Ñahendu Jesús Ñe’ẽ. Domingo 24º Durante el Año

Escucha el evangelio y la reflexión en: https://youtu.be/rZ1SYRfY_JM

Domingo 24º Durante el Año Ciclo B

Marcos 8, 27 – 35

Upérõ Jesús ha idisípulokuéra oho Cesaréa Filípope. Tapére Jesús oporandu chupekuéra:— Mavaha che piko pehendu oje’eha.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva nde profetaha.

Jesús oporandu chupe kuéra: — Ha peẽiko mba’e peje, mávaiko che.

Pedro he’i chupe: — Nde hína pe Mesías. Ha Jesús he’i idisípulokuérape ani haguã omombe’u avavépe. Jesús oñepyrũ omombe’u chupekuéra mba’épa ojehúta chupe. He’i, “Heta ahasa asýta hína. Umi mburuvicha, pa’ikuéra ha umi Moises léi ombo’éva ndoikuaase mo’ãi che hegui mba’eve. Che jukátarõ jepe hikuái, aikove jeýta 3 ára haguépe”.

Omyesakã porã chupekuéra ko’ã mba’e. Upépe, Pedro ogueraha chupe ha’eñoháme, ha he’i chupe anive haguã péicha oñe’ẽ. Jesús katu ojere, oma’ẽ idisípulokuérare ha oja’o Pédrope: — Na che reja Sataná. Ndereikuaái pe Ñandejára oipotáva. Nde niko rejogua opavavépe.

Upe jave Jesús ohenói idisípulo kuérape, ha opa umi oĩva ijerére, ha he’i chupekuéra:— Peẽ che moirũsérõ, peñembyesarái umi mba’e peẽ pejaposévagui. Pehupi pende kurusu pende apére, ha peju che moirũ. Pe hekovére hakate’ỹva, omanóta. Pe omanóva che
rehehápe ha umi che ambo’éva rehehápe katu, ojesalváta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

“Heta vove la maestro ni mbaipýma nahatãvéi.” He’i ningo ñe’ẽ. Jahecha Pedro irari Hesu he’i haguére oimetaha ombohasa asy ha ojukátava ichupe. Ha oñemoĩma katu ombo’e imaéstrope mba’éicha va’erãpa. ‘Ndaikatúi araka’eve umíva ojehu ndéve’, he’i. Ha upépe
Hesu oityvyro mbarete mitã Pédrope. ‘Ejei águi Satana’, he’i ichupe. Chéko hína la mbo’ehára. Nde eguata va’erã che rapykuéri ha ani eju gua’u che sãmbyhyse.

Sapy’anteko ñande avei Pédroicha jajetyvyro ha jajeplaguea. Mba’éichapa Ñandejára oheja péicha oiko che rehe. Mba’éichapa Ñandejára opermiti ojeroviáva hese oiko asy. Ndaikatúi. Ha tekotevẽ jareko avei ñande resa renondépe, che irũ ha che reindy, ñandéve, jajeroviáva Jesús rehe, oguahẽtaha avei ára jahasávo ha’e ohasa hague rupi. Ha Jesús omombe’u porã voi ñandéve jahupi va’erãha ñande kurusu, ñanera’arõva tapére, ñamoirũ ramo ichupe.

ÑAÑEMBO’E OÑONDIVE

Ñandejára Jesucristo, nde niko nerekanýi va’ekue jehasa asýgui, ha ndereipe’ái ave ore rapégui kurusu pohýi. Eme’ẽ kena oréve mbarete ha py’a guasu roikotevẽva rohupi haguãicha ore jehasa asy, jerovia, py’aguapy ha mborayhu pópe. Nde rejapo haguéicha. Amén.

Pa’i Jasy.