Ñahendu Hesu. Domingo 7º Tiempo Durante el Año

Escucha el evangelio y la reflexión en: https://youtu.be/fELk59wiAyw

Domingo 7º Durante el Año Ciclo C Lucas 6, 27 – 38

Upérõ Jesús he’i idisípulo kuérape: Pehendúke ko ha’éva peẽme. Pehayhu umi pende rayhu’ỹvape, ha pejapo iporãva umi pende rehe ija’e’ỹvare. Pejerure Ñandejárape tohovasa umi pende rehe oñe’ẽ vaívape, ha peñembo’e umi pende ja’óvare. Oĩ ramo nde rova petéva,
eheja tanderova pete jovái. Ha oimérõ oipe’áva ndehegui nde ahoja, eheja togueraha nde ao ave.

Oimérõ omba’e jeruréva ndéve, eme’ẽ chupe. Ha oimérõ oipe’áva ndehegui nemba’éva, ani ejerure chupe ome’ẽ jey haguã ndéve. Pejapo pende rapicháre upe peẽ peipotáva ojejapo pende rehe.

Peẽ pehayhúrõ umi pende rayhúvapente, piko mba’e iporãva pejapo. Umi mba’e vai apoha jepe niko péicha ojapo. Ha pejapórõ iporãva pende rapichápe pende rehe ojapo porã haguérente, piko mba’e iporãva oĩ upévape.

Umi mba’e vai apoha jepe niko péicha ojapo. Ha peiporukárõ umi omyengovia jeýtava peẽmente, pejapo nga’u piko upéicharõ tuicha mba’e. Umi mba’e vai apoha avei niko oiporuka ojupe, oha’arõgui ojeporuka jey avei chupe.

Pehayhu vaerã pende rayhu’ỹvape. Pejapo iporãva ha peiporuka peha’arõ’ỹre mba’eve hekovia. Upéicharõ, tuicha jopói Ñandejára ome’ẽta peẽme. Ha peikóta Ñandejára ra’y ramo. Ha’e niko ipy’a porã ha ohecha kuaa heko vai ha iñañávape. Peiporiahuvereko va’erã
opavavépe, pende Ru pende poriahuvereko háicha peẽme.

Ani pemoĩ vai pende rapichápe, ndapeipotáirõ Ñandejára pene moĩ vai peẽme. Ani pejopy vai pende rapichápe, ndapeipotáirõ Ñandejára pende jopy vai peẽme. Peheja rei hembiapo vaikue pende rapichápe, ha Ñandejára oheja reíne peẽme pene rembiapo vaikue.

Oikotevẽvape peme’ẽ, ha Ñandejára ome’ẽne peẽme peikotevẽva. Ipojeráne pene ndive ha ome’ẽne peẽme pende vosa renyhẽ chovi. Peẽ pejapoháicha pende rapicháre, upéicha Ñandejára omyengovia jeýne peẽme.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mba’etekópa ou ramo peteĩ nde rova pete mba’e. Eheja reínepa ichupe. Térã ou ramo oipe’ase nde hegui nde ao mba’e. Ehejátapa. Nahániri, ajépa.

Jesús he’i ñandéve ani haguã jaheja rei. Ha’e ñanembo’e ñambohovái haguã umi ñane ndive iñañávape. Ha he’i jajapo va’erãha ojapo háicha ñande Ru yvagapegua. Ha’e imba’e porã iñañáva ndive.

Upéicha ave, he’i Jesús, ñamyengovia va’erã tembiapo porã umi ñane ndive iñañávape. Iporãve ñambohovái aña tembiapo porãme. Jaiporiahuvereko ñande rapicha. Ani ñambojo’ave pe ivaíva ojeapóva ñande rehe. Jaheka ramo justicia ani ñambojo’a vengánsa.

ÑAÑEMBO’E OÑONDIVE

Ñandejára ore Ru, nemba’e porãgui eheja reíva ore añangue. Ore mbo’emína roiporiahuvereko kuaa haguã ore avei umi orendive iñañávape. Amén.

Pa’i Alberto Luna.