Ñahendu Hesu. Sábado 6º Tiempo Durante el Año

Escucha el evangelio y la reflexión en: https://youtu.be/lO-9y_oN7BY

Sábado 6º Durante el Año Marcos 9, 2-13

Upéramo Jesús oho ojupi peteĩ sérro ru’ãme, ha ogueraha hendive Pedro, Santiágo ha Juan. Upépe henondépe kuéra, Jesús rete oñemoambue ohóvo. Ijao overa hendy ha morotĩ sakã. Yvy ári ndaipóri mba’eve peichaite morotĩva.

Upéi katu, ohecháma hikuái Elías ha Moiséspe, oñemongetáva hína Jesús ndive. Ha osẽ he’i Pedro, Jesúspe:— Mbo’ehára, ajépa iporãite ñaimembáre ko’ápe. Reipotárõ, na torojapo peẽme ráncho’imimi pene rendaguã. Peteĩ ne mba’erã, peteĩ Moiséspe guarã ha Elíaspe guarã avei.

Oñemondyipa niko hikuái, ha Pedro katu ndoikuaái mba’épa he’íta. Upe jave ou peteĩ arai ha ojaho’i chupe kuéra. Ha pe araígui katu oñehendu peteĩ he’íva, “Kóva niko che Ra’y ahayhúva. Pehendu chupe.” Ha oma’ẽ jeývo hikuái ijerére ohecha ndaipóri veimaha avave hendive kuéra. Jesús añoite.

Oguejykuévo hikuái pe sérrogui, Jesús he’i chupe kuéra ani haguã omombe’u avavépe upe ohecha vaekue, ha’e oikove jey peve omanóva apytégui. Ha oñongatu hikuái ko’ã mba’e ipy’apýpe. Upe “jeikove jey” katu ndoikuaái hikuái mba’épa he’ise.

Ha oporandu hikuái Jesúspe: — Mba’éreiko umi Moises léi ombo’éva he’i Elías raẽ ou va’erãha, ha upéi katu pe Mesías.

Jesús he’i chupekuéra: — Añetéko pe pejéva. Elías raẽ niko ou vaerã va’ekue ombohape haguã pe Mesíaspe. Ñandejára Ñe’ẽme niko he’i voi che rehe, ko kuimba’e heta ohasa asy va’erãha, ha heta ojeapo’i va’erã. Che katu ha’e peẽme, Elías oúma hague.

Ha heta va’ekue umi hese oñemboharáiva ha ojapo vaekue hese ojaposéva. Ñandejára ñe’ẽme voi niko péicha he’i.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndajavy’ái ñane ño. Ajépa. Jajotopa ramo ha ñañemongeta, ñamba’apo ramo ñane irũnguéra ha ñande rogagua ndive, ñambovevúi tembiapo ha ñambohasa vy’a’ỹ.

Ñandejára ñande apo jaiko haguã oñondive. Ha Jesús oúvo, ombyaty ijehe 12 iñirũra. Umíva ha’e Iglesia ypykue. “Mokõi térã mbohapy oñembyaty hápe che rérape umíva apytépe che aime”, he’i ningo Kirito. Ha péicha Ñandejára oñeñanduka ñandéve komunida apytépe.

Ñembo’e, purahéi ha iñe’ẽ rendúpe, tembiapo jajapóva oñondive rupive, ojechauka ha oñanduka ñandéve heta mba’e porã ñande jeheguínte térã ñane ño ikatu’ỹva jahupyty.

Pe ñande jerovia ningo ñamboguata oñondive. Upépe jajuhu ha jaikuaa porãve Ñandejárape. Ndépa che irũ ha che reindy reñemoirũ nde rapicha ndive reñembo’e térã eñemongeta haguã Ñandejárare Ñe’ẽre. Térãpa ne ñomínte Ñandejára ndive eho hese.

Pa’i Alberto Luna.