Ñahendu Jesús Ñe’ẽ. 20 de diciembre. Feria de Adviento

Escucha el evangelio y la reflexión en: https://youtu.be/2eORkCeCSX4

20 de diciembre. Feria de Adviento

Lucas 1, 26 – 38

Ha 6 mése haguépe, Ñandejára omondo ánhel Graviélpe Nazarétpe, opytáva Galiléape. María, peteĩ kuñataĩ marã’ỹ, oikómiva upépe. Ha’e niko ome’ẽma vaekue iñe’ẽ omenda haguã Josére. José niko David ñemoñare va’ekue.

Ñandejára ángel oike pe María oĩháme ha he’i chupe: — Maitei María. Ñandejára nderovasa. Ñandejára oĩ ne ndive.

María oñemondýi opytávo. Ha oikuaase mba’épa he’iséne pe maitei upéva. Ñandejára ánhel he’i chupe: — Ani rekyhyje María. Ñandejára niko tuicha nde rovasa. Nde rye guasúta hína, ha ne membýta. Rembohérata pe mitã Jesús.

Pe mitã tuicha mba’éta hína, ha oje’éta hese: “Ñandejára Yvatetegua Ra’y”. Ha Ñandejára omoĩngóta chupe rréi ramo, ijypykue Davídcha. Ha’e oisãmbyhýta hetã Israel opa árape guarã.

María oporandu Ñandejára ánhelpe: — Mba’éichata piko péicha, ko che ne’ĩrava amenda.

Ñandejára ánhel katu he’i chupe: — Espíritu Santo rupíta hína péva. Ñandejára Yvatetegua ne añuãta ipokatúpe. Upévare, pe mitã hérata Ñandejára Ra’y Marangatu. Ha ne príma Isabel imembýta hína avei, iguãiguĩma ramo jepe. Ku oje’e vaekue ndaikatuiha imemby, ojapóma hína 6 mése hye guasuha. Ñandejárape guarã niko ndaipóri ikatu’ỹva.

Upépe María osẽ he’i: — Che niko Ñandejára rembiguaimínte. Tojapo che rehe pe ere háicha. Ha Ñandejára ánhel oho.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Mba’épa ojeruréne ñandéve Ñandejára. Ñande ñaimo’ã ojeruretaha ñañembo’eve, jaha tupaópe ha mba’e. Ha ñahendu Ñandejára ojerureha Maríape oheja haguã heñói ipype tekove pyahu, hye guasúta ha imembytaha. Upéva katu noha’arõi ete voi raka’e María. Oñemondýi voi ha oporandu mba’éichapa oikóta upéva.

Ñandéve avei oguahẽ sapy’a Ñandejára ojerure ñaha’arõ’ỹ etéva. Ñanemondýi ha ñande pe’áva ñande guatágui ha ñaporandu avei mba’ére piko Ñandejára péicha ojapo che rehe.

Mba’e mba’e piko ajapo raka’e ajeve péicha ou ojehu chéve. Jajetyvyro, jajepokã ha ja’e ñande py’ápe: Che ningo ndaikatu mo’ãi aropu’aka kóva. Ñakañy ha ndajahechái mba’éichapa ñasẽta tapépe.

Ñama’ẽmína che irü ha che reindy ko kuñatãimi poriahu rehe, ñandéicha avei ndoikuaa porãiva mba’etépa hina ha mba’eichaitépa oikóta pe Ñandejára ojeruréva. Upéicharamo jepe he’íva néi, amen Ñandejára, toiko che rekovépe nde reipota háicha.

Pa’i Jasy.