JUEVES 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Tobías arandukápe oĩ háicha

6, 10-11; 7, 1. 9-16; 8, 4-9a

Oike ramo guare hikuái Medíape ha oguahẽtama ramo Ecbatánape, Rafael, Tupã Ñandejára remimbou, he’i Tobíaspe: Che irũ Tobías!

Mba’épa reipota? – he’i ichupe Tobías.

Tupã Ñandejára remimbou he’i ichupe: Ko pyhare japyta va’erã Ragüel rógape, ha’e nde rehegua hína. Ha’e oguereko peteĩ tajýra hérava Sara.

Oguahẽ vove Ecbatánape, Tobías he’i Tupã Ñandejára remimboúpe: Che irũ Azarías, ko’ágä ite voi aipota che reraha Ragüel rógape, ha’e ore pehẽngue hína. Ha Tupã Ñandejára remimbou ogueraha ichupe Ragüel rógape.Ojuhu ichupe oguapy hína ikorapýpe, hokẽ ykére.

Oñemboja ha omomaitei ichupe hikuái, ha ha’e avei ichupekuéra he’ívo: Maiteípa che irũ nguéra. Peguahẽke! Ha ombohasa ichupekuéra hóga ryepýpe.

Vy’a pópe Ragüel omoguahẽ ichupekuéra ha upéi ojukauka peteĩ ovecha. Ojahu hikuái, upéi ojepohéi jevy ha oguapy mesápe. Tobías upéma ramo he’i Rafaélpe: Che irũ Azarías, eréna Ragüelpe ome’ẽ haguã chéve Sárape.

Ragüel ohendu upe karia’ýpe ha he’i ichupe: Vy’ápe kena ehasa ko pyhare, ekaru ha emboy’u. Ndaipóri niko avave omenda va’erã che rajy Sara rehe, nde año ite.

Ndaikatúi ame’ẽ ambuépe, ndéve mante, nde ha’égui che pehẽngue hi’aguĩvéva. Ágã katu, ha’émante va’erã ndéve añetegua. Nde mboyve ame’ẽma va’ekue 7 kuimba’e ñande reheguávape, ha opavave omano pe pyhare, oñemoaguĩta vove hese. Ko’ágã che ra’y, ekaru ha emboy’u, Tupä Ñandejára rehe ae osẽ porãmbáta peẽme.

Tobías katu he’i: Che nda’u mo’ãi mba’eve reme’ẽ meve chéve Sara.

Ragüel he’i ichupe: Néi, oĩ porã. Moisés kuatia ñe’ẽme oĩ háicha ha Tupã Ñandejára oipotágui ame’ẽ ndéve Sara, nde reheguáva. Ko’ágã guive nde ha’éta iména ha ha’e ne rembireko opa ára peve. Che ra’y, Tupã Ñandejára yvága pegua toĩ pene ndive ko pyhare, ohechaukávo peẽme imborayhu.

Ragüel ohenói itajýra Sárape. Oguahẽ vove, itúva ojapyhy ipógui ha ome’ẽ Tobíaspe, he’ívo: Ame’ẽ ndéve ne rembirekorã, oĩ háicha Moisés kuatiápe. Eraha ne ndive nde ru ha nde sy rógape. Tupã, Ñandejára, to me’ẽ peẽme vy’a ha tory.

Upéma ramo Ragüel ohenói hembirekópe, ha ojerure ichupe peteĩ kuatia, ohaihápe ome’ẽha itajýra Tobías rembirekorã, oĩ háicha Moisés kuatiápe. Upe rire ae Tobías okaru.

Upe aja pe kuña ru ha isy osẽ Tobías kotýgui ha omboty okẽ. Tobías opu’ã tupágui ha he’i Sárape: “Epu’ã che rembiayhu ñañembo’e. Jajerure Tupã Ñandejárape ta ñande poriahuvereko ha to ñangareko ñande rehe.”

Pe kuña opu’ã ha mokõivéva oñembo’e Tupã Ñandejárape kóicha: To ñemomba’e guasu Tupã Ñandejára, ore ru kuéra Jára, ha to ñemomba’e guasu nde réra opa ite ára!

Yvága ha opa yvypóra ta nde rovasa opa ára!

Nde rejapo Adánpe ha eme’ẽ ichupe hembirekorã Eva, oipytyvõ haguã ichupe ha oĩ haguã hendive. Ha hese kuéra ae ou opa yvypóra.

Nde ere va’ekue: “Naiporãi kuimba’e oiko ha’eño.

Ajapóta peteĩ oipytyvõ va’erã ichupe ijoguaháva.

Ko’ágã che ajapo ko kuñágui che rembireko, ndaha’éi arekoségui chupénte, romenda porã haguã uvei.

Ore poriahuvereko kena ha ore moingove puku.

Mokõivéva he’i: Amén, Amén, ha oñeno hikuái oke haguã.

Tupã Ñandejára Ñe’ẽ

SALMO ÑEMBOHOVÁI 127, 1-5

Opavave: Revy’a va’erã Tupä Ñandejára rehe rejerovia ramo.

Revy’a va’erã Tupä Ñandejára rehe rejerovia ramo, ha reiko ramo ha’e oipota háicha.
Nde ry’ái repykuégui rekarúne, revy’áne, ha opa mba’épe resẽ porãne. O.

Nde róga pýpe ne rembireko ojoguáta ku parral hi’a hetávape.
Ne mesa jerére katu nde ra’y ha nde rajykuéra ojoguáta umi yvyra roky pyahúpe. O.

Kóicha ojehovasáta upe Tupä Ñandejára rehe ojeroviáva.
Tupã Ñandejára ta nde rovasa Sión guive reikove aja pukukue.
Reikovéta rehecha haguã mba’éichapa Jerusalén opu’ã. O.

ALELUIA Cf. 2Tim 1, 10

Aleluia.
Ñandejára Jesucristo ñane Pysyrohára ipu’aka manóre, ha ombojajái tekove, Marandu porä rehe ae.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha. 12, 28-34

Upe ramo peteĩ Moisés rembiapoukapy mbo’eha, ohendu va’ekue Ñandejára ha umi saduséo kuéra mba’éichapa oñoñe’ẽ apírõ, oñemboja Ñandejára rendápe ha oporandu ichupe: Mávapa umi Tupã Ñandejára rembiapoukapy apytégui pe mba’e guasuvéva?

Jesús he’i ichupe: Pe tembiapoukapy tuichavéva hína: ‘Ehendúke, Israel, Tupã Ñandejára niko peteĩnte. Ehayhu Tupã nde Járape nde py’a ite guive, ne ánga rugua guive ha ne arandukue reheve, ha ne mbaretekue reheve.

Upe rire oúva he’i kóicha: ‘Ehayhu nde rapichápe rejehayhu háicha nde’. Ndaipóri tembiapoukapy mba’e guasuvéva ko’ãvagui.

Upe Moisés rembiapoukapy mbo’eha he’i ichupe: Iporã ite, mbo’ehára. Añete upe eréva: Peteĩnte oĩ Tupã ha ndaipóri ambue. Ha jahayhu ramo Tupã Ñandejárape ñande py’a ite guive, ñane ñe’ã ha ñane mbaretekue reheve, ha jahayhu ñande rapichápe ñande jupéicha, iporãve opa mymbahapy ha mymbajuka altárpe oñekuave’ëvagui.

Jesús, ohechávo pe tembiapoukapy mbo’eha he’i porã hague, he’i ichupe: Namombyrýi reime Tupã Ñandejára remisãmbyhýgui. Ha avave noporandusevéi ichupe.

Ñandejára Jesucristo Ñe’ẽ.