MIÉRCOLES SEMANA XIX TO

Ko’ágä   ñahendúta Tupã Ñandejára ñe’ẽ Ezequiel arandukápe oĩ háicha           9, 1-7; 10, 18-22

Ahendu Tupã Ñandejára oñe’ẽ hatãva chéve: Oguahẽma umi oinupãtava ko táva guasu, peteĩ teĩ kyse puku ipópe oporohundipa haguã!

Ahecha upévo, 6 kuimba’e oike tupao rokẽ yvate gotyogua rupi, peteĩ teĩ, yvyra poguasu ipópe. Ijapytépe kuéra ou peteĩ oñemondéva ao línope, oguerekóva ipópe kuatia ojehaiha. Oike ha opyta hikuái altar vrónse ypýpe.

Upévo Tupã, Israel Jára, opu’ã tekove ipepóva ra’ãnga árigui ha oñemboja tupao rokẽme. Ohenói kuimba’e ijao línovape ha oguerekóva kuatia ojehaiha, ha he’i ichupe: “Eguata pe táva guasu Jerusalén rehe ha emona opavave syváre peteĩ mba’e ohechauka va’erã umi oñembyasýva ha ojepy’apývape mba’e vai eta upépe oikóvare.”

Upéi ahendu he’iha umi ambue kuimba’épe: “Tapeho hapykuéri peiko pe táva guasúre ha peñepyrũvo che tupaógui, pejuka peiporiahuvereko’ỹre avavépe, itujáva, imitãva, kuñataĩ, mitã ha kuña kuéra. Ani pepoko umi isyva ñemona va’ekuére.” Upépe, ha’ekuéra oñepyrũ umi moakãhára  tupao renondépe oĩvagui.

Upéi he’i ichupe kuéra: “Tapeho tupaópe pemomarã ha ijerekue pemoenyhẽ te’õnguégui”. Ha’e kuéra osẽ ha oñepyrũ oporojuka táva guasu tuichakue.

Upévo Tupä Ñandejára reko mimbipa oho tupao árigui ha oñemoĩ umi tekove ipepóva ári. Umíva ohupi ipepo ha oheja yvy. Ha ahecha mba’éichapa opu’ã umi rruéda reheve ha opyta hikuái tupao rokẽ kuarahy resẽvo guápe. Tupã Israel Jára reko mimbipa oĩ hi’ári kuéra. Ha’e kuéra hína umi che ahecha va’ekue, Tupã Israel Jára guýpe, ysyry Quebar rembe’ýpe. Ha upépe ahecha kuaa mba’épa ha’e kuéra. Maymáva hova irundy ha ipepo irundy, ha ipepo guýpe ojekuaa peteĩ mba’e ojoguáva kuimba’e pópe. Hova kuéra ha’eténte avei umi tekove ipepóva rova ahecha va’ekue  ysyry Quebar rembe’ýpe. Peteĩ teĩva oho henonderãvo.

Tupã Ñandejára Ñe’ẽ.

SALMO ÑEMBOHOVÁI       112, 1-6

R. Tupã Ñandejaraichagua ndaipóri.

O bien:

Aleluia.

Tupä Ñandejára rehe ojeroviáva

to momba’e guasu ichupe, to guerohory héra.

Tupä Ñandejára réra to ñemomba’e

guasu, ko’ágä  ha opa ára. R.

Kuarahy osẽ guive oike peve héra to ñemomba’e guasu.

Tupä Ñandejára oĩ tetã nguéra ári,

imimbikue yvága rehe iñasãi. R.

Tupã Ñandejára ichagua ndaipóri, ha’e oiko amo yvate,

ha ojayvy omaña haguã yvága ha yvýre. R.

ALELUIA Cf. 2Tes 2, 14

Aleluia.

Tupä Ñandejára ñane renói Marandu porä rupi,

jaguereko haguä Ñandejára Jesucristo mimbipa.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                18, 15-20

Upe ramo Jesús he’i hemimbo’ekuérape:

Nde rapicha ojapo ramo nde rehe ivaíva, eñe’ẽ hendive pene añoháme ha ehechauka ichupe ojavy hague. Ne rendu ramo, repyta porã jevýne hendive. Ha na nde renduséi ramo katu, ehenói peteĩ térã mokõime, ikatu haguã opa oje’éva toje’e mokõi térã mbohapy rovake. Ha ichupe kuéra nohenduséi ramo katu, emombe’u opavave rovake tupaópe. Ha upépe nohenduséi ramo katu, pereko ichupe pende rehegua’ỹva ramo térã viru ombyatýva Rómape guarãicha.

Añetehápe ha’e peẽme, opa mba’e peẽ pe apytïva ko yvy ári, oñeapytĩta avei yvágape. Ha opa mba’e peẽ pejoráva ko yvy ári, ojejoráta avei yvágape.

Che ha’e avei peẽme: Mokõi pende apytégui peñemoĩ ramo peteĩ ñe’ẽme ha peñembo’e he Túva yvágape oĩvape pejerure haguã ichupe oimeraẽ mba’e, ha’e ome’ẽta peẽme katu ete. Mokõi térã mbohapy oñemboaty ramo che rérape, upépe aiméta che, hendive kuéra.

Ñandejára Jesucristo Ñe’e.