Ñahendu Jesús Ñe’ẽ. 3 de mayo: Kurusu ára

Escucha el evangelio y la reflexión en: https://youtu.be/__elpFW0TaQ

3 de mayo: Kurusu ára

Juan 3, 13 – 17

Upérõ Jesús he’i Nicodémope: Avave niko ndohóiva gueteri yvágape, pe yvágagui ou va’ekuénte, ha péva che hína. Ku Moisés, pe desiértope omopu’ã haguéicha yvate pe mbói ra’ãnga, upéicha avei che añemopu’ã vaerã ágã. Ha umi che rehe ojeroviáva, oikovéne opa ára.

Ñandejára ohayhu etereígui opa yvypórape, ome’ẽ vaekue ta’ýra peteĩete, ani haguã omano umi hese ojeroviáva, oikove haguã uvei opa ára. Ñandejára niko nomboúi ta’ýra yvy ári ohundi haguã yvypórape. Ombou chupe, ha’e rupi yvypóra ojesalva haguã.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Kurusu árape niko oñembojeguáva upe kurusu, yvoty ha kuatia verápe, ha oñemosaingo hese chipa, rosario manduvi, yvoty, karamélo ha mba’e, hi’árape ojepo’o haguã. Heta hendápe oñemyataindy, ojejapo henondépe ñembo’e guasu ha ojeguerohory upe kurusu Ñandejára Hesukrísto tuicha jehasa asýpe omano hague.

Oñembojegua upe kurusu jaikuaa haguã omano ramo jepe oikove jevy hague. Ha upe jave avei jaikuaa haguã oime ramo jepe jehasa asy ñande rekovépe oimeha avei heseve vy’a ha py’aguapy rape.

Jahupi ramo jepe kurusu pohýi Ñandejára ñanemoirũha ha ombovevúi imborayhúpe ñande guata ko yvy apére. Upévare ñambojegua ha jaguerohory upe kurusu. Ha’égui ñandéve guarã Ñandejára ohechauka hague ñande rayhuha ha jaikuaágui jehasa asy ha mano rire oimetaha ñandéve guarã avei vy’a ijapyra’ỹva Ñandejára ha opa ñande rayhupára ykére yvágape.

Jajejopy vai vove, jahupi ñande kurusu ha ñama’ẽ Ñandejára Hesukrísto rehe osaingóva hina kurusúre. Upéguive ha’e avei oma’ẽ ñande rehe. Ha péicha ñama’ẽ asy ojuehe ha ñañomoirũ jehasa asýpe. Ikatu ñahendu Jesús ñe’ẽngue osaingo jave kurusúre he’íva: «Che’yuhéi» ha ñande avei ñandey’uhéi hendive vy’a ha py’aguapýgui.

«Tupã eheja rei ichupe kuéra hembiapo vai, ndoikuáaiguinte ojapo» he’i Jesús. Ha ñande avei jajerure Tupãme tohejarei hembiapo vai umi ñanembohasa asývape. «Péina upépe nde sy» he’i Jesús ñandéve kurusu guive. Ha upe guive ñande ñama’ẽ asy ha jajepokã ñande sy Tupãsýre, tombovevúi ñandéve upe kurusu ñanemokarapãva.

Tuichaite mba’e niko che irü ha nde che reindy, upe Ñandejára kurusu ha upe kurusu ñande jahupíva. Hetaite mba’e ñane mbo’éva ha ohechaukáva ñandéve ñane kangy ha ñaikotevẽha Ñandejára ha ñande rapicháre.

Jaikuaa upe jave poriahuvereko ñande rapichakuéra ndive, ikangy ha ohasa asýva ñandéicha avei ha oikotevẽva Tupãre ha ñande rehe omboguata haguã pe ikurusu.

Pa’i Jasy.