Ñahendu Jesús Ñe’ẽ. Martes 17ª Tiempo Durante el Año

Escucha el evangelio y la reflexión en: https://youtu.be/-Emhz1m6fMU

Martes 17º Durante el Año

Mateo 13, 36 – 43

Upérõ Jesús oheja opavavépe, ha oho oike hógape. Idisípulokuéra oñemboja hendápe ha he’i chupe: — Emombe’úna oréve mba’épa he’ise pe ñana trigotypegua káso.

Upépe Jesús he’i chupekuéra: Pe trígo ra’ỹi oñotỹva niko che hína. Pe kokue katu ko yvy tuichakue. Pe trígo ra’ỹi niko hína umi oikéva Ñandejára Rréinope.

Umi ñana vai katu hína umi Aña mba’éva. Ha pe ñana ñotỹhare katu Aña voi hína. Pe ára paha oútava niko ñemono’õha árata hína. Ha umi kóga omono’õva katu Ñandejára ángelkuéra. Pe ñana oñembyatyháicha ojehapy haguã, péichata avei ágã ára pahápe.

Upévo, che amboúta che ángelkuéra. Ha’e kuéra ombyatýta ha oipe’áta che Rréinogui opa umi hembiapo vaívape, opa umi oitýva hapichápe pekádope.

Che ángelkuéra oitýta chupekuéra Aña retãme, ha upépe ojahe’óta hikuái ha omopururũta hãi. Opa umi hembiapo porãva katu omimbíta kuarahy rendýicha che Ru Rréinope. Ohendu kuaávake tojapysaka.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaguata hárupi ningo jajuhu yvotyty ha avei ñuatĩndy. Jahasa umi ka’aguy ha ñu porãite asy rupi ñanembopy’a rorýva. Ha jaike avei javorái kua ha karaguataty rupi nañandekutúiramo ñanekarãiva. Ijopara niko ko ñane mundo ajépa chamigo.

Hesu he’i ñandéve ko yvy tuichakue ñaimeha peteĩ kokue guasu Ñandejára mba’éva. Ha ha’e oñembouha oñemitỹ haguã ohejávo ipype pe semílla porã ha’éva iñe’ẽ, ohechaukáva ñandéve pe tekove porã rape.

Ñandejára niko ñande apóramo guare, ojapo ñande hegui ijoguaha, ta’ýra ha tajýra. Yvy porãicha ou haguã upéi ho’a ñane korasõpýpe pe Hesu semilla porã, heñói ha okakuaa haguã.

Upéva ha’e omoĩ voi kuri ñande pype, ha upévare pe Hesu ñe’ẽ ho’a ñande pype hendapete, ojapo porã ñande rehe. Péicharãicha ñande apo ra’e ñande Ru guasu. Ha ou raka’e uperire pe aña oñotỹ isemílla vai ko múndo pýre.

Ha oike haguã ou ñanembojuru he’ẽ ha ñanembotavy, jaipe’a haguã ichupe ñane rokẽ. Ha upéicha omoinge ñande apytépe pe ñana vai, oñembohapo ha okakuaa ñande ykére. Ñande kutu hatĩre pe japu, monda, tie’ỹ, pochy, ñorairõ ha opaichagua aña delihéncia. Ha ñande nañandepu’akáiramo jepe jahapo’o ha jaipe’apa haguã ko’ã mba’e vai yvy ape árigui, ikatu hína jajoko jahecha vove iñapysẽ, ñahakã trosáma voi.

Ani ãga ipahápe ou ñande aho’i, ohundi ñande rekove ha ja’a avei ñande upe tata ha ñembyasy guasúpe.

Ehejápa hína che irũ ha che reindy pe Hesu ñe’ẽ, semílla porãicha oguapy ohóvo nde rekovépe. Mba’épa upe nepytyvõva pe jerovia Hesúre oñembohapo, okakuaa ha hi’a porãite haguã nde pype. Pévako hína tekove añete rape.

Pa’i Alberto Luna.