Ñahendu Jesús Ñe’ẽ. Miércoles 26º Durante el Año

Escucha el evangelio y la reflexión en: https://youtu.be/tSyZWjWWiVg

Miércoles 26 Durante el Año Lucas 9, 57–62

Upérõ Jesús ha umi hendive oĩva oguata jave ohóvo tapére, osẽ peteĩ he’i Jesúspe:— Aháne nendive mamo rehohápe.

Ha Jesús he’i chupe: — Aguara’i niko oguereko ikeha, ha guyrakuéra hupa. Che, kuimba’éicha aju vaekue, katu ndarekói mamo ambojeko hag̃ua che akã.

Upéi Jesús he’i ambuépe: — Eju che ndive.

Ha’e katu he’i: — Che ra’arõna tañotỹ raẽ che ru, ha upéi taju.

Jesús katu he’i upévape:— Eheja omanóva toñotỹ omanóvape. Nde tereho emyerakuã Ñandejára Réino.

Oĩ katu he’íva Jesúspe: — Mbo’ehára, che niko ahase nendive. Che ra’arõna taha raẽ tamombe’u che rogayguápe, ha upéi taju nendive.
Jesús he’i chupe: — Arádo omoĩva ipópe ha oma’ẽ mantéva hapykuévo, upéva na’iporãi Ñandejára Réino peg̃uarã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Ñanemandu’ami umi purahéi ojejapóva política hápe. Oĩ ningo he’ĩva: “Amboykéne che machete, che asada, che arado, sapy’ánte che renõiro che partido”.Ambué katu he’i: “Ñamanórõ ñamanóne por el bien del Paraguay”. Ha he’ímiva voingo avei Emiliano Cháco pýre osununúramo ohóvo: “Taheja che ru che sy, taheja opa ahejáva, ko che retã rayhupápe tamano jepe che ave” (Rojas Silva rekávo).

Ha añete hape oiméramo jahayhu etereíva ningo nañambyasýi jehasa asy ha nañaponderái javorái ivaivéva rehe, oiméramo oikotevẽ mba’e ñande rehe ha ñanerenói. Ha péva ningo pe Jesús he’íva umi omoirũsévape ichupe. Ojeity va’erãha añetehápe tapépe. Toheja opa ohejáva Ñandejára rayhupápe, oha’arõ’ỹre jeiko porã ha oñemosã’ỹre hóga térã hóga guáre, itúva térã isýre jepe. Ha opoi paite haguã ijehegui Ñandejára pópe, ojerovia pype ha’e oñangareko ha ome’ẽne haguã opa oikotevẽva.

Tuicha mba’e hína pe Ñandejára oma’ẽ ñande rehe ha ñanerenói. Tuichave mba’e ñande partido, ñane retã ha ñande rogagua ñehenóigui. Ha umi oñandúva Jesús ohenoiha chupe iñirũrã ovy’a va’erã.

Ndépa che irũ ha che reindy reñandu Ñandejára nerenói ha ojevaleseha nde rehe. Ha reikuaápa nde rapicha, kuña térã kuimba’e, ymave guare térã ko’ãgagua, oñandu pypuku va’ekue pe Ñandejára ñehenói ha ome’ẽ mbaitéva ijehegui Ñandejára rayhupápe, oñeha’ãvo oiko Jesús oiko haguéichaite.

Pa’i Jasy.