Ñahendu Jesús Ñe’ẽ. Domingo 11ª Tiempo Durante el Año

Escucha el evangelio y la reflexión en: https://youtu.be/BSGSHyKPbo0

Domingo 11º Durante el Año Ciclo A Mateo 9, 35 – 10, 1. 5a. 6-8

Jesús ohasa ohóvo umi pueblo peteĩ teĩ rupi. Ha mamo oĩháme itupao kuéra, upépe ha’e oporombo’e. Omombe’u upe ñe’ẽ porã Ñandejára Reino rehegua, ha omonguera opaichagua hasývape. Ha ohechávo hetaha umi ijatýva, oiporiahuverekoeterei
chupekuéra. Ohecha kuaa ha’ekuéra ikane’õ ha ikangypaha ku ovecha ijara’ỹvaicha. Ha he’i apostol kuérape: Ajépa tuicha pe kokue ha heta hi’a, omono’õ vaerãnte mbovy.

Upévare, pejerure pe kokue járape tombouve umi ou va’erãme omono’õ. Jesús ohenói umi 12 apostol kuérape ha ome’ẽ chupekuéra pu’aka omosẽ haguã Aña, ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’ykuéra. Felipe ha Bartolomé, Tomás ha Mateo, impuesto ombyatýva Rroma peguarã. Avei Santiago, Alfeo ra’y ha Tadeo. Oĩ
avei Simón, ha Judas Iscariote, pe upéi otraiciona vaekue Jesúspe.

Jesús omondo hembiaporãme ko’ã 12 kuimba’épe kóicha ombo’e rire chupekuéra: Tapeho umi ovecha Israelgua okañymbáva rendápe. Tapeho peikuaauka hi’aguĩmaha Ñandejára Reino. Pemonguera hasýva, pemoingove jevy omanóvape, pemonguera umi leprósope ha pemosẽ Aña opavavégui. Peẽme niko oñeme’ẽ rei ko pu’aka, ani peẽ pejerure hese mba’eve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ajépa niko oguapy ñande rehe ñañepyrũtaramo umi tembiapo guasu ha sa’i ñaime. Ha ñane ño mba’éramo katu ni ndaja’eséi. Ha avei sapy’ánte jahechávo heta mba’e oñeikotevẽha ñande rógape, ñande barrio ha ñane comunidad pe, ha ñande ndaikatúi jajapo ha ñamohendapa. Ñande rasapa sapy’ánte.

Jesús niko ohenói iñirũrã oñandúguima voi ha’eño ndaikatumo’ãiha ohupyty opavavépe. Ohenói raẽ niko umi 12 apóstol ha upéi katu ohenoivéma ha ojokuái umi 72 disípulo pe. Ha péicharamo jepe ndohupytypái.

Upéva oguapy ipy’áre. Ha’e niko ohupytyse umi ovecha okañymbáva, umi ndoúiva hendápe. Ha umíva rekávo ojokuái iñirũ nguérape. Upévare niko ipahápe he’i ñañembo’e ha jajerure haguã Ñandejárape, ha’e ohenói ha ojokuái haguã hetavépe oho va’erãva umi avave nopenáiva rendápe.

ÑAÑEMBO’E OÑONDIVE

Ñandejára Ore Ru, ehecháva mba’éichaitépa heta ore rapicha okañy ha ohundi hekove. Ehenói ha ejokuái ore apytégui ohóva omoguahẽ ichupekuéra ne ñe’ẽ. Amen.

Pa’i Alberto Luna.