MIÉRCOLES VIGÉSIMO SEXTO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Nehemías arandukápe oĩ háicha   2, 1-8

Upe ary Nisánpe, 20 áñoma Artajerjes ojupi rire mburuvicha guasúrõ, ha aitykua jave ichupe ivino, ohecha che rovasy, ha oporandu chéve: Mba’ére piko nde rovasy? Ndojekuaái nde rehe nde rasyha. Oĩ nde py’apýva.

Tuicha añemondýi, ha ha’e ichupe: Háa, che ruvicha. Mba’éicha piko ndajepy’apy mo’ãi? Amo cheru kuéra ypykue oñeñotỹ haguépe niko sarambi kuépe oĩ opa mba’e. Óga kuéra ho’apa ha táva rokẽ katu ojehapypa.

He’i chéve ha’e: Mba’épa reipota ajapo?

Añembo’e rire Tupã Ñandejára yvágape guápe, ha’e ichupe: Che ruvicha, iporãta ramo ndévena che mondo Judápe, amo cheru kuéra ypykue oñeñotỹ haguépe, ta mopu’ã jevy opa mba’e.

Oporandu chéve mboy árapepa aguahẽta ha araka’etépa aju jevýta. Hembireko katu oguapy hína ijykére. Ha’e ichupe araka’épa ikatúne aju jevy.

Ho’a porã ichupe ha che reja aha. Upéi katu ha’e ichupe: Che ruvicha, iporãta ramo ndéve na che mbokuatiami, ahechauka haguã mburuvicha kuérape oĩva amo ysyry Éufrates mboypýri. Ani ágäche jokótei hikuái ahakuévo Judápe. Aikotevẽta avei kuatia ahechauka haguã Asáfpe, nde ka’aguykuérare oñangarekóvape, ome’ẽ haguã chéve yvyra amoatyrõ haguã tupao rokẽ, korapy táva jerére oĩva ha amopu’ã haguã che rogarã.

Opa ko’ã mba’e iporãmba Artajérjespe, Tupã Ñandejára imba’e porãva oĩgui che ndive.

Tupã Ñandejára Ñe’ẽ.

SALMO ÑEMBOHOVÁI 36, 1-6

Opavave: Aníke che resarái ndehegui Jerusalén.

Babilonia ysyry rembe’y rupi roguapýva rojahe’o,

Sión rehe ore mandu’ávo.

Sáuse rakãre ysyry rembe’y rupi opu’ãva,

romosãingómiva ore mbaraka. O.

Upépe umi iñapytĩmby ore reraha

va’ekue  ojerure oréve ropurahéi haguã.

Umi ipy guýpe ore jopýva ojerure oréve rombovy’a haguã:

“Pepurahéi oréve purahéi Sión rehegua.” O.

Mba’éicha piko aipo ropurahéita,

purahéi Tupãme guarãva tetã ambuépe?

Nde hegui che resaráirõ

Jerusalén ta ijapa che po. O.

Che kũ toja che apekũre na

che mandu’ái ramo nde rehe,

namoĩri ramo Jerusalén tenondete

opa umi mba’e che mbovy’ávagui. O.

ALELUIA Flp 3, 8-9

Aleluia.

Opa mba’épe che ahecha yty ramo, amomba’éma guive Cristope ha aime hendive.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha   9, 57-62

Upe ramo oho aja hikuái, tapére peteĩ kuimba’e he’i Jesúspe: Che Jára, che romoirũta mamo rehohápe.

Jesús he’i ichupe: Aguara’i niko oguereko ikeha, ha guyra kuéra hupa. Che, yvypóraicha aju va’ekue  katu, ndarekói mamo ambojeko haguã che akã.

Jesús he’i ambuépe: Eju che ndive.

Ha’e katu he’i: Che Jára, che rejána taha raẽ ta ñotỹmi che ru.

Jesús katu he’i upévape: Eheja umi omanómava to ñotỹ umi omanóvape. Nde katu tereho ha emoherakuã Tupã Ñandejára sãmbyhy.

Ambue katu he’i avei ichupe: Che Jára, ahase ne ndive, che rejami raẽna taha ta momarandu che róga guápe. 

Jesús ombohovái ichupe: Pe arádo omoĩva ipópe ha oma’ẽva hapykuévo, naiporãi Tupã Ñandjára sãmbyhýpe guarã.

Ñandejára Jesucristo Ñe’ẽ