesús rendápe. Ha osapukái: Che Jára, David ra’y, che poriahuverekomína! Che memby kuña niko oĩ mba’epochy poguýpe, ha ombohasa asy eterei ichupe.
Jesús katu nde’íri ichupe mba’eve.
Upe marõ hemimbo’e kuéra oñemboja hendápe, ha he’i ichupe: Eréna pe kuñáme toho ko’águi. Osapukái niko oúvo ñande rapykuéri.
Upépe Jesús he’i: Tupã Ñandejára niko che mbou umi Israelgua, ovecháicha okañýva rekávonte.
Upe jave katu pe kuña oguahẽ ha oñesũ Jesús renondépe, ha he’i ichupe: Che Jára, che pytyvõmína!
Ha Jesús he’i ichupe: Naiporãi niko mitã jurúgui jaipe’a tembi’u ha ñame’ẽ jaguápe.
Pe kuña katu he’i ichupe: Añete niko pe eréva che Jára. Péicharõ jepe, jaguánte avei ho’úva umi tembi’u rembyre ho’áva ijára kuéra meságui.
Upe marõ Jesús he’i ichupe: Nde katu ha’e kuña rejeroviáva che rehe! Toiko upe reipota háicha.
Upepete voi okuera pe imemby kuña.
Ñandejára Jesucristo Ñe’ẽ