MIÉRCOLES SEMANA XXXI TO

Ñahendúta Tupã Ñandejára Ñe’ẽ San Pablo ohai va’ekue Filipos guápe                      2, 12-18

Che pehẽnguekuéra pohayhúva, pene ñe’ẽ rendu haguéicha chéve opa ára, ndaha’éi aime ramo guare pende apytépente, ko’ýte kena pene ñe’ẽ rendu ko’ágä  che pore’ỹme. Pemba’apo kena pene ñesẽ ivaívagui rehehápe pende py’a ite guive. Tupã Ñandejára voi niko pende poriahuverekógui pene pytyvõ peipota haguã pe iporãva, ha pene pytyvõta pemoguahẽ haguã hu’ãme.

Pejapo kena opa mba’e pengururu’ỹre ha pekaguai’ỹre ojuehe, ani haguã avave ojuhu he’i va’erã pende rehe, ha peiko haguã Tupã Ñandejára ra’y imarã’ỹva ramo ko’ã tekove aña ha mba’e vai apoha apytépe. Ijapytépe kuéra pemimbi peẽ mbyja itáicha pyhare.

Peñe mohatã kena pe marandu oporo moingovévare. Upéicha, oúvo Cristo che py’a rory va’erã pende rehe, aikuaa pype nañani reíri ha namba’apo reíri hague. Che rekove jepe ojepe’árõ che hegui, oĩmbave haguã pe kuave’ẽmby peropojáiva Tupã Ñandejárape pejerovia rupi, che avy’a ha amboja’óne pe vy’a pene ndive. Pevy’áke peẽ avei ha peike che vy’ápe.

Tupã Ñandejára Ñe’ẽ.

SALMO ÑEMBOHOVÁI     26, 1. 4. 13-14

R. Tupä Ñandejára upe che rekove ohesapéva

Tupä Ñandejára upe che rekove ohesapéva, ha upe che pytyvõva.

Mávagui piko akyhyjéta? Ñandejára oñangareko che rehe,

Máva piko che mongyhyjéta? R.

Peteĩ mba’énte Tupä Ñandejárape ajerure ha aipota.

Tupaópe aikose aikove aja pukukue, hese ajepy’a

mongeta haguã, ha’e che mbopy’a rory haguã,

ichupe amomba’e guasu haguã. R.

Aikuaa Tupä Ñandejára imba’e porãtaha che ndive

aikove aja pukukue. Pejerovia Tupä Ñandejára rehe.

Pende py’a guasúke ha ani pene ate’ỹ.

Añetehápe ha’e peẽme, pejerovia Tupä Ñandejára rehe. R.

ALELUIA 1Ped 4, 14

Aleluia.

Pevy’a va’erä oñeñe’ë vaipa ramo pende rehe Ñandejára Jesucristo réra pemomba’égui, Tupä Ñandejára Espíritu oguejýgui pende ári.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    14, 25-33

Upe ramo heta yvypóra oho Jesús rapykuéri, ha ha’e ojere he’i ichupe kuéra: “Oimérõ oúva che ndive, ha ohayhuve che hegui itúvape, isy, hembireko, ita’ýra kuéra, ityke’ýra ha ityvýra kuéra, heindy kuérape, ha ijupe voi, ndaikatu mo’ãi oiko che remimbo’e ramo. Ha pe ohupi’ỹva ikurusu ijapére che moirũ haguã, upéva ndaikatúi oiko che remimbo’érõ.

Peteĩva peẽ ojaposérõ peteĩ óga yvate, ndoguapy raẽi nga’úpa ohecha mbovýpa ohupitýta ichupe, ohecha haguã oguerekótapa ojapopa haguã? Upéicha’ỹrõ, omoĩ ramo hopytarãnte ha upéi naikatúi ojapopa, ohecháva guive oñepyrũne oñembohory hese. He’íne hikuái: ‘Ko kuimba’e oñepyrũ hóga ha ndaikatúi ojapopa.’

Térã peteĩ mburuvicha guasu ohótarõ oñorairõ ambue mburuvicha guasu ndive, ndoguapýi nga’úpa ohecha 10.000 ñorairõhára rehevépa ikatúne ombohovái pe hi’ári oúvape 20.000 reheve? Ha ndaikatu mo’ãi ramo ombohovái ichupe, pe ambue mburuvicha guasu oĩvo gueteri mombyry, omondóne hendápe hembijokuái ojerurévo oñorairõ’ỹ haguã. Aipórõ, oimeraẽva peẽ ndohejapáiva opa oguerekóva, ndaikatúi oiko che remimbo’érõ.”

Ñandejára Jesucristo Ñe’ẽ.