Ñahendu Hesu. Domingo 4º Adviento

Escucha el evangelio y la reflexión en: https://youtu.be/dluA6aKVHNw

4º DOMINGO de ADVIENTO Ciclo B

Lucas 1, 26 – 38

Upe ramo Ñandejára omondo ángel Graviélpe Nazarétpe, opytáva Galiléape. María, peteĩ
kuñataĩ marã’ỹ, oikómiva upépe. Ha’e niko ome’ẽma va’ekue iñe’ẽ omenda haguã Josére.
José niko David ñemoñare akue. Ñandejára ángel oike pe María oĩháme ha he’i chupe:
— Maitei María. Ñandejára nderovasa. Ñandejára oĩ ne ndive.

María oñemondýi opytávo. Ha oñeporandu mba’épa he’iséne pe maitei upéva. Ñandejára
ángel he’i chupe:

— Ani rekyhyje María. Ñandejára niko tuicha nde rovasa. Nde rye guasúta hína, ha ne
membýta. Rembohérata pe mitã Jesús. Pe mitã tuicha mba’éta hína, ha oje’éta hese:
“Ñandejára Yvatetegua Ra’y”. Ha Ñandejára omoĩngóta chupe rréi ramo, ijypykue
Davídcha. Ha’e oisãmbyhýta hetã Israel opa árape guarã.

María oporandu Ñandejára ángelpe:
— Mba’éichata piko péicha, ko che ne’ĩrava amenda.

Ñandejára ángel katu he’i chupe:
— Espíritu Santo rupíta hína péva. Ñandejára Yvatetegua ne añuãta ipokatúpe. Upévare,
pe mitã hérata Ñandejára Ra’y Marangatu. Ha ne príma Isabel imembýta hína avei, iguãiguĩma ramo jepe. Ku oje’e vaekue ndaikatuiha imemby, ojapóma hína 6 mése hye
guasuha. Ñandejárape guarã niko ndaipóri ikatu’ỹva.

Upépe María osẽ he’i:
— Che niko Ñandejára rembiguaimínte. Tojapo che rehe pe ere háicha.
Ha Ñandejára ángel oho.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oñemombe’u oimeha ojavykýva hendápe’ỹ mitãkuña, mitãkuña’i ha mitã’i rehe.
Ombotavy ha forsádo ojapo hetére tie’ỹ. Umíva hína abuso de menores ha prostitución
infantil. Ñambyasy umíva ombyaígui ikangyvévape. Ha ndoje’ovéima ipy’águi umi mba’e
vai. Umíva tekotevẽ ñahenonde’a, ani jaheja oiko ogapýpe, ékuelape, tupaópe. Taha’e
ha’éva oiko hápe, taha’e ha’éva ojapóva.

Ñahendu ou ánhel Graviél Tupãsy rendápe. Omombe’u ichupe Ñandejára oipotaha oiko ichugui Hesu sy. Jahecha mba’eichaitépa Ñandejára ñanemomba’e guasu ha ojerure ñandéve permiso oike haguã ñande rekovépe. Ndojapo mo’ãiha ñande rehe jaipota’ỹva. San Aguitin he’i: “Upe nde apo va’ekue rejerure’ỹre, nandesalva mo’ãi nde reipota’ỹramo”.

ÑAÑEMBO’E OÑONDIVE

Ñandejára ore Ru, Nde niko opavavépe ore apo tuicha mba’éramo. Reiporavo ha rehayhúva
ikangy ha oñemomichĩva, ore sy Tupãsýicha. Orembo’emína ore avei rohayhu, rorrespeta
ha rodefende haguã imboriahu ha ikangyvéva ore apytépe. Amen.

Pa’i Jasy.