Ñahendu Jesús Ñe’ẽ. Domingo 14ª Tiempo Durante el Año

Escucha el evangelio y la reflexión en: https://youtu.be/3PeJTrhIbbk

Domingo 14º Durante el Año Ciclo B

Marcos 6, 1 – 6a

Jesús oho Nazarétpe, iválle okakuaa haguépe. Ha idisípulokuéra oho hendive. Ha oguãhẽvo pytu’uha ára, oñepyrũ ombo’e tupaópe. Ha umi ohendúva Jesúspe, ijurujaipa opytávo ha he’i joa: — Mba’éicha haguã piko oikuaa ko’ã mba’e. Mba’éicha rupi piko peichaite iñarandu, ha ojapo umi milágro ojapóva. Ndaha’éi nga’u piko kóva ku carpintéro María memby. Tyvýra niko Santiágo, José, Judas ha Simón. Ha jaikuaapa niko máva-mávapa heindy.

Ha ipochypa hikuái hendive. Jesús katu he’i chupe kuéra: — Opa rupi niko profétakuéra oñemomba’e. Hógape, hogagua apytépe ha ivállepe katu nahániri.

Ha upépe ndaikatúi ojapo heta milágro. Mbovymi hasývarente omoĩ ipo ha omonguera. Ha opondera Jesús umi upepegua ndojeroviaiha hese.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ha che valle porãite opaitéva rejajái che ahógui nderehe che ko’ẽva ndavy’ái. Mombyry ajesareko rohechátante vaicha remimbipa pe amo ñaimo’ãva ku mbyja.” Peicha he’i pe purahéi Villarrica che siuda. Jahayhu ningo pe ñande valle ajépa. Umi hetaite jakorre hague ñandekakuaa irũngue ha ñane hénte kuéra ndive, ha’ete ku ñanerenóiva.

Jaikove jevýta vaicha jaháramo upérupi ñambohasa techaga’u. Ha péicha avei raka’e Hesu ohayhu pe iválle onase ha okakuaa hague. Ha ñahendu mba’éichapa oho oguahẽ pe tupao hetaite oñembo’e ypy haguépe ivallegua ndive.

Ha’ekuéra katu ndajapói ichupe mba’éramo. Kóva ningo ñandeichaguánte, he’i. Mba’éiko ojopi ichupe ou orembo’ese gua’u, ku jaikuaa porãva moõgua ha mba’eichaguápa.

Ha’ete ku oipotáva hikuái ou hendápe yvágagui oguejýva mba’e ojerovia haguã hese.

Ñande avei che irũ ha che reindy ikatu ñañandu umi ñande rogagua, ñane hénte, ñane vesíno, ñande barrio ha ñande vallegua, mba’eve guasu nañanembo’e mo’ãi. Jaikuaa porã ningo ñandeichaguanteha avei hikuái.

Ñandejára katu ojevale umi ñandeichaguáva rehe, umi ñande róga jerére oikóva rehe, omoguahẽ haguã ñandéve iñe’ẽ, ñembo’e, ha ñanomoirũ haguã Hesu rapére. Aníkena epyta eha’arõ oguejy nerenondépe peteĩ ánhel yvágagui. Ehendu mba’éichapa Hesu oguahẽ ne rendápe nde rapicha ndeichaguáva rupive.

ÑAÑEMBO’E OÑONDIVE

Ñandejára Hesukrísto, nde niko reikose va’ekue oreichaguáva, rehayhu nde válle ha ne héntekuérape. Ore pytyvõmi ore rohayhu ha rojerovia haguã ore vallegua ha ore rapicha oreichaguáva rehe, nde rejokuáiva ore rendápe. Amén.

Pa’i Alberto Luna.