Ñahendu Jesús Ñe’ẽ. Sábado 16ª Tiempo Durante el Año

Escucha el evangelio y la reflexión en: https://youtu.be/Hle_aaiNFE8

Sábado 16º Durante el Año

Mateo 13, 24 – 30

Upérõ Jesús omombe’u opavavépe kóva ko káso. Ñandejára Rréino yvagapegua niko ojogua ku karaípe onotỹka va’ekue ikokuépe trígo ra’ỹi porã. Peteĩ pyharépe katu, oke aja, oike ikokuépe hese ija’e’ỹva ha omosarambi hemitỹngue apytépe ñana vai. Upéi osẽ oho.

Pe trígo opu’ã ha upéicha avei pe ñana. Umi óga jára rembiguái ohechávo pe ojehúva, oho hendápe ha he’i chupe hikuái: “Karai, trígo ra’ỹi porã niko ku reñotỹka vaekue nde kokuépe.

Mba’éicha haguã piko osẽ ijapytépe ñana.” Pe óga jára he’i chupekuéra: “Oime vaerã hína che rehe ija’e’ỹva ojapo ra’e.” Upépe umi hembiguái he’i chupe: “Reipota piko roho romondoro umi ñana.” Ha’e katu he’i chupekuéra: “Nahániri.

Pehejánte, ani ágã ñamondorokuévo umi ñana, ñamondoro avei pe trígo. Jahejánte tokakuaa oñondive ha tahi’aju. Ágã ñamono’õta vove, ñamondoro raẽta pe ñana ha jajokua aty-atýpe ha jahapy. Upe rire ae ñambyatýne pe trígo ha ñambohyru.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko múndopy ha’éva Ñandejára kokuépe niko jahecha oĩha heta mba’e porã Ñandejára rembiapokue, ha jahecha avei ijykére oĩha mba’e vai, Aña rembiapokue, mba’asy, mboriahu apĩ, ñembyahýi, pochy, ñorairõ, monda, dróga… Ha ñande pype voi ikatu jatopa heta mba’e porã ha avei oime ijykére umi ñane mbyaíva.

Sapy’ánte ko ñanemondýi voi ha jakyhyje ñande aho’ipa ha ñane rundíramo guarã pe ñana vai. Oime voi upérupi he’íva ko múndope jaha vaipamaha ha mba’e.

Hesu ñanembo’e hína tekotevẽha jaguata umíva pa’ũme ñañemondýi’ỹre.

Jaikuaa va’erã umi mba’e vaígui ndopyta mo’ãiha mba’eve ipahápe. Umi tembiapo vai opareitaha. Oñemombo ha ojehapýta, ñembyasy guasúpe otĩta ijapo hare. Umi mba’e porã katu oñeñongatúta ha opytáta opa ára guarã.

Jahecháramo umi heko vaíva opu’ã, ha ñaña ipu’aka vaicha mba’e porãre, ani ñande py’a mano. Ñamba’apo, ñañeha’ã pe Ñandejára rapére. Ani jaheja ñane rembiapo porã Ñandejára rérape ha ñande rapicha rayhupápe jajapóva. Hesu he’i upéva amo ipahápe ojehechakuaáta ñandéve, ojecha ramóta.

Oñembyatýta Ñandejára rógape ha opytáta omimbi ha ojajái, techapyrãicha opa ára guarã.

Oiméramo sapy’ánte nemboduda imi, che reindy ha nde che irũ, reñandúvo aña ojeliapa ha ipu’akáta vaícha ñande rehe. Ne mandu’ánte ko Hesu ñe’ẽre. Ani nde aho’i ñana, emopu’ã hi’ári ne akã ha eho rei hese ne rembiapo porãme.

Pa’i Alberto Luna.