Ñahendu Jesús Ñe’ẽ. Domingo 17ª Tiempo Durante el Año

Escucha el evangelio y la reflexión en: https://youtu.be/axQwmDk-tD0

Domingo 17º Durante el Año Ciclo B

Juan 6, 1 – 15

Upérõ Jesús ohasa Lágo Galiléa mboypýri, hérava avei Tiberias. Ha heta oĩ ohóva hapykuéri, ohechágui ha’e kuéra umi milágro ojapóva Jesús omonguerávo hasývape.

Jesús ojupi peteĩ sérro ru’ãme ha oguapy upépe idisípulokuéra ndive. Hi’aguĩma upérõ Páskua, judíokuéra arete. Jesús ohechávo hetaha umi hapykuéri ou vaekue, osẽ he’i Felípepe: — Moõ piko jajuhúta tembi’u ñamongarupa haguã ko’ãvape.

Jesús he’i reínte péicha Felípepe, ohecha haguã mba’épa ha’e he’i. Jesús niko oikuaáma voi mba’épa ojapóta. Felipe he’i chupe:— Opavavépe jahupytykátarõ michĩmínte jepe niko ñaikotevẽ amo 1 áñope ñaganáva.

Upépe Andrés, Simón Pedro ryvy ha Jesús disípulo avei, he’i Jesúspe:— Oime niko árupi peteĩ mita’i oguerekóva 5 pan seváda ha mokõi pira. Umíva jepe niko ndaha’éi mba’eve ko’ã genteta peguarã.

Kapi’ipe porã niko upépe, ha Jesús he’i idisípulo kuéra omboguapypa haguã opavavépe. Oĩ upépe amo 5.000 kuimba’e rupi.

Upéi Jesús ojagarra umi pan, ha oagradese rire Ñandejárape, oipehe’ã ha ome’ẽ opa umi oguapývape. Péicha avei ojapo umi pira reheve. Ha ome’ẽ chupekuéra ho’useha peve.

Hyvãtãmba rire, Jesús he’i idisípulokuérape:— Pembyaty pe hembýva, ani haguã oñehundi rei.
Ha ombyaty ha omyenyhẽ hikuái 12 ajaka renyhẽ umi 5 pan rembyrégui. Ha ohechávo hikuái ko milágro Jesús ojapóva he’i:— Kóva niko hína ku proféta ou vaerãva ko yvy ári.

Jesús ohecha kuaávo mbaretépe oguerahaseha chupe hikuái omoĩ haguã chupe irréykuéra ramo, ojupi chuguikuéra pe sérro ru’ãme ha’eño oĩ haguãme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta hetave ko jahecha oikotevẽva ha ñande ñaipytyvõséramo jepe ndajahupytýi. Jesús oiporiahuvereko avei umi hentetápe, ha katu ha’e ha idisípulokuéra ndorekói ave mba’éichapa omongarúta.

Upépe peteĩ mita’ĩ umi hénte apytépe omoĩ Ñandejára pópe pe sa’imi orekóva. Ha upégui oñepyrũ pe ñemboja’o guasu ohupytýva opavavépe. Polka ha lókro mante ñande rupytypa. He’i voi ningo ñe’ẽ. Natekotevẽi ñande ñame’ẽmba.

Umi hénte apytégui voi osẽta hína oñemboja’o haguã ha ohupytýva opavavetépe.

ÑAÑEMBO’E OÑONDIVE
Ñandejára Hesukrísto, nde rejepy’apýva opa umi oikotevẽvare ha eipotáva roñeha’ã roipytyvõ ohasa asývape, ehovasa kena pe michimi rojapóva sa’i sa’ípe ore rapicha rayhupápe. Amén.

Pa’i Alberto Luna.