Ñahendu Hesu. Domingo 4º Tiempo Durante el Año

Escucha el evangelio y la reflexión en: https://youtu.be/DpqbiNB6-zQ

Domingo 4º Tiempo Durante el Año Ciclo C Lucas 4, 21–30

Upérõ Jesús oho Nazaret tupaópe, oñepyrũ oñe’ẽ ha he’i: — Péina ko’ágã ou ojehu upe pehendu va’ekue.

Opavavénte oñe’ẽ porã Jesús rehe ha oguerohory umi mba’e he’íva. Ha he’i hikuái ojupe: — Kóva piko ndaha’éi ku José ra’y.

Jesús he’i chupekuéra: — Oime va’erã niko pejéta chéve: “Nde raẽna eñepohano ha ekuera doctor”. Ha upéi ave pejéne chéve: “Umi mba’e rohendu vaekue rejapo hague ndaje Cafarnaúmpe, na ejapo avei ko’ápe, ko reikohápe”.

Jaikuaa niko ndaiporiha proféta ojererohorýva ivállepe. Yma proféta Elías oikovépe, ndokyvéi va’ekue mbohapy áño rasa rupi. Tuicha ñembyahýi ou vaekue upérõ, ha heta omano. Ha hetárõ jepe kuña viúda Israélpe upérõ, Ñandejára nomondói vaekue Elíaspe umíva rendápe.

Omondo katu chupe peteĩ kuña Sareptagua rendápe, Sidón ypýpe. Umíva umi árape ave, heta va’ekue Israélpe umi lépragui hasýva. Eliseo katu omonguera peteĩmente, Naamánpe, Síriape oikóva.

Umi tupaópe oĩva hína upéva ohendúvo, ipochypa hikuái. Opu’ã ha omosẽ hikuái Jesúspe pe puéblogui. Ogueraha chupe hikuái pe sérro ru’ãme, upégui omyaña ha oity haguã chupe. Jesús katu oñembohape ipa’ũ rupi kuéra ha oguata ohóvo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ ramo imandu’a porãva ñane pariénte, térã ñande rogaguáre niko ñande aguara hese ha jaguerohory. Upéva ojehu Jesús pe ohóvo hógape, okakuaa haguépe. Umi ivallegua ohecha ramo ha oguerohory ichupe.

Uperiremínte katu oĩma otakýva hese: Kóva niko ñandeichaguánte, he’i. Karai huláno ha ña hulána membýnte niko. Mba’éiko oúta hína oñemoarandu gua’u ñandéve ko’ápe. Máva piko ndoikuaái chupe kuéra. Ha umícha oñepyrũ ombovai ha ndojeroviái hese.

Ñande ko péicha avei sapy’ánte. Ha’ete ku ñaha’arõva voi oguejy yvágagui térã ou umi jaikuaa’ỹva, gríngo oñemoñe’ẽ arandu ñandéve jarovia haguã. Ou ramo ñandéichaguávante katu, ñande valleguánte, ñane vesíno mba’e, ndajajeroviái ete voi.

Jesús pe katu ndojokói umíva. Ohasánte ipa’ũ rupikuéra ha oho rei hese tenonderã Ñandejára rapére. Ndoguevíri. Ojehekýinte umi ichupe ojokosévagui. Péicha oiméne Jesús ñanembo’e hína che irũ ha che reindy, ani haguã jaheja ñande kupylia ha ñande reity ñe’ẽ rei. Ha jajerénte haguã umi ñandeapo’i ha oñembohorývagui ñande rehe jajerovia ha jaiko haguére Jesús ndive.

ÑAÑEMBO’E OÑONDIVE

Ñandejára Jesucristo, nde niko eho va’ekue nde válle ha ne hénte kuéra apytépe
emombe’u Ñandejára ñe’ẽ; oremokyre’ỹmína ore avei romombe’u haguã ne ñe’ẽ ore
rogagua, ore hentekuéra ha ore valleguápe. Amén.

Pa’i Alberto Luna.