Ñahendu Jesús Ñe’ẽ. Sábado de la octava de Pascua
25 abril, 2025Ñahendu Jesús Ñe’ẽ. 3 de mayo: Kurusu ára
2 mayo, 2025
Escucha el evangelio y la reflexión en: https://youtu.be/3IAv4FwPmaU
1º mayo – San José Obrero ára
Mateo 13, 54 – 58
Upérõ Jesús oguãhẽ upe ha’e oikove ypy haguépe. Upépe oñepyrũ ombo’e tupaópe, ha opavave ohecha ramoite chupe. He’i hikuái: — Moõgui piko oikuaa kóva hetaite mba’e. Ha mba’éicha rupi piko ojapo ko’ã milágro.
Oĩ katu he’íva: — Kóva piko ndaha’éi ku carpintéro José ra’y. Isy niko María, ha Santiágo, José ha Judas katu tyvýrakuéra. Heindykuéra niko oiko ñande apytépe. Moõgui piko onohẽ ko’ã mba’e.
Ha ndohecha porãi umi mba’e he’íva. Jesús katu osẽ he’i chupekuéra:— Opa rupi niko profétakuéra oñemomba’e. Hógape ha ipuéblope katu nahániri. Ha ndojeroviáigui hese hikuái, Jesús ndojapói upépe heta milágro.
Ñandejára Jesucristo Ñe’ẽ
Ñamboguejy ñande rekovépe
Tuicha arete ko ára. Jaguerohory opavave omba’apóvape, kuña ha kuimba’e opu’ãva ára ko’ẽre oha’ã haguã ohupyty oikotevẽva hóga ha ifamilia kuéra peguarã.
Oñeha’ãva jeiko porãve rehe ihéntekuéra peguarã hembiapo repykue rupive. Ñemba’apo tuicha mba’e. Pe katupyry Ñandejára ome’ẽva ñandéve rupive, jaiporúvo ñane akã ha ñande po, ñañemomýi ñamomorãve ñane mundo, ñane retã, ñande róga.
Ñandejára omba’apo raka’e ojapo haguã ko ñane mundo ijypýpe ha ñane renói ñandéve ñamoirũ haguã ichupe hembiapópe.
“Che ru omba’apo ha upévare che amba’apo avei” he’i ningo Hesu. Ha jaikuaa ha’e omba’apo hague ipórupi karai José ykére. Ichugui oikumby va’ekue tembiapo porã ha hy’ái va’ekue ohupyty haguã ijykére pe tembi’u omoguahẽ va’erãva hógape rehe hápe. Ha upévare, ha’égui hikuái mba’apohára, ojeapo’i raka’e ichupe ivállepe jepe.
Ndojeroviáiete voi hese hikuái ha’e haguére mboriahu ojehekáva ikarurã rehe. Ndaha’éi haguére karai arandu i-lívro guasúva. Ha upéicha jahecha ñande oikoha avei ko’ãgaite peve umi omba’apóvare. Taha’e albañil, lavandera, carpintero, empleada, electricista, plomero. Taha’e chokokue, niñera, tropero, carretillero, cocinera, barrendero. Taha’e chofer, vendedora, herrero, enfermera.
Sapy’ánte noñemyengoviái hekópe hembiapo kue. Ojepaga’i, ndaipóri seguro social, ndaipóri piro’y, sábado térã domingo. Ha hi’arive ojeja’óne ha ojejahéi hesekuéra sapy’a.
1° de mayo ñanemandu’a año 1866-pe heta mba’apohára, kuña ha kuimba’e, ojejuka ramo guare huelga guasu Chicago, Estados Unidos-pe. Osẽramo guare hikuái kállepe orreklama derecho imba’éva: pytu’u ha tembiapo repykue. Upévare policía ou hi’ári kuéra ha hetaiterei ojejuka raka’e upe jave.
Ñande Iglesia omoĩvo San José obrero ára ko 1º de mayo ohovasa hina opavave omba’apóvape ha ohovasa avei umi oñeha’ãva, sindicato ha asociación omba’apóva aty rupive, ojehechakuaa haguã mba’apohára derecho.
Pa’i Alberto Luna, SJ.