MIÉRCOLES 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 36, 1. 4. 5. 10-17

Ore poriahuverekóna Tupã, opa mba’e Jára, ha ema’ẽ, emoasãi nde kyhyje opa tetã apytépe.
Embopyahu umi mba’e rechaukaha, ejapo jevy hechapyrãva, ehechauka nde reko mimbipa ha nde pyapy mbarete.

Embojepota nde pochykue ha ehekuavo hi’ári kuéra, embokusugue umi ore rehe oñemoĩvape, ha emoangu’ipa umi ore rehe ija’e’ỹvape.

Emboatypa Jacob ñemoñaregua ha eme’ẽ jevy ichupe kuéra ijyvyrã yma guaréicha.
Eiporiahuvereko, ore Jára, ne retãgua Israel, nde rérape ojeheróva, ere hague nde ra’y ypykueha.

Eiporiahuvereko nde táva marangatu Jerusalén, repytu’uha. Emoenyhẽ Sión nde pokatúgui, ha nde tupao nde reko mimbipágui.

Umíva umi mba’e rejapo va’ekue tenondete, ehechauka rehayhuha, ha ere toiko umi marandu nde rérape oje’e va’ekue.

Emoengovia nde rehe ojeroviávape, ha ehechauka ne maranduhára he’i hague añetegua.
Ejapysaka ne rembiguái rembijerurére ne retãgua rayhupápe, ha tojekuaa ko yvy jerekuévo ndeha Tupã Ñandejára opa ára reikovéva.

Tupã Ñandejára Ñe’ẽ.

SALMO ÑEMBOHOVÁI 78, 8. 9. 11. 13

Opavave: Tupã Ñandejára, ore poriahuverekokena.

Ani rejopy ore ndive ore rukuéra ypykue rembiapovaikuére.
Pya’e kena ore poriahuvereko, cháke vaípe rojecha. O.

Tupã Ñandejára, eju ore pytyvõ, nde upe ore renohẽva jejopy vaígui.
Nde réra rehehápe, eju ore pytyvõ ha eheja rei oréve ore angaipa. O.

To guahẽ ne renda itépe umi iñapytĩmby oikóva rembijerure,
ha nde pyapy mbaretépe eipytyvõ umi ojejukátavape. O.

Ore niko ne retã. Ore umi nde ovecha, ha nde ore rerekua.
Opa árape romomba’éne, ha rogueropurahéine opa árape. O.

ALELUIA Mc 10, 45

Aleluia.
Che, yvypóraicha aju va’ekue aikóvo tembiguáirõ katu ha ame’ẽvo che rekove anohẽ haguã hetápe ivaívagui.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 10, 32-45

Upe ramo oho hikuái Jerusalénpe, ha Jesús oho tenonde. Ha’e kuéra ohecha ramo upéva, ha umi ohóva hapykuéri okyhyje.

Jesús ohenói jevy ha’eño háme umi 12 hemimbo’e ha he’i ichupekuéra upe ojehútava ichupe: Jaha niko ñaína Jerusalénpe.

Upépe, che, yvypóraicha aju va’ekue, oĩta che moĩva pa’ikuéra ruvicha ha Moisés rembiapoukapy mbo’eha pópe, ha ha’e kuéra ojeruréta ajejuka haguã, ha che me’ẽta ambue tetãgua pópe.

Oñembohory ha ondyvúta che rehe hikuái, che nupã ha che jukáta hikuái. Mbohapy ára haguépe katu aikove jevýta .

Zebedeo ra’y kuéra Santiago ha Juan oñemboja Jesús rendápe ha he’i ichupe: Mbo’ehára, roipota rejapo rojerurétava ndéve.

Ha’e oporandu ichupekuéra: Mba’épa peipota ajapo pende rehe?

He’i hikuái ichupe: Nde reguapývo reisãmbyhy mburuvicha guasu mimbipápe, roipota ore mboguapy peteĩme nde akatu gotyo ha ambue nde asu gotyo.

Jesús he’i ichupekuéra: Peẽ niko nda peikuaái mba’épa pejerure. Peẽ nga’u piko peime pehasa asy haguãicha, che ahasa asýta háicha? Ikatútapa pemboy’u pe iróva che amboy’útava?

Ha’ekuéra he’i: Roime rohasa haguã.

Jesús he’i ichupekuéra: Peẽ añetehápe pemboy’úta pe iróva ha pehasa asýta che ahasa asýta háicha. Peguapy haguã che ykére katu ndaijái chéve ame’ẽ. Che Ru upéva ome’ẽta umi ha’e ombosako’i va’ekuépe.

Umi 10 hemimbo’e ohendúvo upéva, ipochy Santiago ha Juan ndive. Ha Jesús ohenói ichupekuéra ha he’i: Peẽ niko peikuaa mba’éichapa mburuvichakuéra po pohýipe oisãmbyhy umi hetã, ha mba’éichapa poguasu kuéra ave ‘oguereko vai ichupekuéra. Pende apytépe katu nda upéichai va’erã.

Pe mba’e guasuséva oiko va’erã uvei tembiguáirõ. Ha pe itenondeséva pende apytépe, toiko opavave rembiguái ramo. Che, yvypóraicha aju va’ekue, niko ndajúi che rembiguairã rekávo, aikóvo tembiguáirõ katu ha ame’ẽvo che rekove anohẽ haguã hetápe ivaívagui.

Ñandejára Jesucristo Ñe’ẽ