Ñahendu Jesús Ñe’ẽ. 2 de octubre: Ángeles Custodios ára

Escucha el evangelio y la reflexión en: https://youtu.be/yBV68fh9az0?si=QBAY-QIcgAJhdthE

2 de octubre: Ángeles Custodios ára Mateo 18, 1-5.10

Upe jave, Jesús disípulo kuéra oñemboja hendápe, ha oporandu chupe: — Máva piko pe tuichavéva Ñandejára rréinope.

Upépe Jesús ohenói peteĩ mitã ha omoĩ ijapytépekuéra. Upéi he’i: — Añete ha’e peẽme, ndapeikói jeýrõ mitãicha, ndapeike mo’ãi Ñandejára rréinope.

Pe imirĩva ko mitãicha, upéva tuichavéta Ñandejára rréinope. Peẽ peguerohory ramo mitã ko’ãichagua, chéve che rerohory hína.

Aníke peapo’i umi ojeroviávape che rehe mitãicha. Cháke umi ángel yvágape oĩva oñangareko hína hesekuéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mitã michĩva, onase ramóva, térã onase mboyve omanóva, niko oñehenói anhelíto. Ha’ekuéra inosénte rupi, ndorekói rupi pekádo niko jarovia ohoha hikuái Ñandejára rendápe yvágape.

Umi anhelíto ipepóvaicha ovevéva hína Ñandejára jerére. Ñande ypykue guarani niko, orovia vaekue oihã heta espíritu, Tupã ojokuáiva, oñangarekóva opa mba’ére. He’i hikuái oĩha y jarýi, ka’aguy jarýi hamba’e. Ha umíva odefende mymba ha ka’aguy, ani haguã oñehundi, ha ojere umi ombyaíva kóntrape.

Ajépa tuichaite oiméne iñangekói hína umi y, ka’aguy ha mymba saite jarýi.
Ko árape ñanemandu’a hína umi Ñandejára anhél oñangarekóva ñande rehe, ñanemoirũva ñane rembiapo ha ñande rapépe. Ñandejára voi ojokuái ichupekuéra ñanepytyvõ haguã tembiapo porãme, vy’a ha mborayhúpe, ha avei ñanemoirũ haguã jajehekýi haguã añágui ha opaichagua mba’e vaígui.

‘
Ha’e kuéra niko espíritu. Ndojekuaái ha ndahetéiramo jepe oime ñanendive. Ombohasa ipu’aka ha ojykeko ñande rehe ani haguã ñasẽ Ñandejára rapégui. Ha’ekuéra ndaikatúi ojapo umi ñande jajapo vaerãva, ndoipe’ái umi ñande jaipe’a va’erãva.

Ñanemoirũnte, oma’ẽ ñande rehe ha omyaña upe ñande ñamyañaha gotyo avei. Oipeju hatã ñande favórpe.

Hesu he’i avei umi anhélkuéra oma’ẽ ha omoirũveha umi ikangývape, mitãnguéra ha imirĩvéva rehe. Animo’ãke aipóramo jajapo ivaíva hese kuéra, he’i Hesu.

Cháke umi anhél hendive kuéra oikóva Ñandejára rováre oma’ẽ hína, he’i. Reroviápa che reindy ha nde che irũ, oimeha nde ykére ha nde jerére umi Ñandejára anhél, hembijokuái nemoirũva nde rapépe ha oñangarekóva opa mba’ére. Rejevalépa hesekuéra sapy’ánte.

Pa’i Alberto Luna.