Ñahendu Jesús Ñe’ẽ. Domingo 5º Tiempo Durante el Año

Escucha el evangelio y la reflexión en: https://youtu.be/H3tsFKxpLMY

Domingo 5º Durante el Año

Lucas 5, 1 – 11

Upérõ Jesús oñembo’y hína lágo Galiléa rembe’ýpe. Ijatypa joa ijerére géntekuéra ohendu haguã Ñandejára Ñe’ẽ. Pe y rembe’ýpe, Jesús ohecha mokõi kanóa.

Ohecha nandiha, ijárakuéra oguejy ra’e omopotĩ haguã irréd. Jesús ojupi peteĩme, Simón mba’évape, ha ojerure chupe oñemomombyry’imi haguã pe y rembe’ýgui. Ha oguapy pe kanóape, ha upe guive ombo’e opavavépe. Oñe’ẽmbávo, he’i Simónpe: — Jaha amo hypyvehápe, ha upépe epoi nde rred.

Simón katu osẽ he’i chupe: — Mbo’ehára, pyhare pukukue niko romba’apo kuri ha mba’evete ndoroitýi. Ko’ágã katu, nde eréguinte, apoíta. Ha péicha ojapo. Hetaiterei pira niko oity hikuái, ha irred katu osoróta katuete.

Upémarõ ohenói hikuái hapichakuérape na mombyrýi oĩva hína, ou haguã oipytyvõ chupekuéra. Ou hikuái. Ha mokõive kanóa omyenyhẽte hikuái, ha ipahápe haimetéma oñapymi. Simón ohechávo upéva, oñesũ Jesús renondépe ha he’i chupe: — Ñandejára, anietéke eja che rehe. Che niko pecador.

Simón ha iñirũ nguéra, ha upéicha avei Santiago ha Juan, Zebedeo ra’y mokõive, tuicha oñemondýi ohechávo mba’eichaitépa heta umi pira oitýva hikuái. Jesús katu he’i Simónpe: — Ani rekyhyje. Ko’águi rire renohẽta génte ndaha’éi pira.

Upéi katu omboja hikuái pe y rembe’ýpe ikanóakuéra. Ohejapa oguerekomíva ha oho Jesús ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Che apevénte.” He’i ndoytakuaáiva. Okyhyje ñande rapicha oike haguã pe hypyve hápe ha oríllapente opyta. Upéicha avei oĩ ñande rapicha tupaópe mombyrymínte oguapýva hénte apytepe, ohendúnte oje’éva, ha oiméramo ñehenói tembiaporã oñembotavyete, ndaha’éi ramo guáicha ichupe guarã. Umíva hina cristiano sambuku.

Jahecha mba’éichapa umi hénte ojopypa Jesús pe ha upémaramo oiporu Simóngui ikanóa, ha upeguive oñemoñe’ẽ umi ijatývape. Upéi katu hesahóma mitã Simónre ha ojevaleséma hese. He’íma voi chupe oho haguã hypyvehápe hendive, Simón katu oñembotavy ha ojere jere.

Upéi katu, Jesús he’i haguére chupénte oñembopy’aguasu ha opoi jey la irre. Hetaiterei onohẽ pira ha oñemondýi. Ha upépe Jesús he’i chupe: Ani rekyhyje, ko’águi rire oikóta ndehegui kuimba’e ha kuña renohẽha.

Ha ndépa che irũ ha che reindy reñanima reikévo hypyvehápe nde compromiso pe Ñandejára ndive. Terãpa kora ári ha mombyrymíguinte epytáta ema’ẽ.

ÑAÑEMBO’E OÑONDIVE

Ñandejára Jesucristo rejúva ore renói rombopypukuve haguã rohóvo ore jerovia. Aníkena eheja ore pererĩ ha orembyetia’e rojepoi haguã nendive hypyvehápe. Amén.

Pa’i Alberto Luna.