Ñahendu Jesús. Domingo 3º de Paskua

Escucha el evangelio y la reflexión en: https://youtu.be/n5mNvNsla7o

DOMINGO 3º PASCUA

Lucas 24, 35 – 48

Upérõ umi mokõi Jesús disípulo ou jey va’ekue Emaúsgui Jerusalénpe, omombe’u mba’épa ojehu chupekuéra Emaús rapére, ha mba’éichapa oikuaa hikuái Jesúspe pan omboja’óvo.

Jesús disípulokuéra oñe’ẽ jave hína umi mba’e chupekuéra ojehu va´ekuére, oñemoĩ sapy’a imbytépekuéra Jesús. Omomaitei chupe kuéra ha he’i: — Py’a guapy agueru peẽme.

Ha’ekuéra katu tuicha oñemondýi. Oimo’ã hikuái poraha. Jesús katu he’i chupekuéra:— Mba’éreiko peñemondýi. Mba’éreiko ndaperoviaséi aikove jeyha. Pema’ẽ che po ha che pýre. Pepoko ha pemaña porãna che rehe. Che niko hína. Póra niko ndaho’ói ha na’ikanguéi.

Péicha he’ívo ohechauka chupekuéra ipo ha ipy. Ha ovy’a ha ohecha ramo itereígui ndogueroviapái hikuái. Upémarõ Jesús he’i chupekuéra: — Perekóiko ja’umi va’erã.

Ha ome’ẽ chupe hikuái pira mbichy pehẽngue, ha Jesús ho’u henondépekuéra. Upéi katu he’i:— Pe chéve ojehu vaekue niko hína pe ha’e va´ekue peẽme aimérõ gueteri pene ndive: oiko va’erãha che rehe opa umi mba’e oĩva kuatiáre, Moisés léipe, profétakuérape ha Salmokuérape avei.

Upépe omyesakã chupekuéra pe Ñandejára Ñe’ẽ, ha he’i: — Ñandejára Ñe’ẽme niko he’i voi pe Mesías omano va’erã ha oikove jey vaerãha mbohapy ára haguépe.

He’i ave opa tetã rupi oiko va’erãha che rehe mandu’a, maymáva ojevy haguã Ñandejára gotyo, ikatu haguãicha ha’e oheja rei opavavépe hembiapo vaikue.

Peñepyrũ vaerã Jerusalénpe voi pemombe’u opa ko’ã mba’e pehecháva. Che amboúta peẽme pe che Ru he’i va´ekue omboutaha peẽme. Pepytamivéta Jerusalénpe ou peve peẽme pe py’a guasu oúva yvágagui.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Eñandúmapa che irũ ha nde che reindy Ñandejára Hesukrísto oguahẽramo nde ykére, nembopy’aguapy ha nepytyvõ. Eroviápa upéva ikatuha ojehu ndéve. Ñahendu Hesu omano ha oikove jevy rire ojechauka sapy’a idisípulokuérape.

Oha’arõ’ỹete hágui hikuái, ou ha’e ijehegui oñemoĩ ijapytépe. Oñeñanduka chupekuéra pe komunida ijatyhápe.

Upéicha avei Ha’e oñeñanduka ko’ãga. Hérape ñande atýramo, ñahendu iñe’ẽ, ñañembo’e, jajerovia.

ÑAÑEMBO’E OÑONDIVE

Ñandejára Hesukrísto nde reikovéva opa ára guarã, oremoirũva ha nde orerejáiva ore ño araka’eve. Eipe’a ore resa ha ore korasõ roñandu haguã nde añetehápe eguataha ore ykére, ha ejuha mante embogue kyhyje, orembopy’aguapy ha orembopy’a guasu haguã. Amén.

Pa’i Alberto Luna.