Ñahendu Jesús Ñe’ẽ. Lunes 11ª Tiempo Durante el Año

Escucha el evangelio y la reflexión en: https://youtu.be/7sJlGBbGW_I?si=liu0WL-AKP1lWHdb

Lunes 11º Durante el Año

Mateo 5, 38 – 42

Upérõ Jesús he’i idisípulokuérape: – Peikuaa oje’e hague: “Oĩ ramo ohesa mombúvahapichápe, péva tojehesa mombu. Ohãi mopẽva hapichápe, péva toñehãi mopẽ.”

Che katu ha’e peẽme: “Ani pemyengovia pe ojapo vaívape pende rehe. Oĩ ramo nderova petéva, eheja tanderova pete jovái. Oĩ ramo nde rerahaséva karai juez renondépe oipe’aségui ndehegui nde ao, eheja togueraha nde ahoja ave. Ha oĩramo oguerojaukaséva ndéve peteĩ mba’e pohýi una légua, eraha chupe mokõi. Oĩ ramo omba’e jeruréva ndéve, eme’ẽ chupe. Oĩ ramo omba’e poruséva, eiporuka chupe.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime ramo oñe’ẽ vaíva ñande rehe, ñande ja’óva, itie’ỹva ñandéve, ñane tentáva ha ñane ra’ãva, upéva ja’e ñande ohekaha mbarakaja kupy hina. Oheka hina ágãiténte ñapu’ã ha jaikuaauka ichupe.

Tuguy raku ha pochýre ñambohovái ramo ñande rapicha iñaña ha ojapo vaíva ñande rehe niko, mbykyete jajapo vaive ha ñambojo’ave haguã hese upe ha’e ojapo haguégui ñande rehe. Iporãvénte ani ñambohovái ivaíva ivaive haguãicha.

Jajeínte ikatúrõ, ñañeha’ã ñañetrankilisa, ñambohasa upe pochy rata. Ha upéi py’aguapýpe jaheka mba’éichapa ñañomohendáta oñondive ñasẽvo tape porãme. Cháke ñande ñane tie’ỹ ramo itie’ỹvape, jasapukái ramo osapukáivape ha ñambyepoti ramo ñanenupãsévape, jaikéta aña javorái kuápe ikatu’ỹve hágui ñasẽ péicha péichante.

Heta rasáma mba’e vai oĩ ko yvy apére. Hetaitereíma oime oñorairõ, oiko vai ha ojejukáva jepe. Umi tetã imbaretevéva tuicha tuicha imboka ha mbyky hina opu’ã haguã oñuakãre ombokapu ojuehe térã katu umi michĩvéva akãre.

Oime hína umi tetã ojapóva mboka guasu kuéra ha oñemúva hese. Pe “industria bélica” oñehenóiva omomýi hetaiterei rasa pira pire ko yvy ári.

Umíva ojeporu vaerã mo’ã kurioñemongaru haguã iñembyahýivape, oñepohano haguã hasýva ha oñemopu’ã haguã óga umi hóga’ỹvape guarã, térã katu escuela oñembo’e haguã mitãme.

Hi’ãite ani ñande ñambojoapyve ñorairõ ha jeiko vai ojoapytépe ha ñambojo’ave jeiko asy. Iporã mante. Hesu niko ou omboguévo umi tata Aña omyendýva ñande apytépe. Ha upevarã ñanembo’e, upe ojapo vaívape ñande rehe ñambohovái va’erãha iporãvape, ha ñambojo’a rangue ichupe ivaívape, ñamyengovia iporãvape.

Ikatu ñande ja’e: Hesu niko Ñandejára ha ha’e ikatu kuri ojapo upéicha, che katu ningo che kangy ha che ruguy raku ha ijetu’u aheja rei haguã umi ojapo vaívape che rehe. Mba’épa nde reñandu che irũ, ha nde che reindy. Ikatúnepa.

Pa’i Alberto Luna.