Ñahendu Jesús Ñe’ẽ. Domingo 15ª Tiempo Durante el Año

Escucha el evangelio y la reflexión en: https://youtu.be/M2MtmgU-9Ws

Domingo 15º Durante el Año Ciclo B Marcos 6, 7 – 13

Upérõ Jesús ombyaty umi 12 disípulope omondo haguã mokõi-mokõi, ha ome’ẽ chupekuéra pu’aka omosẽ haguã demóño kuéra. He’i chupekuéra: — Ani peraha mba’eve pe’u va’erã tapére. Pláta ave ani peraha. Yvyra pende pópe, peguata haguãnte peraha, ha sapatu pende pýre. Ao pembojopyru vaerã katu nahániri.

He’i chupekuéra: — Peguãhẽ ramo peteĩ ógape, upépente pepyta pesẽtaha ára peve. Ha na pene moguãhẽséi ramo térã na pene renduséi ramo katu, pesẽnte upégui. Ágã pesẽnguévo katu, peityvyro pende pýgui yvytĩmbo. Péicha oikuaáta hikuái Ñandejára okastigátaha chupekuéra.

Ha osẽ idisípulokuéra oñemoñe’ẽ opavavépe he’ívo chupekuéra ojevy haguã Ñandejára rendápe. Omosẽ hikuái heta demóño, ha omonguera heta hasývape omonávo hesekuéra aséite.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Che apénte che níchope, che sánto renondépe, che añónte añembo’e Ñandejára ha Tupãsýme.” Oiméko péicha he’íva ndoikatuvéigui oho tupaópe. Ha mba’étepa ja’éta ichupe.

Ha oime avei umi noñemosãséigui avavére iñembo’e ha ijeroviápe oñemoha’eñóva. Jesús katu ningo oipota jaguata oñondive. Ombyaty ijerére 12 apóstol, ha heta disípulo ha disípula. Ha ojokuáivo ichupe kuéra ndoipotái isarambipa, oipota oho mokõi-mokõi, oñemojúnta haguã oñondive.

Tuicháko ñañombovevúi opa mba’épe jarekóramo ñane irũ. Ñamboja’o tembiapo ha umi ñande nañande katupyrýivape ikatu ñane irũ nguéra ñande salva. Ijetu’u avei ningo pe oñondive jaguata.

Sapy’ánte ko ñane júnta itiron vai, naiko’ẽ porãi. Térã katu ñande voi nañande piréi. Sapy’ánte jajoavy ha nañasẽi ojupe.

Upéicha ramo jepe Ñandejára ñanerenói ha ñande jokuái jakakuaa ha ñatyarõ haguã jerovia ha mborayhúpe, tapére jaguatávo oñondive. Natekotevẽi mba’eta jaraha ñande apére, he’i.

Py’a porã ha py’aguapýnte jaraha va’erã mamo ñaguahẽ hápe. Péicha ñamosẽta demóño pochy. Ñembo’e ha jehovasa rupive, Hesu rérape jajapóva katu, ñamosẽta umi Aña oreko asy ha oñapytĩ su’úva ñande rapicha kuérape. Ha oiméramo ndoikuaaséiva mba’éve Ñandejáragui katu, Hesu he’i ani ñamboguapy ñande jehe pochy térã jaja’o.

Jajetyvyrónte ichuguikuéra. Jaheja Ñandejárape. Ha’e oikuaáne ãga mba’épa ojapo hesekuéra.

ÑAÑEMBO’E OÑONDIVE

Ñandejára Hesukrísto, ehenói ha ejokuái ore apytégui karai ha kuñakarai, mitãrusu ha mitã
pyahu, kuña ha kuimba’e. Ejevale ore rehe nde pu’aka rupive emosẽ haguã Aña ore rekovégui. Ne ñe’ẽ ha ne mborayhu ore sambyhy haguã vy’a ha py’aguapy rapére. Amén.

Pa’i Alberto Luna.